ខេត្តកំពង់ឆ្នាំង ៖ អាជ្ញាធរខេត្តកំពង់ឆ្នាំងបានអះអាងថា មានភ្ញៀវទេសចរណ៍ចូលរួមបុណ្យទន្លេលើកទី ៥ នៅខេត្តកំពង់ឆ្នាំងក្នុងរយៈពេល៣ថ្ងៃមានជាង១១០ម៉ឺននាក់ ហេតុដូច្នេះបញ្ហាសំរាមគឺចៀសមិនផុតនោះទេ ប៉ុន្តែបញ្ហានេះមិនធ្ងន់ធ្ងរនោះឡើយ គ្រាន់តែចប់ពិធីបុណ្យភា្លម អាជ្ញាធរខេត្តបានសហការជាមួយមន្ទីរអប់រំយុវជននិងកីឡា បាននាំគ្នាប្រមូលសំរាមដើម្បី សម្អាតបរិស្ថានក្នុងក្រុងកំពង់ឆ្នាំងជាបន្ទាន់ផងដែរ។
កាលពីរសៀលថ្ងៃទី១៨ ខែមីនា ឆ្នាំ២០១៩ សិស្សសាលាបឋមសិក្សាគំរូក្រុង ដែលបានចូលរួមប្រមូលសំរាម នៅក្នុងក្រុងកំពង់ឆ្នាំង បានសម្ដែងទឹកចិត្តរីករាយ ដោយបានបញ្ជាក់ថា ពួកគាត់មានមោទនភាព ព្រោះបានចូលរួមរើសសំរាម សំអាតបរិស្ថានក្នុងក្រុងកំពង់ឆ្នាំង ដើម្បីឱ្យមានសោភ័ណភាព ។ ទោះយ៉ាងនេះក្តី ពួកគាត់បានសំណូមពរដល់ប្រជាពលរដ្ឋទាំងអស់សូមកុំចោលសំរាមបែបនេះទៀត បើមានកម្មវិធីលើកក្រោយ ។ ត្រូវយកសំរាមទៅដាក់ក្នុងធុងសំរាមអោយបានត្រឹមត្រូវ។
ក្នុងឱកាសនោះដែរ លោក ស៊ុន សុវណ្ណារិទ្ធ អភិបាលរងខេត្តកំពង់ឆ្នាំង បានមានប្រសាសន៍ថា ក្នុងពិធីបុណ្យទន្លេ រយៈពេល៣ ថ្ងៃ គិតចាប់ ចាប់ពីថ្ងៃទី១៥ដល់១៧ ខែមិនា កន្លងទៅនេះ មានភ្ញៀវទេស ចរណ៍បានចូលរួមកំសាន្ត ក្នុងខេត្តកំពង់ឆ្នាំង មានជាង១១០ម៉ឺននាក់ ហើយបញ្ហាសំរាមនេះ គឺត្រូវជួបប្រទះខ្លះៗហើយ ប៉ុន្តែតិចតួចមិនច្រើនណាស់ណានោះទេ ។
ថ្ងៃនេះអាជ្ញាធរខេត្តបានសហការជាមួយមន្ទីរអប់រំ យុវជននិងកីឡា ហើយបានឲ្យយុវសិស្សសាលាបឋមសិក្សាគំរូក្រុងជាង១ពាន់នាក់មកចូលរួមរើសសំរាមនៅក្នុងក្រុងកំពង់ឆ្នាំង ដែលបានកំណត់៣គោលដៅត្រូវអោយរើស ។ ប៉ុន្តែយ៉ាងនេះក្តី ការរើសសំរាមមិនទាន់អស់នៅឡើយទេ ដោយកន្លែងខ្លះមិនទាន់រើស្តង់អស់នៅឡើយ ។ ហេតុដូច្នេះនៅថ្ងៃទី១៩ មីនា លោក ហេង ពិទូ និងដឹកនាំក្រុម ស.ស.យ.ក ក្រុមសម្ព័ន្ធយុវជនស្រលាញ់សន្តិភាព និងក្រុមកាកបាទក្រហម ដើម្បីបន្តប្រមូលសំរាមបន្តទៀត ជាមួយគ្នានេះរថយន្តពន្លត់អគ្គីភ័យរបស់ស្នងការនគរបាលខេត្តកំពង់ឆ្នាំង នឹងត្រៀមបាញ់ទឹកសំអាតដើម្បីបញ្ចប់ការងារអោយអស់តែម្តង ។
លោកបានបញ្ជាក់ថា ជាទិសដៅបន្តអាជ្ញាធរខេត្តនិងបន្តរៀបចំសោភ័ណភាពក្រុងកំពង់ឆ្នាំងបន្តទៀតដើម្បីចូលរួមប្រលងប្រណាំងទីក្រុងស្អាតថ្នាក់អាស៊ាន ដែលខេត្តកំពង់ឆ្នាំង បានចូលរួមប្រឡងទីក្រុងស្អាតថ្នាក់អាស៊ានជាមួយបណ្តាខេត្ត៥ទៀត ហើយការប្រកាសលទ្ធផលនឹងធ្វើឡើងនៅទីក្រុង នៃប្រទេសព្រុយណេ។
សូមបញ្ជាក់ដែរថា នៅរសៀលថ្ងៃទី១៨ ខែមិនានេះដែរ រដ្ឋបាលសាលាខេត្តបានប្រារព្ឋពិធីជូនដំណើរដូនតា និងគង្គា បន្ទាប់ពីប្រារព្ឋពិធីអស់រយៈពេល៣យប់៣ថ្ងៃផងដែរ៕
ចែករំលែកព័តមាននេះ