ខេត្តព្រៃវែង ៖ រឿងរ៉ាវរោងការដូរកូនក្រមុំ តាមប្រភពព័ត៌មានពីឪពុកកូនកំលោះបានបញ្ជាក់ថា ក្រោយពីកូនក្រមុំម្នាក់បដិសេធមិនចូលរោងការតាមកាលកំណត់នៅថ្ងៃទី១១ មីនាខាងមុខ ក្រុមគ្រួសារទាំងសងខាង ក៏បានសំរេចផ្តាច់ចំណងអាពាហ៍ពិពាហ៍វិញ ប៉ុន្តែដោយហេតុថា ពិធីមង្គលការមិនលប់ចោលនោះទេ ព្រោះបានជួលភ្លេង ភ្នួង រោងការ និងអញ្ជើញភ្ញៀវរួចហើយ ទើបឪពុកកូនកំលោះក៏បានលួងលោមកូនប្រុសអោយរៀបការជាមួយប្អូនជីដូនមួយម្នាក់ទៀតឈ្មោះភួង គន្ធា អាយុ២១ឆ្នាំ ដែលត្រូវជាក្មួយបង្កើតរបស់ម្តាយកូនកំលោះ ហើយម្តាយកូនកំលោះក៏និយាយលួងលោមក្មួយស្រីឈ្មោះ ភួង គន្ធា អោយចូលរោងការជាមួយកូនកំលោះផងដែរ។ គួររំលឹកថា ៖ កូនក្រមុំរត់ចោលរោងការ ទីបំផុតនាងទៅសង្ងំលាក់ខ្លួននៅវិទ្យុមួយកន្លែង
ឪពុកកូនកំលោះបានបញ្ជាក់ថា មុនដំបូង សាម៉ីខ្លួនទាំង២ហាក់ទ្រឹងមិនតបស្តី ទំនងជាស្រឡាំងកាំងនឹងរឿងរ៉ាវដែលមិននឹកស្មានដល់ ប៉ុន្តែដោយមានការលួងលោមពន្យល់ហេតុផលពីចាស់ទុំទាំងសងខាង ប្រមាណជា៥ម៉ោងក្រោយមក អ្នកទាំង២ក៏យល់ព្រមចូលរោងការដោយពុំមានលក្ខខណ្ឌ គឺស្ម័គ្រចិត្តរៀបការដោយចិត្តនឹងចិត្ត។
គួរបញ្ជាក់ផងដែរថា កូនក្រមុំដែលរត់ចោលពិធី គឺជាក្មួយស្រីរបស់ឪពុកកូនកំលោះ ចំណែកកូនក្រមុំដែលស្ម័គ្រចិត្តចូលរោងការជំនួសគឺជាក្មួយស្រីរបស់ម្តាយកូនកំលោះ។
ពិធីមង្គលការនឹងប្រព្រឹត្តទៅនៅថ្ងៃទី១១ មីនាខាងមុខ នៅភូមិកោះរកា ឃុំកោះរកា ស្រុកពាមជរ ខេត្តព្រៃវែង ៕
ចែករំលែកព័តមាននេះ