រាជធានីភ្នំពេញ ៖ កាលពីមួយរយៈមុន គេកត់សម្គាល់ថា អាជីពធ្វើតារាងបាល់ជួលបានក្លាយជាមុខរបរដែលអាចរកចំណូលបានកាក់កបយ៉ាងខ្លាំង ដោយទីធ្លាតូចធំ ជាពិសេសនៅទីប្រជុំជនក្នុងរាជធានីភ្នំពេញ ត្រូវគេបោះទុនធ្វើតារាងបាល់សម្រាប់ជួលយ៉ាងព្រោងព្រាតនោះផង ។ តារាងបាល់ទាំងតូចទាំងធំទាំងនោះ ត្រួវគេបំពាក់ភ្លើងភ្លឺចិញ្ចាចអាចលេងបានដល់ម៉ោង១០យប់ដោយមិនភ័យពីរឿងសុវត្ថិភាព ឬងងឹតលេងមិនស្រួលនោះផង។
ដីទំនេរមួយ ចំនួននៅរាជធានីភ្នំពេញ ត្រូវគេឃើញប្រែក្លាយជាវាលស្មៅសិប្បនិមិត្ត ប៉ុន្តែក្រឡេកមកមើល បរិយាកាសចុងក្រោយអាជីពមួយនេះចាប់ផ្ដើមប្រែប្រួល ដោយតារាងបាល់នៅតាមតំបន់កណ្ដាលក្រុងភាគច្រើនចាប់ផ្ដើមបិទ ហើយអ្នកលេងទៀតសោតក៏មិនដល់កណ្ដាលយប់ដូចមុនទៀតដែរ ដោយប្ដូរពីការអួតថា កាក់កប់ខ្លាំងណស់ មកជាថ្ងូរបើកតារាងបាល់មិនសូវចំណេញទៅវិញ ។ យ៉ាងណាមិញ ការបិទចោលរបស់តារាងតូចៗ ក៏រុញឱ្យតារាងបាល់ធំៗកើនចំនួនតម្រូវការបញ្ច្រាសទិសគ្នាវិញដែរ ដោយគ្រាន់លែងសូវឃើញតារាងបាល់ផុសផុលដូចមុន។
រំលឹកទៅកាន់អតីតកាលកាលពីរឆ្នាំមុន បន្តិច ដីទំនេរស្ទើរមិនសល់នោះទេ តាមរយៈ សន្ទុះចង់លេងបាល់ទាត់ ឬលេងបាល់ទះពីក្រុមយុវវ័យ រួមមានទាំងមនុស្សវ័យកណ្ដាលផងបានប្រមូលផ្ដុំគ្នារៃលុយលេងបាល់នៅក្នុងតារាងសិប្បនិមិត្តដែលមានផាសុកភាពក្នុងរូបភាពគគ្រឹកគគ្រេង ។ ចាប់ពីម៉ោង៣រសៀលតទៅគេឃើញអ្នកនិយមលេងបាល់ច្រើនឡើងជួបជុំគ្នានៅតាមតារាងបាល់ ដោយអ្នកខ្លះមាន ស្លៀកពាក់ជាឯកសណ្ឋានក្រុមណាមួយផង ដើម្បីចូលលេងក្នុងតារាង ខណៈដែលក្រៅពីបង្ហាញពីការរីកចម្រើនក៏មានបញ្ហាអវិជ្ជមាន ខ្លះៗកើតឡើងផងដែរសម្រាប់ក្មេងៗដែលញៀនញ៉ាមនឹងការលេងកីឡាមួយនេះនៅក្នុងតារាងដែលបានបង្កើតឡើង ។
អ្នកទាំងនោះច្រើនបែងចែកជាក្រុមម្ខាងម្នាក់ ដោយមានការសន្មតគ្នាថា បើក្រុមណាចាញ់គឺចែកគ្នាចេញថ្លៃតារាង ឬមានការប្រកួតភ្នាល់ដាក់លុយតែម្ដង ដោយក្រុមកំណត់ចំនួនតាមគ្រាប់បាល់ ឬស្ថានភាពចាញ់ឈ្នះអាស្រ័យទៅលើការព្រមព្រៀង។ យ៉ាងណាក៏ដោយពួកគេមិនលេងភ្នាល់គ្នាក្នុងទ្រង់ទ្រាយធំនោះទេ គឺគ្រាន់តែដើម្បីបង្កើនការប្រឹងប្រែង និងដើម្បីឱ្យអ្នកឈ្នះមានទឹកចិត្តលេងដោយសារតែមិនអស់ថ្លៃតារាង និងអាចទទួលបានថវិកាខ្លះៗត្រឡប់ទៅវិញប៉ុណ្ណោះ ។
យុវវ័យទាំងនោះបានអះអាងថា ដោយសារតែកំណើនតារាងបាល់ហើយតារាងទាំងនោះក៏មានទីតាំង អំណោយផលផង ទើបចេះតែបំផុសឱ្យពួកគេមានគំនិតចង់ប្រកួតបាល់ទាត់ ក្នុងបំណងហាត់ប្រាណ ដើម្បីសុខភាពផង និងដើម្បីបានជួបជុំគ្នាសប្បាយៗផង។ ម្នាក់ៗសុទ្ធតែយល់ឃើញថា កីឡានាំមកនូវសុខភាព តែថាហេតុផលដែលយុវវ័យភាគច្រើនផ្ដោតលើការជុំគ្នាលេងបាល់គឺដោយសារតែកំណើនតារាងបាល់លេចឡើង ព្រោងព្រាតស្ទើរតែគ្រប់កន្លែងដែលធ្វើឱ្យអ្នកទំនេរពីការងារ និងពីការសិក្សាចង់ជួបជុំគ្នាលេងបាល់នោះឯង ។
ផ្អែកតាមការបញ្ជាក់ តម្លៃតារាងត្រូវគេគិតជាម៉ោងដោយមួយម៉ោងពី១០ដុល្លារទៅ១៨ដុល្លារសម្រាប់តារាងតូច និងពី២០ដុល្លារទៅ៥០ដុល្លារក៏មានសម្រាប់តារាងធំដែលអាចលេងបានគ្នា១១នាក់ម្ខាងៗ ។ តារាងតម្លៃនេះ មានការប្រែប្រួលអាស្រ័យទៅលើទីតាំង និងអំឡុងពេលមានមនុស្សទៅលេងច្រើន ប៉ុន្តែតារាងដែលមានតម្លៃធូរថ្លៃក៏ត្រូវបានគេនិយមទៅលេងភាគច្រើនផងដែរ បើទោះជាទីតាំងស្ថិតនៅកន្លុកកន្លៀតបន្តិចក្ដី។
លោកសីហា ម្ចាស់តារាងបាល់នៅខណ្ឌសែនសុខ ជិតសាកលវិទ្យាល័យIU បានអះអាងថា ក្រោយបើកដំណើរការតារាងបាល់ប្រមាណជាង១ឆ្នាំលោកកត់សម្គាល់ថា ចំនួនអ្នកមកលេងបាល់មានកំណើនជារៀងរាល់ថ្ងៃ ជាពិសេសនៅពេលមិនមានរំខានដោយភ្លៀង ។ លោកថា ដើម្បីអាចបើកអាជីវកម្មនេះបានលុះត្រាតែមានដើមច្រើនគួរសម ហើយត្រូវមានទីតាំងច្បាស់លាស់ក្នុងការរកស៊ីទៅទៀត ដោយសារតែមុខរបរនេះបើកុងត្រារកដីជួលមិនបានចាប់ពី៣ឆ្នាំឡើងទៅទេ គឺនឹងចំណេញមិនច្រើន ។
គ្រាន់តែដំឡើងតារាង និងរៀបចំស្មៅសិប្បនិមិត្ត លោកថាចំណាយមិនក្រោម២ម៉ឺនដុល្លារទៅហើយ ក្នុងពេលដែលការកែកុនតារាងឱ្យមានកន្លែងចតរថយន្តឱ្យមានសំណាញ់ការពារបាល់ និងដំឡើងភ្លើងឱ្យភ្លឺនៅពេលយប់ គឺសុទ្ធតែជាការចំណាយខ្ពស់ដែលម្ចាស់តារាងបាល់នីមួយៗទទួលខុសត្រូវ ។ លោកថា មុខរបរមួយនេះបើអាចទៅរួចគឺត្រូវចូលគ្នា ហើយត្រូវតែរកដៃគូដែលមានចំណូលចិត្តលើមុខរបរបើកតារាងបាល់ដូចគ្នាទើបអាចទៅរួច ។
ជាធម្មតាលោកថា ដើមទុនរង្វង់ត្រឹមតែជាង១ម៉ឺនដុល្លារគឺជាអាចបង្កើតមុខ របរតារាងបាល់មួយបានហើយ ប៉ុន្តែបើចង់ឱ្យ ទីតាំងដែលខ្លួនបើកនោះទទួលបានចំណូលខ្ពស់គឺលុះត្រាតែមានតារាងតូចៗចាប់ពី៣ឡើងទៅ ហើយប្រើដើមទុនរង្វង់ជា៣ម៉ឺនដុល្លារគឺល្អតែម្ដង ។ ជាបទពិសោធន៍លោកថា អាចជួលតារាងឱ្យគេលេងគិតជាម៉ោងដោយថ្ងៃធម្មតាជួលបានមួយម៉ោងពី១០ទៅ១២ដុល្លារ និងថ្ងៃសៅរ៍-អាទិត្យបានមួយម៉ោង១៥ដុល្លារ ឬ១៨ដុល្លារ។ ដោយឡែក សម្រាប់តារាងធំលោកថាមិនសូវ មានគេជួលលេងទេ ដោយសារតែវាមានតម្លៃថ្លៃ និងតម្រូវឱ្យបិទតារាងតូចៗដល់ទៅ៣បញ្ចូលគ្នា តែបើជួលបានក៏បានតម្លៃចាប់ពី១ម៉ោង៣០ដុល្លារឡើងទៅដែរ ។
លោកថា អ្នកចង់ជួលតារាងធំ គឺលុះត្រាតែទាក់ទងមុន តែភាពជាក់ស្ដែងលោកជួលដាច់តែតារាងតូចប៉ុណ្ណោះ គឺតារាងធំលុះត្រាតែចំថ្ងៃធ្វើការដែលមិនសូវមានអ្នកចង់ជួលលេងទើបអាចជួលបាន។ ត្រឡប់មកកាន់បច្ចុប្បន្នវិញ អ្នកដែលធ្លាប់លើកតម្កើងអាជីពបើកតារាងបាល់ទាំងនេះ បែរជាអះអាងថា រកលុយមិនសូវបាននោះទេ ដោយសារតែអ្នកលេងបាល់ចាប់ផ្ដើមបែកខ្ញែក ហើយងាកទៅប្រមូលផ្ដុំគ្នាហាត់ប្រាណយករាង ឬបោះបង់កីឡាតែម្ដង ។ ម្ចាស់តារាងបាល់មួយចំនួនបានអះអាងថា ខ្លួនសម្រេចចិត្តបិទ
ចោល ដោយសារទី១ចំណូលធ្លាក់ចុះ ទី២ការ ដំឡើងថ្លៃ និងការឈប់បន្តជួលដីឱ្យគឺជាបញ្ហាចោទ ។
បើទោះជាខំបង្កើតជារោង កាហ្វេដើម្បីទាក់ទាញនៅតាមតារាងបាល់ នីមួយៗផង ក៏ម្ចាស់តារាងបាល់ទាំងនោះប្រកាស ថា ស្ថានភាពបើកតារាងបាល់មិនដូចមុន ។ អ្នកបើកតារាងបាល់ជាច្រើននិយាយថា ស្ថានភាពរកចំណូលធ្លាក់ចុះអាចជាបញ្ហាចោទដែលធ្វើឱ្យយុវវ័យទាំងនោះលែងសូវប្រមូលផ្ដុំគ្នាជួលលេងបាល់ដូចមុន ប៉ុន្តែហេតុផលដែលគេឃើញច្បាស់ គឺអ្នកលេងទាំងនោះភាគច្រើនទៅផ្ដុំគ្នាលេងក្នុងទីលានដែលអស់លុយតិចឬ មិនអស់លុយតែម្ដង ។
អ្នកសម្រេចចិត្តបិទ សុទ្ធតែលើកឡើងថា ដីជួលតារាងបាល់ភាគ ច្រើនម្ចាស់ដីយកធ្វើជាខុនដូ ឬសង់ផ្ទះលក់ ឬជួលអស់ហើយ ទើបគ្មានដីធំល្អជួលបន្ត ហើយស្របគ្នាដែលការចង់លេងរបស់យុវវ័យក៏មិនសូវមានផុសផុលផង និងរកចំណូល បានមិនចំណេញច្រើនផង ទើបអ្នកបិទភាគច្រើនលែងបើកវិញ ។ ប៉ុន្តែម្នាក់ៗសុទ្ធតែលើកឡើងថា សម្រាប់តារាងបាល់ធំៗចំកន្លែងល្អគឺនៅតែសប្បាយកើបលុយដដែល៕
ចែករំលែកព័តមាននេះ