រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានប្រកាសយ៉ាងម៉ឺងម៉ាត់ថា មិនឲ្យមានការលក់ ឬដោះដូរទីតាំងវិទ្យាស្ថានបណ្តុះបណ្តាល និងស្រាវជ្រាវ ដើម្បីអភិវឌ្ឍន៍កម្ពុជា ហៅកាត់ថា (CDRI) ឡើយ ។ មានប្រសាសន៍ក្នុងពិធីបើកសន្និសីទចក្ខុវិស័យប្រទេសកម្ពុជាលើកទី១៣ ឆ្នាំ២០១៩ ដែលធ្វើឡើងនៅសណ្ឋាគារ The Great Duke (InterCon) រាជធានីភ្នំពេញ នាព្រឹកថ្ងៃទី២៦ ខែមីនា សម្តេចតេជោ ហ៊ុន សែន បានលើកឡើងថា រយៈពេលប៉ុន្មានខែមកនេះមានការៀបចំស្នើសុំប្តូរទីតាំង CDEI បច្ចុប្បន្ននេះធ្វើជាវិស័យឯកជនរួចហើយ យកកន្លែងធ្វើជាទីតាំងថ្មី ឬមួយផ្នែកកសាងអគារសម្រាប់ CDRI និងមួយផ្នែកទៀតសម្រាប់វិស័យឯកជន ។
សម្តេចបានបញ្ជាក់ថា «ខ្ញុំសូមបញ្ជាក់ថា ខ្ញុំសូមបដិសេធន៍រួចហើយ ក៏ប៉ុន្តែខ្ញុំសូមបញ្ជាក់ថា ដីនៅកន្លែងនេះដាច់ខាតមិនត្រូវប្រគល់ឲ្យអ្នកណាទេ ក្រៅពីទុកប្រើប្រាស់ទៅលើបញ្ហា ស្រាវជ្រាវ» ។ សម្តេចក៏បានលើកឡើងថា ទីតាំងរបស់ CDEO នាពេលបច្ចុប្បន្ននេះមានប្រវត្តិវែងឆ្ងាយ ដោយកាលពីឆ្នាំ១៩៩០ ដែលមានលោកស្រីអីវ៉ា និងលោកជា ចាន់តូ យើងបានប្រឹង ប្រែងធ្វើកន្លែងនេះ ដើម្បីបង្កើតធនាគារខួរក្បាល ដែលមានរហូតមកដល់ពេលនេះ បើគិតទៅមានអាយុ២៩ឆ្នាំហើយ ដូច្នេះបើទោះបីជាកន្លែងនេះត្រូវបាក់បែកខ្ញុំសុខចិត្តប្រមូលធនធាន ដើម្បីជាកន្លែងនេះសម្រាប់ធ្វើការនៃវិទ្យាស្ថាននេះបន្តទៀត ។
សម្តេចថា ចាត់ទុកកន្លែងនេះ គឺជាកូនបង្កើតដែលខ្ញុំបានបង្កើតវាឡើងដោយផ្តល់ដី និងថែមទាំងវាតតាំងពីពេលនោះរហូតមកពេលនេះ ។ អីញ្ចឹងសូមកុំឲ្យអ្នកណាមួយផ្តួចផ្តើមគំនិតទាក់ទិននឹងដីនេះឲ្យសោះ ។ ប្រសិនបើជាមន្ត្រីរាជរដ្ឋាភិបាល ខ្ញុំមិនអាចប្រាប់នឹងណែនាំពួកគេទៀតទេ ។ យើងបានធ្វើអំពីកិច្ចការមួយចំនួនពីការដោះដូរអគារនេះអគារនោះនៅពេលយើងគ្មានប្រាក់ ។ ឥឡូវកន្លែងដែលយើងដោះដូរនោះក្លាយជាក្រសួងស្ថាប័នធំៗរួចទៅហើយ» ។
សម្តេចក៏បានលើកឡើងថា ក៏ប៉ុន្តែ CDRI មានប្រវត្តិជិត៣០ឆ្នាំមកហើយដោយគ្មានការដោះដូរទីតាំងនោះទេ ។ អីញ្ចឹងសូមបញ្ជាក់ឲ្យបានជ្រាបសម្រាប់ទីតាំងនេះ ហើយនេះមិនមែនជារឿងថ្មីសម្រាប់ហ៊ុន សែន ទេវាជារឿងចាស់របស់ហ៊ុន សែន ដែលបានបង្កើតស្ថាប័នខួរក្បាល គឺCDRI តាំងពីលោកស្រី អីវ៉ា និងលោកជា ចាន់តូ ហើយខ្ញុំទៅកន្លែងនេះមុនគេ ៕
ចែករំលែកព័តមាននេះ