រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា គិតត្រឹមព្រឹកថ្ងៃទី១៨ ខែមីនា ឆ្នាំ២០១៩ នេះ អភិបាលរាជធានីភ្នំពេញ និងជាប្រធានកាកបាទក្រហមកម្ពុជា រាជធានីភ្នំពេញ…
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា គិតត្រឹមព្រឹកថ្ងៃទី១៨ ខែមីនា ឆ្នាំ២០១៩ នេះ អភិបាលរាជធានីភ្នំពេញ និងជាប្រធានកាកបាទក្រហមកម្ពុជា រាជធានីភ្នំពេញ បាននាំយកអំណោយកាកបាទក្រហមកម្ពុជាមកចែកជូនប្រជាពលរដ្ឋចំនួន៥០គ្រួសារដែលរងគ្រោះដោយសារអគ្គិភ័យឆាបឆេះផ្ទះកាលពីម្សិលម៉ិញ ស្ថិតនៅភូមិព្រែកទាល់១ សង្កាត់ស្ទឹងមានជ័យទី២ ខណ្ឌមានជ័យ ។
គួររំលឹកថា លំនៅឋានប្រជាពលរដ្ឋចំនួន៥០ខ្នងធ្វើអំពីឈើប្រក់ស័ង្កសីតូចៗ និងធ្វើអំពីឈើលើថ្មក្រោមមានធំ មានតូច ត្រូវបានអគ្គិភ័យលេបត្របាក់អស់គ្មានសល់ កាលពីម៉ោងជាង៣រសៀលថ្ងៃទី១៧ ខែ មីនា នៅភូមិព្រែកទាល់១ សង្កាត់ស្ទឹងមានជ័យទី២ ខណ្ឌមានជ័យ ។ គ្រោះអគ្គិភ័យនេះ បង្កឱ្យមានការភ្ញាក់ផ្អើលយ៉ាងខ្លាំងទៅដល់សមត្ថកិច្ចមូលដ្ឋាន ដឹកនាំដោយលោក ពេជ្រ កែវមុនី អភិបាលខណ្ឌដឹកនាំកម្លាំងចុះមកជួយធ្វើអន្តរាគមន៍បាញ់ទឹកពន្លត់ និងមានរថយន្តពន្លត់អគ្គិភ័យជាច្រើនគ្រឿងមកជួយអន្តរាគមន៍បាញ់ទឹកពន្លត់ផងដែរ ។
តាមលោកតាអាចារ្យឈ្មោះ កឹម កេន អាយុ៦៩ឆ្នាំ បរៀបរាប់ប្រាប់ទាំងតក់ស្លុតថា ខណៈរូបគាត់ត្រូវគេអញ្ជើញឲ្យទៅសូត្រមន្តនៅឯវត្តនន្ទមុនីនោះ ស្រាប់តែឮគេបោះដៃតាមវិទ្យុទាក់ទងអាយកូមចូលទៅព្រះសង្ឃថា «ភ្លើងកំពុងឆេះផ្ទះនៅម្តុំផ្ទះរបស់គាត់» ។ ពេលនោះមិនទាន់សូត្រមន្តចប់ផង រូបគាត់ក៏រត់ពីវត្តមកមើលផ្ទះរបស់គាត់ តែពេលមកដល់គឺផ្ទះគាត់់ត្រូវភ្លើងឆេះអស់គ្មានសល់់ទៅហើយ ដោយមិនបានយកទ្រព្យអ្វីចេញបន្តិចឡើយ និងនៅសល់តែខោអាវមួយចង្កេះជាប់នឹងខ្លួនគាត់ប៉ុណ្ណោះ ។
លោកតាអាចារ្យរៀបរាប់ទៀតថា នៅផ្ទះរបស់គាត់មាននៅតែក្មួយប្រុសម្នាក់់នៅចាំផ្ទះប៉ុណ្ណោះ ហើយរូបគេក៏បានទៅដេកលេងនៅក្រោមផ្ទះអ្នកជិតខាងម្នាក់ដែលនៅជាប់គ្នានោះ គឺមិនបាននៅផ្ទះ ។ ពេលក្មួយប្រុសគាត់កំពុងដេកលេងនៅក្រោមផ្ទះអ្នកជិតខាងនោះ ស្រាប់តែឃើញមានផ្សែងខ្មៅហុយទ្រលោម និងអណ្តាតភ្លើងក្រហមច្រាលឆេះយ៉ាងសន្ធោសន្ធៅចេញពីផ្ទះតូចមួយធ្វើអំពីឈើប្រកស័ង្កសី ដែលមានចម្ងាយជាង១០ម៉ែត្រប៉ុណ្ណោះពីផ្ទះរបស់គាត់ ។ ភ្លាមនោះក្មួយប្រុសគាត់ក៏រត់ចូលទៅក្នុងផ្ទះយកបានតែទូរទស្សន៍១គ្រឿង និងឆ្នាំងបាយអគ្គិសនី១ប៉ុណ្ណោះ ក្រៅពីនេះត្រូវភ្លើងឆេះអស់រលីងតែម្តង។
លោក ពេជ្រ កែវមុនី អភិបាលខណ្ឌមានជ័យមានប្រសាសន៍ថា ករណីអគ្គិភ័យដែលតែងកើតមានឡើង គឺតែងតែដាក់បន្ទុកទៅលើបញ្ហាឆ្លងចរន្តអគ្គិសនី ។
ហើយអគ្គិភ័យខាងលើនេះបានប្រើប្រាស់រថយន្តពន្លត់អគ្គិភ័យរបស់ស្នងការដ្ឋាននគរបាលរាជធានីភ្នំពេញប្រើប្រាស់ទឹកបាញ់ពន្លត់អស់ចំនួន១៥រថយន្តផងដែរ និងមិនបង្កឲ្យមានប្រជាពលរដ្ឋណាម្នាក់រងគ្រោះថ្នាក់ឡើយ ។
ខាងក្រោមនេះគឺទិដ្ឋភាពវីដេអូ និងរូបភាពអគ្គិភ័យលេបត្របាក់ប្រជាពលរដ្ឋចំនួន៥០ខ្នង នៅសង្កាត់ស្ទឹងមានជ័យទី២ ៖
ចែករំលែកព័តមាននេះ