ខេត្តបាត់ដំបង ៖ កាលពីព្រឹកថ្ងៃទី១ ខែមេសា ឆ្នាំ២០១៩ ការស្វាគមន៍ដំណើរចុះសួរសុខទុក្ខរបស់គណៈប្រតិភូសម្ព័ន្ធមេត្រីភាពរវាងក្រសួងការងារ និងបណ្តុះបណ្តាលវិជ្ជាជីវៈ ក្នុងពិធីចុះសួរសុខទុក្ខកងទ័ពនាឱកាសបុណ្យចូលឆ្នាំថ្មីប្រពៃណីជាតិខ្មែរនាពេលខាងមុខនេះ នៅទីបញ្ជាការកងពលតូចអន្តរាគមន៍លេខ៧ ស្ថិតនៅភូមិសែនជ័យ ឃុំស្រអែម ស្រុកជាំក្សាន្ត ខេត្តព្រះវិហារ និងបានបញ្ចុះបឋមសិលាកសាងសាលប្រជុំក្នុងទីបញ្ចាការដ្ឋានកងពល ក្រោមអធិបតីភាពលោក ពេជ សោភ័ន រដ្ឋលេខាធិការប្រចាំការក្រសួងការងារ និងបណ្តុះបណ្តាលវិជ្ជាជីវះ និងលោកឧត្តមសេនីយ៍ទោ ដួង សំនៀង មេបញ្ជាការកងពលតូចអន្តរាគមន៍លេខ៧ ព្រមទាំងមន្ត្រីក្រសួង ប្រធានមន្ទីរ និងវិទ្យាស្ថានជាតិបណ្តុះបណ្តាលវិជ្ជាជីវៈគ្រប់តាមបណ្តាខេត្ត និងកងទ័ពចំណុះតាមបណ្តាអង្គភាពសរុបប្រមាណជិត២០០០នាក់បានមកចួលរួម។
លោកឧត្តមសេនីយ៍ទោ ដួង សំនៀង មេបញ្ជាការកងពលតូចអន្តរាគមន៍លេខ៧ បានមានមតិស្វាគមន៍និងរាយការណ៍អំពីលក្ខណៈភូមិសាស្ត្រ ដែលកងកម្លាំងគ្រប់អង្គភាពចំណុះឲ្យកងពល បានរៀបចំពង្រឹងគុណភាពកងទ័ព ធានាជីវភាពការរស់នៅ ពង្រឹងការហ្វឹកហ្វឺន ត្រៀមលក្ខណៈអន្តរាគមន៍ ដោយទទួលបានភាពល្អប្រសើរ សំខាន់ការចុះជួយដល់ប្រជាពលរដ្ឋ ដែលជួបគ្រោះមហន្តរាយ ក្នុងគ្រោះធម្មជាតិដែលមានខ្យល់កន្ត្រាក់ ដួលរលំផ្ទះសម្បែងបានទាន់ពេលវេលា បន្ទាប់ពីមានភារកិច្ចការពារ កសាងប្រទេសជាតិរួចមក ។
លោកពេជ សោភ័ន រដ្ឋលេខាធិការប្រចាំការក្រសួងការងារ តំណាងឲ្យលោក អុិត សំហេង រដ្ឋមន្ត្រីក្រសួងការងារបានថ្លែងថា ក្រោមការដឹកនាំរបស់សម្តេចតេជោហ៊ុន សែនជាប្រមុខដឹកនាំប្រទេសកំពុងមានការអភិវឌ្ឍ ក្នុងការកែប្រែពីភាពខ្ទេចខ្ទាំពីភ្នក់ភ្លើងសង្គ្រាមមករកការរីកចំរើនដែលមានសុខសន្តិភាពពិតប្រាកដដែលមិនធ្លាប់មានក្នុងប្រវត្តិសាស្ត្រនោះ គឺក្នុងនាមសមរភូមិក្រោយជួយសមរភូមិមុខ គឺជាកាតព្វកិច្ចរបស់យើងគ្រប់ៗគ្នា ដោយបានអនុវត្តន៍តាមពាក្យស្លោក ការពារជាតិ ដើម្បីទាំងអស់គ្នា ទាំងអស់គ្នាដើម្បីការពារជាតិ តែងតែយកចិត្តទុក្ខដាក់ចាប្រចាំជួយដោះស្រាយរាល់តម្រូវការរបស់កងទ័ពមិនឲ្យជួបការលំបាកឡើយ ពីព្រោះរាល់ការងារ រកស៊ី មានបាន និងការអភិវឌ្ឍសុខសប្បាយបានរហូតកន្លងមក ក៏ព្រោះតែមានកងទ័ពបានជួយថែររក្សា សុវត្ថិភាព សុខសន្តិភាពដល់ប្រជាជន និងប្រទេសជាតិយើងមានក្តីសុខផងដែរ ។
លោកពេជ សោភ័ន រដ្ឋលេខាធិការប្រចាំការក្រសួងការងារ បានថ្លែងបន្តថា ទោះយើងបានចែករំលែកការលំបាកខ្លះៗសម្រាប់ក្តីសុខយើងទទួលបានទាំងអស់គ្នា ដោយកំណើនសេដ្ឋកិច្ចបានកើនឡើងប្រចាំឆ្នាំ៧% និងបានឆ្លងផុតពីប្រទេសមានចំណូលទាប ទៅជាប្រទេសមានចំណូលមធ្យម ពីឆ្នាំ២០១៥មក ហើយវិស័យការងារនៅកម្ពុជាបន្តអភិវឌ្ឍន៍រីកចំរើនដោយអត្រាមានការងារធ្វើ៩៩,៣% មានកម្លាំងពលិកម្មសរុបប្រមាណ ១០លាននាក់ ក្នុងសហគ្រាសគ្រឹះស្ថានសេដ្ឋកិច្ចក្នុងប្រព័ន្ធជិត១ម៉ឺន៣ពាន់ ដែលមានកម្មរនិយោជិត១លាន៥សែននាក់ សហគ្រាសគ្រឹះស្ថានសេដ្ឋកិច្ចក្រៅប្រព័ន្ធជិត៦សែន ដែលមានកម្មករនិយោជិត ២លាន ៤សែននាក់ វិស័យកសិកម្មប្រមាណជាង៤លាននាក់ ពលករធ្វើការក្រៅប្រទេសចំនួនប្រមាណ១លាន ២សែននាក់ និងមន្ត្រីសាធារណៈចំនួនជាង៥សែននាក់ ។
លោករដ្ឋលេខាធិការបានថ្លែងទៀតថា ក្នុងការខិតខំអនុវត្តន៍តាមផែនការយុទ្ធសាស្ត្រអភិវឌ្ឍន៍វិស័យការងារ និងបណ្តុះបណ្តាលវិជ្ជាជីវះ ឆ្នាំ២០១៩-២០២៣ បានផ្តោតទៅលើអទិភាពចំនួន៥ មាន ១/ការអភិវឌ្ឍន៍លក្ខខណ្ឌការងារ និងសុខដុមនីយកម្មនៃទំនាក់ទំនងវិជ្ជាជីវះ, ២/ ការអភិវឌ្ឍ ការអប់រំបណ្តុះបណ្តាល បច្ចេកទេស និងវិជ្ជាជីវះ, ៣/ ការអភិវឌ្ឍមុខរបរ និងការងារ, ៤/ ការអភិវឌ្ឍរបបសន្តិសុខសង្គមសម្រាប់ជនទាំងឡាយ ដែលស្ថិតក្រោមបទប្បញ្ញត្តិច្បាប់ស្តីការងារ, និង៥/ការពង្រីកអភិបាលកិច្ចល្អ សំដៅបង្កើនប្រសិទ្ថិភាពការងារ ឲ្យសមស្របទៅនឹងកំណែទំរង់ស៊ីជម្រៅ របស់រាជរដ្ឋាភិបាលនិតិកាលទី៦ ក្នុងផែនការយុទ្ធសាស្ត្រ និងគោលនយោបាយស្តីពីមុខរបរ និងការងារឆ្នាំ២០១៥-២០២៥ និងគោលនយោបាយជាតិ ស្តីពីការអប់រំបណ្តុះបណ្តាលបច្ចេកទេស និងវិជ្ជាជីវះឆ្នាំ២០១៧-២០២៥ ។
ចុងក្រោយក្នុងនាមក្រសួងការងារ និងបណ្តុះបណ្តាលវិជ្ជាជីវៈ បាននាំអំណោយរបស់សម្តេចតេជោនាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ជូនចំពោះកងទ័ពតំណាងកងពលតូចអន្តរាគមន៍លេខ៧មាន តំណាងកងពលធំអន្តរគមន៍លេខ៣ ថវិកា១លានរៀល, មេបញ្ជាការកងពល១នាក់១លានរៀល, មេបញ្ជាការរង១៧នាក់ ក្នុងម្នាក់២០ម៉ឺនរៀល, នាយរងសេនាធិការ១០នាក់ ក្នុងម្នាក់២០ម៉ឺនរៀល, មេបញ្ចាការវរៈសេនាតូច៤នាក់ក្នុងម្នាក់៤០ម៉ឺនរៀល, មេបញ្ជាកររងវរះសេនាតូច១៥នាក់ ក្នុងម្នាក់២០ម៉ឺនរៀល, កងកិត្តិយស១លានរៀល, យុទ្ធជនក្នុងជួរមាន១៦០០នាក់ក្នុងម្នាក់ទទួលបានថវិកា ១ម៉ឺនរៀល ឃីត១កញ្ចប់ (អំបិល ប៊ីចេង ឆៃប៉ូវផ្អែម) សម្រាប់អង្គភាព ត្រាក់ទ័រ១គ្រឿង, ប្រេងឥន្ធនះ២ពាន់លីត្រ, ស័ង្កសី២ពាន់សន្លឹក, គ្រឿងឧបភោគ បរិភោគមាន ត្រីខកំប៉ុង ៣០កែស, ស្រាបៀរ១០០កែស, ទឹកសុទ្ធ៣០០កែស, ទឹកក្រូច ទឹកផ្លែឈើ១២០កេស មីកញ្ចប់៨៣០កែស, នំកញ្ចប់១៤កែស បារី២០០សុង ៕
ចែករំលែកព័តមាននេះ