ខេត្តប៉ៃលិន ៖ តាមសេចក្តីរាយការណ៍បានឱ្យដឹងថា មានម៉ូតូ១គ្រឿងម៉ាកឌ្រីម ពណ៌ខ្មៅ ត្រូវបានបុរសមិនស្គាល់អត្តសញ្ញាណម្នាក់ជិះក្នុងល្បឿនលឿន លុះដល់ផ្លូវកោងរេចង្កូតធ្លាក់ចូលប្រឡាយអត់ទឹក រួចក៏រត់គេចខ្លួនចូលក្នុងព្រៃបាត់ បន្សល់ទុកតែម៉ូតូនៅកន្លែងកើតហេតុ ក្រោយមកម៉ូតូខាងលើ ត្រូវបានប្រជាពលរដ្ឋរាយការណ៍ជូនមេភូមិ និងនគរបាល ដើម្បីយកទៅរក្សាទុក ។
ហេតុការណ៍ខាងលើនេះបានកើតឡើងកាលពីវេលាម៉ោង១២និង៣០នាទីថ្ងៃត្រង់ ថ្ងៃទី១០ ខែមីនា ឆ្នាំ២០១៩ ស្ថិតនៅចំណុចផ្លូវលំ១កន្លែង ក្នុងភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ។
ប្រភពព័ត៌មានពីលោក វរសេនីយ៍ត្រី ស៊ិន តាំ អនុប្រធានមន្ទីរយុត្តិធម៌ ទទួលផែនព្រហ្មទណ្ឌ នៃបញ្ជាការដ្ឋានកងរាជអាវុធហត្ថខេត្តប៉ៃលិន បានឱ្យដឹងថា ម៉ូតូមួយគ្រឿងដែលបុរសម្នាក់មិនស្គាល់អត្តសញ្ញាណជិះធ្លាក់ប្រឡាយខាងលើ ម៉ាកហុងដាឌ្រីម ពណ៌ខ្មៅ តែមពណ៌លឿង ស៊េរីឆ្នាំ២០១៨ ពាក់ស្លាកលេខ ប៉ៃលិន ១C-៣១៦៨ មិនមានរងការខូចខាតអ្វីឡើយ ។
លោកវរសេនីយ៍ត្រីបានបន្តថា មុនពេលកើតហេតុ គេឃើញបុរសមិនស្គាល់អត្តសញ្ញាណម្នាក់បានជិះម៉ូតូមួយគ្រឿងក្នុងទិសដៅពីលិចទៅកើត បើកបរក្នុងល្បឿនយ៉ាងលឿន លុះដល់ផ្លូវកោងមានជង្ហុកក៏ជ្រុលចង្កូតធ្លាក់ទៅក្នុងប្រឡាយអត់ទឹក ពេលនោះជនសង្ស័យមិនបានលើកម៉ូតូដើម្បីជិះបន្តទៀតនោះទេ គឺទុកម៉ូតូចោល ហើយរត់គេចខ្លួនតាមប្រឡាយចូលទៅក្នុងព្រៃបាត់តែម្តង ។ បន្ទាប់ពីប្រទះឃើញម៉ូតូមួយគ្រឿងខាងលើរួចមក ប្រជាពលរដ្ឋបានរាយការណ៍ជូនសមត្ថកិច្ចដើម្បីចុះមកពិនិត្យកន្លែងកើតហេតុ និងយកម៉ូតូនោះទៅរក្សាទុក ។
លោកវរសេនីយ៍ត្រីក៏បានបន្តទៀតថា រហូតមកដល់ពេលនេះ ម៉ូតូមួយគ្រឿងខាងលើត្រូវបានរក្សាទុកនៅកន្លែងការិយាល័យរបស់លោក បើសិនជាបងប្អូនប្រជាពលរដ្ឋណាម្នាក់បានបាត់ម៉ូតូដែលមានស្លាកលេខដូចខាងលើ សូមមកទាក់ទងទៅនៅទីបញ្ជាការដ្ឋានកងរាជអាវុធហត្ថខេត្តប៉ៃលិន ហើយលោកនឹងប្រគល់ជូនវិញផងដែរ ៕
ចែករំលែកព័តមាននេះ