គូលែនគឺជាផ្លែឈើមានរសជាតិផ្អែមឆ្ងាញ់ ដែលគេនិយមបរិភោគមិនថាក្នុងប្រទេសកម្ពុជា ឬក្រៅប្រទេសនោះទេ ហើយមានដឹងទេថា តើគេដាំផ្លែគូលែនបែបណា? ខាងក្រោមនេះគឺជាវិធីដាំគូលែនដែលបែកចែកជាច្រើនដំណាក់កាល ។ នេះបើយោងតាមគេហទំព័ររបស់ក្រសួងកសិកម្ម រុក្ខាប្រមាញ់ និងនេសាទ ៖
១- ការរៀបចំរណ្តៅដី ៖ ដំបូងត្រូវជីករណ្តៅ៦តឹកបួនជ្រុង ជំរៅ៦តឹក រួចរោយកំបោរ.សប្រមាណ២ស្លាបព្រាបាយក្នុងរណ្តៅដីនោះ ហើយត្រូវដាក់ផេះ ឬអង្កាម, កំប្លោង, ចំប៉ើងពុក. អាចម៌មាន់ ឬអាចម៌ជ្រូក និងអាចម៌គោមួយស្រទាប់កម្រាស់១តឹក និងដាក់ដីពីលើ១តឹកទៀតធ្វើយ៉ាងនេះរហូតទាល់តែពេញរណ្តៅតែម្តង និងទុករណ្តៅរៀបចំហើយក្នុងរយៈពេល២ទៅ៣ថ្ងៃអាទិត្យ ហើយចម្ងាយពីរណ្តៅមួយទៅរណ្តៅមួយប្រវែង៨ម៉ែត្រ។
២- ការដាំ ៖ កូនគូលែនត្រូវរក្សាផ្សាំទុក១អាទិត្យមុននឹងដាំ ហើយផ្អាកស្រោចទឹក២ថ្ងៃមុនដាំដើម្បីកុំឱ្យបែកដី និងឫស រួចត្រូវយកថង់គូលែនចេញកុំឱ្យបែកដី បន្ទាប់មកកប់កូនគូលែននោះក្នុងរណ្តៅយ៉ាងណាឱ្យដីកន្ទោងកូនគូលែនស្មើមាត់រណ្តៅ រួចយកមែនឈើដោតក្បែរនោះចងទប់នឹងកូនគូលែន រួចលប់ដីបន្តិចម្តងៗ សង្កត់ថ្នមៗ ហាមសង្កត់លើដីកន្ទោងកូនគូលែន ព្រោះវាធ្វើឱ្យដាច់ឫស ។
៣- ការថែទាំង និងដាក់ជី ៖ បើក្នុងខែវស្សាត្រូវពូនគល់ការពារទឹកជាំនៅគល់ដើម្បីកុំឱ្យរលួយឫស ប៉ុន្តែបើនៅដើមរដូវប្រាំងវិញ គួរដាក់ជីបំប៉នដោយប្រើជីអាចម៌មាន់ ឬអាចម៌ជ្រូក និងអាចម៌គោលាយជាមួយអង្កាមពុក ចំប៉ើង ឬកំប្លោករលួយកាយកប់ក្នុងដីធ្វើជាកំពែង ។
៤- ការស្រោចទឹក ៖ កូនគូលែនអាយុតិចជាង២ឆ្នាំត្រូវស្រោចទឹក១ដង/អាទិត្យនៅរដូវប្រាំង ហើយយើងត្រូវស្រោចទឹកតែម្តងគត់នៅពេលវាកំពុងតែផ្កា ។
៥-ការកាត់តែងមែង ៖ អ្នកត្រូវកាត់ត្រួតចុងចេញនៅឆ្នាំទី១ ហើយត្រូវកាត់មែកមិនសូវល្អចេញរាល់ឆ្នាំ ។ ហើយនៅពេលផ្លែគូលែនមានទំហំប៉ុនមេដៃយើងត្រូវបាញ់ថ្នាំសម្លាប់សត្វល្អិតទៅលើផ្លែដើម្បីការពារដង្កូតស៊ីផ្លែនៅពេលវាទុំ ។ ជាចុងក្រោយពេលប្រមូលផលនោះ យើងមិនត្រូវបេះផ្លែគូលែនទម្លាក់លើដីទេ ត្រូវបេះផ្លែគូលែនឱ្យមានជាប់ទងជាការប្រសើរ ៕
ចែករំលែកព័តមាននេះ