ខេត្តប៉ៃលិន ៖ រហូតមកដល់ដើមខែមីនា ឆ្នាំ២០១៩នេះផ្ទៃមេឃនៅតែមិនទាន់មានភ្លៀងធ្លាក់ រីឯអាកាសធាតុវិញបានបញ្ចេញកំដៅក្តៅខ្លាំងស្ទើរតែរលាកស្បែកមនុស្ស។ ដូច្នេះហើយទើបប្រជាពលរដ្ឋរស់នៅក្នុងក្រុងប៉ៃលិនជាច្រើននាក់មិនទាន់មានអ្នកហ៊ានដាំដំឡូងមីឡើយ ។
ប្រជាពលរដ្ឋជាច្រើនបានលើកឡើងថា នៅដើមឆ្នាំថ្មីនេះអត់សូវមានភ្លៀងធ្លាក់ជោកជាំដូចឆ្នាំមុននោះទេ ជាហេតុធ្វើឱ្យអ្នកខ្លះភ្ជួរដីហាលចោល និងកាប់ដើមដំឡូងមីយកទៅគរទុករង់ចាំទឹកភ្លៀងនៅក្នុងចម្ការរបស់ខ្លួនតែម្តង ។ ពួកគាត់បន្តទៀតថា ចំណែកអ្នកដែលទើបនឹងដាំថ្មីៗកន្លងទៅដុះលូតលាស់បានល្អហើយ តែដោយសាររាំងភ្លៀងយូរក៏ស្វិតស្រពោនចង់ងាប់ទៅវិញផងដែរ ។
ប្រជាពលរដ្ឋមួយចំនួនទៀតមិនទាន់ហ៊ានដកមើមដំឡូងមីលក់នៅឡើយទេ ព្រោះខ្លាចរាំងភ្លៀងយូរ បណ្តាលឱ្យងាប់ដើមអស់លំបាករកទិញយកមកដាំ ដូច្នេះហើយពួកគាត់ក៏រង់ចាំមើលបន្តិចសិន បើមានភ្លៀងធ្លាក់ជាបណ្តើរៗពួកគាត់នឹងធ្វើការដកលក់ រួចភ្ជួរដីដាំដើមថ្មីជាបន្តបន្ទាប់ ។
ចំណែកកសិករម្នាក់ឈ្មោះ សុខ សាន្ត អាយុ៥០ឆ្នាំ រស់នៅក្នុងភូមិទឹកផុស សង្កាត់ប៉ៃលិន ក្រុ ងប៉ៃលិនបានឱ្យដឹងថា គាត់មានដីចម្ការនៅក្បែរមាត់អូរមានទឹកក៏ដាក់ទុយោបូមទឹកស្រោចជា រឿយៗធ្វើឱ្យដំឡូងមីដែលដាំបានប្រហែល១ហិកតាបានដុះលូតលាស់យ៉ាងខៀវខ្ចីតែម្តង ហើយគាត់សង្ឃឹមថា ទោះបីជាអាកាសធាតុក្តៅខ្លាំងបែបនេះក៏មិនមានផលប៉ះពាល់អ្វីដល់ដំឡូងមីរបស់ខ្លួននោះឡើយ ហើយអាចនឹងទទួលបានមើមល្អនៅថ្ងៃខាងមុខ ។
ដូច្នេះគាត់តែងតែដើរបោចស្មៅដាក់ជីបន្ថែមទៀត ដើម្បីបំប៉នដើមដំឡូងមីរបស់ខ្លួនឱ្យកាន់តែល្អ ។ តែត្រូវចំណាយដើមទុនអស់ច្រើន ព្រោះទិញទុយោរាប់រយម៉ែត្រអស់លុយជាច្រើន ហើយលើសពីនេះគាត់ក៏មានការខ្វល់ខ្វាយក្នុងចិត្តដែរ ព្រោះទឹកអូរពេលនេះកាន់តែរាក់ទៅៗ បើរាំងយូរបន្តិចទៀត អាចនឹងរីងខះអស់មិនដឹងបានទឹកឯណាបូមស្រោចដំឡូងមីរបស់ខ្លួននោះទេ ។
សូមបញ្ជាក់ផងដែរថា ដោយសារតែអាកាសធាតុក្តៅខ្លាំង ហើយរាំងភ្លៀងរយៈពេលយូរបណ្តា លឱ្យទឹកបឹងបួរ ស្រះប្រឡាយ អូរ និងស្ទឹងមួយចំនួននៅក្នុងស្រុកសាលាក្រៅ បានរីងខះស្ទើរអស់រលីងទៅហើយធ្វើឱ្យប្រជាពលរដ្ឋមានការលំបាកក្នុងការរកទឹកប្រើប្រាស់ផងដែរ៕
ចែករំលែកព័តមាននេះ