ខេត្តរតនគីរី ៖ សត្វគោចំនួន៣ក្បាលបានងាប់ភ្លាមៗក្រោយពីផឹកទឹកថ្នាំបាញ់ស្មៅក្នុងចំការដំឡូងមីរបស់អ្នកភូមិ ។ ហេតុការណ៍នេះបានកើតឡើងកាលពីវេលាម៉ោង៦និង៣០នាទីល្ងាច ថ្ងៃទី៤ ខែមីនា ឆ្នាំ២០១៩ ស្ថិតនៅចំណុចក្នុងចំការដំឡូងមីរបស់លោកយី ម៉េងហូត ក្នុងភូមិការណាងកិត ឃុំការឡែង ស្រុកលំផាត់
ម្ចាស់គោឈ្មោះណយ រ៉ន ភេទប្រុស អាយុ៤៤ឆ្នាំ ជនជាតិដើមភាគតិចទំពួន មុខរបកសិក រស់នៅភូមិឃុំកើតហេតុខាងលើ ។
បើតាមរបាយការណ៍របស់សមត្ថកិច្ចប៉ូលិសស្រុកលំផាត់បានអោយដឹងថា ម្ចាស់គោបានរៀបរាប់ថា សត្វគោរបស់គាត់មានជិត១០ក្បាល ហើយបានលែងអោយដើរស៊ីស្មៅពាសវាលពាសកាល មិនដែលចាប់ចងម្ដងណាទេ ហើយមូលហេតុដែលសត្វគោចំនួន៣ក្បាលបានងាប់នោះ ព្រោះចូលផឹកទឹកថ្នាំបាញ់ស្មៅដែលម្ចាស់ចំការដំឡូងមីលាយទឹករួចទុកបាញ់ស្មៅក្នុងចំការ។
ក្រោយពេលកើតហេតុ សមត្ថកិច្ចប៉ូលិសបានធ្វើការត្រួតពិនិត្យសត្វគោទាំង៣ក្បាលដែលងាប់នោះ ជាលទ្ធផលរកឃើញថា សត្វគោទាំង៣ក្បាលនោះពិតជាងាប់ដោយសារផឹកទឹកបាញ់ស្មៅប្រាកដមែន គ្មានរឿងចោរកម្មកើតឡើងនោះទេ ។
ដោយឡែកម្ចាស់ចំការដំឡូងមីគ្មានសងសំណងអ្វីទៅម្ចាស់គោនោះទេ ព្រោះម្ចាស់លែងគោអោយដើរស៊ីស្មៅយ៉ាងអនាធិបតេយ្យគ្មានការប្រុងប្រយត្ន័ ៕
ចែករំលែកព័តមាននេះ