រាជធានីភ្នំពេញ ៖ គម្រោងកែលម្អស្ពានជ្រោយចង្វារចាស់ មិត្តភាពកម្ពុជា-ជប៉ុន មកដល់ពេលនេះស្ថាបនាសម្រេចបាន១០០ភាគរយហើយ នៅឡើយរង់ចាំតែពិធីបើកសម្ពោធជាផ្លូវការនៅថ្ងៃទី៣ ខែមេសានេះ ដើម្បីសម្រួលដល់ការធ្វើចរាចរណ៍របស់ប្រជាពលរដ្ឋ។
កាលពីរសៀលថ្ងៃទី១ ខែមេសា ឆ្នាំ២០១៩ លោក ឃួង ស្រេង អភិបាលរាជធានីភ្នំពេញ អមដំណើរដោយមន្ត្រីជំនាញក្រោមឱវាទ បានអញ្ជើញចុះពិនិត្យស្ពានជ្រោយចង្វារចាស់ ដែលទើបជួសជុលរួច ។ ក្នុងឱកាសនៃការចុះពិនិត្យនោះផងដែរ លោកឃួង ស្រេងក៏បានធ្វើការណែនាំឲ្យមន្ត្រី និងអាជ្ញាធររៀបចំសណ្តាប់ធ្នាប់អោយបានល្អប្រសើរ។
មន្ត្រីក្រសួងសាធារណការបានឲ្យដឹងថា ស្ពានជ្រោយចង្វារចាស់ មិត្តភាពកម្ពុជា-ជប៉ុន គ្រោងបើកសម្ពោធជាផ្លូវការនៅថ្ងៃទី៣ ខែមេសា ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជា
ណាចក្រកម្ពុជា ។ ក្រុមការងារជំនាញទាំងជប៉ុន និងកម្ពុជាបានខិតខំប្រឹងប្រែងយ៉ាងខ្លាំងក្នុងការសម្រុកការជួសជុលគម្រោងកែលម្អស្ពានជ្រោយចង្វារចាស់ទាំងយប់ទាំងថ្ងៃ ដើម្បីអោយហើយមុនផែនការ ដែលបង្កលក្ខណៈងាយស្រួលដល់ការធ្វើដំណើររបស់ប្រជាពលរដ្ឋ ខណៈស្ពានជ្រោយចង្វារថ្មីមានចរាចរណ៍មមាញឹកខ្លាំងប្រឈមការកកស្ទះចរាចរណ៍ជារៀងរាល់ថ្ងៃ ពិសេសការសម្រួលចរាចរណ៍ក្នុងឪកាសបុណ្យចូលឆ្នាំខ្មែរដែលប្រជាពលរដ្ឋធ្វើចរចរណ៍ចេញទៅស្រុកកំណើតមិនប្រឈមការកកស្ទះ។
លោកបន្តថា តាមបច្ចេកទេស គម្រោងកែលម្អស្ពាននេះបានសាងសង់ទម្រស្ពានថ្មី ជួសជុលផ្នែកកណ្តាលស្ពានឆ្លងកាត់ទន្លេ និងកែលម្អគល់ស្ពានទាំងសងខាង។ ស្ពាននេះមានប្រវែង៧០៩ម៉ែត្រ ឆ្លងកាត់ទន្លេសាប ត្រូវបានសាងសង់ឡើងកាលពីឆ្នាំ១៩៦៣ ប៉ុន្តែដោយសារសង្គ្រាមស៊ីវិលក្នុងកំឡុងទស្សវត្សទី៧០ ទើបស្ពាននេះត្រូវបានទទួលរងការខូចខាតទាំងស្រុង ហើយរហូតដល់ឆ្នាំ១៩៩២ ទើបជួសជុលស្តារឡើងវិញ។
សូមបញ្ជាក់ថា គម្រោងជួសជុលស្ពានជ្រោយចង្វារចាស់មិត្តភាពកម្ពុជា-ជប៉ុនឡើងវិញនេះ ប្រើរយៈពេលពេល២២ខែ ដោយត្រូវចំណាយថវិការហូតដល់ជាង៣០លានដុល្លារ ដែលជាជំនួយឥតសំណងរបស់រដ្ឋាភិបាលជប៉ុន៕
ចែករំលែកព័តមាននេះ