រាជធានីភ្នំពេញ ៖ ទូកុងតឺន័រ១ ក្នុងចំណោមទូកុងតឺន័រចាស់ៗជាច្រើនត្រូវបានអគ្គិភ័យដែលបានឆេះស្មៅ និងព្រៃនៅក្បែរទីតាំងនោះឆាបឆេះ បណ្តាលឲ្យរាលដល់ ហើយឆេះរងការខូចខាតទាំងស្រុង និងបង្កឲ្យមានការភ្ញាក់ផ្អើលដល់រថយន្តពន្លត់អគ្គិភ័យ២គ្រឿងទៅបាញ់ពន្លត់ទើបរលត់ទៅវិញទាំងស្រុង ។
ហេតុការណ៍នោះបានកើតឡើងកាលពីវេលាម៉ោង១១និង៤០នាទីថ្ងៃត្រង់ថ្ងៃទី១៥ ខែមីនា ឆ្នាំ២០១៩ នៅចំណុចទីតាំងឃ្លាំងស្តុកទូកុងតឺន័រចាស់ៗ ស្ថិតនៅក្នុងភូមិព្រៃធំ សង្កាត់ព្រៃស ខណ្ឌដង្កោ រាជធានីភ្នំពេញ ។
តាមប្រភពព័ត៌មានបានឲ្យដឹងថា នៅមុនពេលកើតហេតុមានជនមិនស្គាល់មុខបានលួចដុតស្មៅ និងព្រៃនៅក្បែរទីតាំងនោះបណ្ដាលឲ្យមានការឆាបឆេះយ៉ាងសន្ធោសន្ធៅ ។ ខណៈអ្នកភូមិបាននាំគ្នាពន្លត់ដែរ ប៉ុន្តែពន្លត់មិនឈ្នះឡើយភ្លើងបានឆេះរាលដល់ទីតាំងស្តុកទូកុងតឺន័រចាស់ៗខាងលើយ៉ាងឆាប់រហ័សបំផុត និងបានឆេះទូកុងតឺន័រ១ទាំងស្រុង ។ ខណៈនោះបង្កឲ្យមានការភ្ញាក់ផ្អើលយ៉ាងខ្លាំងហើយកម្លាំងសមត្ថកិច្ច និងអាជ្ញាធរខណ្ឌដង្កោបានចេញអន្តរាគមន៍ភ្លាមៗ ហើយក៏មានរថយន្តពន្លត់អគ្គិភ័យ២គ្រឿងចេញទៅបាញ់ពន្លត់ផងទើបភ្លើងរលត់ទៅវិញ ។
ប្រភពដដែលបានបន្តថា ទីតាំងនោះមានស្តុកទូកុងតឺន័រចាស់ៗជាច្រើន ដែលមិនដឹងថា ជាទីតាំងរបស់នរណានោះឡើយ ហើយនៅក្នុងទូកុងតឺន័រដែលត្រូវភ្លើងឆេះរងការខូចខាតទាំងស្រុងនោះមានស្តុកធុងស្នោក្លាស្សេរនៅក្នុងនោះជាច្រើនផងដែរ ។ ចំណែកឯនៅក្នុងទូកុងតឺន័រផ្សេងទៀតមានស្តុកអ្វីខ្លះដែរទេ ហើយប្រសិនបើពុំមានការអន្តរាគមន៍ទាន់ពេលទេនោះប្រាកដជាត្រូវភ្លើងឆេះដល់ទូផ្សេងៗទៀតមិនខានឡើយ ។
ទន្ទឹមនិងនេះអាជ្ញាធរបានអំពាវនាវដល់បងប្អូនប្រជាពលរដ្ឋមួយចំនួនសូមកុំរពឹសដៃដុតស្មៅ ឬព្រៃធ្វើអ្វី ព្រោះពេលនេះជារដូវរាំងស្ងួតងាយ និងមានការឆាបឆេះខ្លាំងណាស់ ដូច្នេះសូមចូលរួមក្នុងការប្រុងប្រយ័ត្នទាំងអស់គ្នាចៀសវាងមានគ្រោះមហន្តរាយកើតឡើង ៕
ចែករំលែកព័តមាននេះ