ខេត្តកំពង់ឆ្នាំង ៖ ប្តីប្រពន្ធ២នាក់ រួមទាំងកូនតូចទើបអាយុ១ឆ្នាំម្នាក់បានស្លាប់ព្រមគ្នាទាំងគ្រួសារ ក្នុងហេតុការណ៍គ្រោះថ្នាក់ចរាចរណ៍មួយបានកើតឡើងនៅវេលាម៉ោង៤និង០០នាទីល្ងាចថ្ងៃទី១៨ ខែមីនា ឆ្នាំ២០១៩ នៅលើកំណាត់ផ្លូវជាតិលេខ៥ ចន្លោះគីឡូម៉ែត្រលេខ៤៩ និងលេខ៥០ ស្ថិតក្នុងភូមិតាកុល ឃុំពានី ស្រុកកំពង់ត្រឡាច ខណៈដែលម្ចាស់រថយន្ដប៉ះទង្គិចជាមួយម៉ូតូមួយគ្រឿង ។
ជុំវិញហេតុការណ៍គ្រោះថ្នាក់ចរាចរណ៍ដ៏រន្ធត់នេះអធិការនគរបាលស្រុកកំពង់ត្រឡាច លោក នន ស៊ីណាត បានឲ្យដឹងថា គ្រួសាររងគ្រោះខាងលើមានបុរសជាប្តីឈ្មោះប៉ុក សារឿន អាយុ២៧ឆ្នាំ មានទីលំនៅភូមិសុបិន្ត ឃុំពានី ស្រុកកំពង់ត្រឡាច ។ ចំណែកស្ត្រីជាភរិយាដែលជិះពីក្រោយមានឈ្មោះ ច្រិក សម្ផស្ស អាយុ២៥ឆ្នាំ មានទីលំនៅភូមិអំពិលទឹក ឃុំអំពិលទឹក ស្រុកកំពង់ត្រឡាច ដោយឡែកកូនប្រុសអាយុទើបតែ១ឆ្នាំ បានស្លាប់ជាមួយឪពុកម្ដាយដែរនោះមានឈ្មោះ ស៊ឹម សុចាន់ ។
ប្រភពដដែលបានបន្តថា មុនពេលកើតហេតុជនរងគ្រោះទាំង៣នាក់ ប្តីប្រពន្ឋ និងកូន បានជិះម៉ូតូមួយគ្រឿងម៉ាកហុងដាសេ125 ពាក់ស្លាកលេខកំពង់ឆ្នាំង 1 h 0 743 ដោយបុរសជាប្តីជាអ្នកបើក ក្នុងដំណើរពីជើងទៅត្បូងតាមបណ្តោយផ្លូវជាតិលុះមកដល់ចំណុចកើតហេតុក៏ស្រាប់តែមានរថយន្តធុនធំមួយគ្រឿង ពណ៌ក្រហមឆ្នូតពណ៌ទឹកប្រាក់ ពាក់ស្លាកលេខ ក្រចេះ 3 A 0365 បើកបរដោយបុរសឈ្មោះ យឿន សុភា អាយុ២៦ឆ្នាំ មានទីលំនៅភូមិសំរោង ឃុំតាជេស ស្រុកកំពង់ត្រឡាច ក្នុងទិសដៅពីជើងទៅត្បូង លុះមកដល់ចំណុចកើតហេតុក៏បានបត់ទៅទិសខាងលិច បណ្ដាលឱ្យបុកគ្នាជាមួយម៉ូតូជនរងគ្រោះចូលកង់ក្រោយ ស្លាប់បាត់បង់ជីវិតទាំងគ្រួសារតែម្តង ។
ក្រោយពេលកើតហេតុអ្នកបើកបររថយន្តឈ្មោះយឿន សុភា បានបើករត់គេចចូលទៅលាក់ទុកនៅការដ្ឋានរណ្តៅដី ហើយក៏គេចខ្លួនបាត់ ។ យ៉ាងនេះក្តីសមត្ថកិច្ចក៏បានតាមរករថយន្តនោះឃើញ និងបាននាំមករក្សាទុក ដើម្បីកសាងសំណុំរឿងទៅកាន់តុលាការតាមផ្លូវច្បាប់ ។ ដោយឡែកសពជនរងគ្រោះទាំង៣នាក់ឪពុកម្តាយនិងកូនតូច ត្រូវបានក្រុមគ្រួសារយកទៅធ្វើបុណ្យតាមប្រពៃណី ។
ករណីគ្រោះថ្នាក់ចរាចរខាងលើត្រូវបានសមត្ថកិច្ចឲ្យដឹងថា អ្នកបើកបររថយន្ត និងម៉ូតូខ្វះការប្រុងប្រយ័ត្នទាំងសងខាង ព្រោះកន្លែងកើតហេតុជាការដ្ឋានកំពុងធ្វើផ្លូវមានស្លាកសញ្ញាជាសម្គាល់អោយប្រុងប្រយ័ត្ន និងបន្ថយល្បឿន ៕
ចែករំលែកព័តមាននេះ