រាជធានីភ្នំពេញ ៖ ការប្រកួតប្រដាល់ដណ្ដើមខ្សែក្រវាត់អន្តរជាតិZORUSក្នុងប្រភេទទម្ងន់៦៣,៥គីឡូក្រាមនៅលើសង្វៀនទូរទស្សន៍ស៊ីអិនស៊ីកាលពីព្រឹកថ្ងៃអាទិត្យទី១៧មីនា គេបានរកឃើញបេក្ខភាពឡើងទៅប្រកួតនៅវគ្គផ្ដាច់ព្រ័ត្រជាបន្តទៀតហើយគឺកីឡាករកម្ពុជាឡុង សំណាង មកពីក្លិបសាលវ័ន្តកីឡានិងកីឡាករថៃ ភីត សាយហ្វា បន្ទាប់ពីអ្នកទាំងពីរយកឈ្នះគូប្រកួតរៀងខ្លួន។
ឡុង សំណាង ត្រូវបានគណៈកម្មការផ្ដល់ពិន្ទុឱ្យឈ្នះផាន់ គ្រាន់ មកពីក្លិបពុទ្ធសេរីវង្សពោធិសែនជ័យដោយឯកច្ឆ័ន្ទ៥ទល់០ ។ ចំណែកកីឡាករថៃភីត សាយហ្វា វិញចំណាយពេលត្រឹមតែ២ទឹកប៉ុណ្ណោះបានយកឈ្នះកីឡាករ ឌុម កែវដា មកពីក្លិបមកុដរាជសីហ៍ ដោយត្រូវអាជ្ញាកណ្ដាលបញ្ឈប់លែងឱ្យប្រកួតតែម្ដង។ ដូច្នេះអ្នកឈ្នះទាំងពីររូបត្រៀមជួបគ្នានៅវគ្គផ្ដាច់ព្រ័ត្រដណ្ដើមខ្សែក្រវាត់ជើងឯក ។ ចំណែក ផាន់ គ្រាន់ និងឌុម កែវដាវិញ ត្រូវជួបគ្នាដណ្ដើមយកចំណាត់ថ្នាក់លេខ៣។
រីឯគូប្រកួតមិត្តភាពវិញកីឡាករឡុង ជិនមកពីក្លិបខ្លារខិនមានរិទ្ធ បានយកឈ្នះកីឡាករថៃ ឃុន ផាយ៉ាក ដោយពិន្ទុ និងកីឡាករ ផុន ផុល មកពីក្លិបតាព្រហ្មមានជ័យ បានចាញ់ កីឡាករ សុខ សុវណ្ណ មកពីក្លិបកងពលធំអន្តរាគមន៍លេខ២ដោយពិន្ទុ។ ចំពោះការប្រកួតនៅលើសង្វៀនដដែល កាលពីថ្ងៃសុក្រទី១៥ មីនា កីឡាករ អ៊ុល សំណាង មកពីក្លិបយុវវាលស្បូវខណ្ឌច្បារអំពៅបានយកឈ្នះកីឡាករពេជ្រ អាលី មកពីក្លិបចលនាយុវជន១៥៧គុនខ្មែរដោយពិន្ទុ ។
កីឡាករ ឬទ្ធីសាស្ត្រា វុទ្ធ មកពីក្លិបអាណាចក្រប្រយុទ្ធខេត្តសៀមរាប បានយកឈ្នះកីឡាករសូត្រ វាសនា ដោយពិន្ទុ ។ កីឡាករ វៀត ប៊ុនឌឿន មកពីសមាគមកីឡាប្រដាល់ក្រសួងការពារជាតិ បានផ្ដួលកីឡាករថៃ រិទ្ធ អៃរ៉ាយ៉ា ឱ្យសន្លប់ទឹកទី២ ។
កីឡាករ ឡុង រ៉ាមី មកពីក្លិបខ្លារខិនមានរិទ្ធ បានយកឈ្នះកីឡាករ សេក គឹមសាន្ត មកពីក្លិបអង្គរមានជ័យខេត្តសៀមរាបដោយពិន្ទុ និងកីឡាករ នី សុភី មក ពីក្លិបសាលវ័ន្តកីឡា បានយកឈ្នះកីឡាករថៃ ម៉ាណាវ ថង ដោយពិន្ទុ។
លទ្ធផលការប្រកួតប្រដាល់កាលពីថ្ងៃសៅរ៍ទី១៦ មីនា វេលាម៉ោង២រសៀល នៅលើសង្វៀនស៊ីអិនស៊ី កីឡាករទិត្យ សុវណ្ណ មកពីក្លិបអេភូថងកីឡា បានយកឈ្នះកីឡាករគីន ខ្លឹម មកពីក្លិបកងពលតូចទ័ពពិសេសឆត្រយោង៩១១ដោយពិន្ទុ ។
គូប្រកួតដណ្ដើមប្រាក់លានរៀល ខាំ ខ្លានាង មកពីក្លិបរ៉ាហាប់ស្វាយប៉ាកបានផ្ដួលកីឡាករថៃ មៀក ណាម ឱ្យសន្លប់ទឹកទី៣ ។ កីឡាករ អេលីត ចំរើន មកពីក្លិបឆ្មាសសែនសុខ បានចាញ់ពិន្ទុកីឡាករថៃណង អូហ្វ។
កីឡាករ វ៉ែន ហុងជីវ័ន្ត មកពីក្លិបមកុដរាជសីហ៍បានយកឈ្នះកីឡាករហួត គឹមហៀង មកពីក្លិបតាព្រហ្មមានជ័យដោយពិន្ទុ ។ រីឯការប្រកួតពេលល្ងាច សម្រាប់គូប្រកួតមិត្តភាពអន្តរជាតិកីឡាករ ឡុង បេនដឿន មកពីក្លិបសាលវ័ន្តកីឡា ត្រូវកីឡាករថៃ ឌីន ពីឈិត វាយឱ្យសន្លប់ទឹកទី១ ។
កីឡាករ យ៉ុន ដារ័ត្ន មកពីក្លិបតាឡីដំរីមានរិទ្ធ បានយកឈ្នះកីឡាករជប៉ុនNaKamura Shinnossuke ដោយពិន្ទុ និងកីឡាករពុទ្ធ ហ៊ុច មកពីក្លិបពុទ្ធសេរីវង្សពោធិសែនជ័យ បានយកឈ្នះកីឡាករថៃ នឹង ត្រាកាន់ នៅត្រឹមទឹកទី៣ ៕
ចែករំលែកព័តមាននេះ