នៅពេលដែលសម្តេចតេជោ ហ៊ុន សែន សម្ពោធការចាប់ផ្តើមសាងសង់ផ្លូវល្បឿនលឿនលើកដំបូង ក្រោមការឧបត្ថមជំនួយពីប្រទេសចិន នៅថ្ងៃទី២២ មីនា វាគឺជាសញ្ញាមួយថា កម្ពុជានឹងចាប់ផ្តើមមានផ្លូវល្បឿន លឿនលើកដំបូង…
នៅពេលដែលសម្តេចតេជោ ហ៊ុន សែន សម្ពោធការចាប់ផ្តើមសាងសង់ផ្លូវល្បឿនលឿនលើកដំបូង ក្រោមការឧបត្ថមជំនួយពីប្រទេសចិន នៅថ្ងៃទី២២ មីនា វាគឺជាសញ្ញាមួយថា កម្ពុជានឹងចាប់ផ្តើមមានផ្លូវល្បឿន លឿនលើកដំបូង នៅក្នុងប្រវត្តិសាស្ត្ររបស់ខ្លួន ដែលនឹងធ្វើអោយមានភាពងាយស្រួលនៅក្នុងការធ្វើដំណើរ និងដឹកជញ្ជូនទៅមករវាងភ្នំពេញ និងខេត្តព្រះសីហនុ ។
នៅពេលផ្លូវនោះធ្វើរួច នៅក្នុងរយៈពេលបូនឆ្នាំក្រោយ វាត្រូវគេរំពឹងថា នឹងទាក់ទាញមនុស្សជាច្រើនអោយប្រើប្រាស់ផ្លូវនោះ ។ ដូច្នេះ ការធ្វើដំណើរតាមផ្លូវជាតិលេខ៤បច្ចុប្បន្ននឹងអាចមានការធ្លាក់ចុះ ។
ប៉ុន្តែទន្ទឹមជាមួយគ្នានោះ ផ្លូវល្បឿនលឿនរបស់ចិន និងផ្លូវជាតិលេខ៤ ដែលត្រូវសាងសងឡើង ដោយ លុយអាមេរិកនោះ ក៏អាចមានបង្កប់ន័យទំនាក់ទំនងការទូតរវាងប្រទេសកម្ពុជាជាមួយចិន និងកម្ពុជាជា
មួយអាមេរិកផងដែរ ។
ផ្លូវល្បឿនលឿននឹងក្លាយជានិមិត្តរូបដ៏ធំសម្បើមមួយនៃទំនាក់ទំនងរវាងកម្ពុជានិងចិន ដែលរីកធំធាត់ខ្លាំងជាងពេលណាៗទាំងអស់ នៅពេលបច្ចុប្បន្ននេះ ។ ជាមួយគ្នានោះ ការលេចឡើងនៃផ្លូវរបស់ចិនក៏នឹងធ្វើអោយផ្លូវជាតិលេខ៤ ដែលសាងសង់ដោយអាមេរិក កាន់តែឃ្លាតឆ្ងាយពីបេះដូងកម្ពុជា។ វាប្រាកដណាស់ថា មនុស្សម្នានឹងងាកមកប្រើផ្លូវល្បឿនលឿននោះ នៅពេលដែលវាត្រូវបានសាងសង់ហើយនៅរយៈពេលបួនឆ្នាំក្រោយ និងដាក់អោយប្រើប្រាស់ជាផ្លូវការ ។ នេះគឺដោយសារតែការធ្វើដំណើរលើផ្លូវល្បឿនលឿននោះនឹងធ្វើអោយប្រជាជនកម្ពុជាចំណេញទាំងថវិកា និងពេលវេលា ។
គេប៉ាន់ប្រមាណថា ការធ្វើដំណើរពីភ្នំពេញទៅកាន់ខេត្តព្រះសីហនុនឹងត្រូវកាត់បន្ថយពេលវេលាពី ប្រមាណបួនម៉ោង មកនៅត្រឹមពីរម៉ោង ឬពីរម៉ោងកន្លះប៉ុណ្ណោះ ។
ដូច្នេះ វាប្រាកដណាស់ថា ផ្លូវល្បឿនលឿននឹងដណ្តើមប្រជាប្រិយភាពពីផ្លូវជាតិលេខ បួនដែលត្រូវ
បានសាងសង់ឡើង ដោយលុយអាមេរិក ។ ផ្លូវជាតិលេខ៤ គឺជានិមិត្តរូបដ៏សំខាន់មួយនៃទំនាក់ទំនង
និង សហប្រតិបត្តិការរវាងកម្ពុជានិងអាមេរិក ។ ការលិចបាត់ប្រជាប្រិយភាពនៃផ្លូវជាតិលេខ៤នោះ ក៏ជា សញ្ញាដ៏ពិតប្រាកដមួយ ដែលឆ្លុះបញ្ចាំងអំពីទំនាក់ទំនងកាន់តែអាក្រក់រវាងកម្ពុជានិងអាមេរិក នៅក្នុង
រយៈពេលប៉ុន្មានឆ្នាំចុងក្រោយនេះ ដោយសារបញ្ហានយោបាយនៅក្នុងប្រទេសកម្ពុជា និងការលូកដៃជ្រៅដោយអាមេរិក។
ការប្រែប្រួលនយោបាយនៅកម្ពុជា ត្រូវបានអាមេរិកចាត់ទុកថា ជាការដើរថយក្រោយនៃលទ្ធិប្រជាធិប តេយ្យនៅកម្ពុជា ហើយតម្រូវអោយអាមេរិកទម្លាក់់ទំនាក់ទំនងរវាងប្រទេសទាំងពីរ និងដាក់ទណ្ឌកម្មមួយចំនួនប្រឆាំងកម្ពុជា ដូចជាការលុបចោលជំនួយជាដើម។
ប៉ុន្តែកម្ពុជាវិញ នៅតែការពារខ្លួនថា កម្ពុជានឹងនៅតែធ្វើដំណើរលើផ្លូវប្រជាធិបតេយ្យ ដូចដែលបានចែងនៅក្នុងរដ្ឋធម្មនុញ្ញប្រទេសកម្ពុជា ។ រដ្ឋាភិបាលកម្ពុជាអះអាងថា ហេតុការណ៍ទាំងឡាយ ដែលកើតមានចំពោះមេដឹកនាំនយោបាយប្រឆាំង និងសកម្មជនសិទ្ធិមនុស្ស គឺគ្រាន់តែជាទំនាស់ផ្នែកច្បាប់ ដែលត្រូវតែដោះស្រាយតាមផ្លូវតុលាការ ។
ទោះបីជាយ៉ាងណាក៏ដោយចុះ ទំនាក់ទំនងរវាងអាមេរិកនិងកម្ពុជាបានបន្តធ្លាក់ចុះ ខណៈពេលដែល ទំនាក់ទំនងរវាងកម្ពុជានិងចិន កាន់តែរីកធំធាត់។
និមិត្តរូបនៃការប្រែប្រួលទំនាក់ទំនងរវាងកម្ពុជាជាមួយអាមេរិក និងកម្ពុជាជាមួយចិន អាចនឹងយល់បានតាមរយៈផ្លូួវថ្នល់ ដែលភ្ជាប់ទីក្រុងភ្នំពេញ និងខេត្តព្រះសីហនុនោះ ៕
ចែករំលែកព័តមាននេះ