ខេត្តបន្ទាយមានជ័យ ៖ អ្នកបើកបររថយន្តរបស់ក្រុមហ៊ុនដឹកថ្មម្នាក់បានស្លាប់បាត់បង់ជីវិត ខណៈពេលជនរងគ្រោះបើកកាប៊ីនភ្លើងបូមខ្សល់បាញ់អ៊ែររថយន្ត ស្រាប់តែឆ្លងចរន្តអគ្គីសនី បណ្តាលឱ្យឆក់ស្លាប់ ។
ហេតុការណ៍នេះបង្កឲ្យមានការភ្ញាក់ផ្អើលបានកើតឡើងកាលពីវេលាម៉ោង១និង៣០នាទីរសៀលថ្ងៃទី៣១ ខែមីនាឆ្នាំ២០១៩ នៅចំណុចក្រុមហ៊ុនកិនថ្មភ្នំរូង ស្ថិតក្នុងឃុំបឹងបេង ស្រុកម៉ាឡៃ ខេត្តបន្ទាយមានជ័យ។
លោកវរសេនីយ៍ឯកបេន សំអាត អធិការនគរបាលស្រុកម៉ាឡៃ បានឲ្យដឹងថា ជនរងគ្រោះដែលស្លាប់ឈ្មោះ និន រ៉ា ភេទប្រុស អាយុ២៨ឆ្នាំ ជាអ្នកបើកបររថយន្តដឹកថ្ម រស់ភូមិអូរស្វាយ ឃុំអូរស្វាយ ស្រុកត្រពាំងប្រាសាទ ខេត្តឧត្តរមានជ័យ។
លោកអធិការបានបន្តថា មុនពេលកើតហេតុ ជនរងគ្រោះបានដោះសំបុកអ៊ែរចេញពីរថយន្ត ដើម្បីបាញ់ធូលីដីក្នុងសំបុកអ៊ែររថយន្ត ពេលទៅបើកកាប៊ីនភ្លើង ស្រាប់តែឆ្លងចរន្តអគ្គិសនី បណ្តាលឱ្យឆក់ស្លាប់ចោលប្រពន្ធ និងកូនតូចៗចំនួន២នាក់។
លោកអធិការបានបន្តទៀតថា ក្រោយពេលកើតហេតុ លោកបានចាត់តាំងកម្លាំងជំនាញ និងប៉ុស្តិ៍រដ្ឋបាល ឃុំបឹងបេងសហការជាមួយបុគ្គលិកមណ្ឌលសុខភាព លោកមេភូមិ ក្នុងនោះក៏មានបងប្រុសរបស់ជនរងគ្រោះឈ្មោះ និន នេត ភេទប្រុសអាយុ៣០ឆ្នាំ បានចូលរួមក្នុងការបង្កើតគណៈកម្មការត្រួតពិនិត្យសពជនរងគ្រោះផងដែរ ។ តាមការពិនិត្យបានរកឃើញថា ជនរងគ្រោះពិតជាស្លាប់ដោយសារឆ្លងចរន្តអគ្គីសនីបណ្តាលឱ្យឆក់ប្រាកដមែន ។
ក្រោយពីពិនិត្យរួច សពជនរងគ្រោះត្រូវបានប្រគល់ជូនក្រុមគ្រួសារសាច់ញាតិចាត់ចែងយកទៅធ្វើបុណ្យតាមប្រពៃណី ៕
ចែករំលែកព័តមាននេះ