ខេត្តក្រចេះ ៖ តំបន់ដីព្រៃដែលសម្បូរទៅដោយធនធានធម្មជាតិរ៉ែមាសនៅចំណុចភូមិត្រួន ឃុំក្បាលដំរី ស្រុកសំបូរ កំពុងតែប្រឈមនឹងការវិនាសហិនហោចទាំងព្រៃឈើ និងរ៉ែមាស ខណៈតំបន់នោះកំពុងត្រូវបានក្រុមឈ្មួញវាទយកដីព្រៃ និងជីកកកាយលុងដីស្វែងរករ៉ែមាសក្នុងជម្រៅដ៏ជ្រៅ ដោយប្រើប្រាស់រូបភាពជាក្រុមហ៊ុនមានអាជ្ញាប័ណ្ណ និងការជីករ៉ែតាមបែបអនាធិបតេយ្យដោយសារគ្មានការគ្រប់គ្រងពីស្ថាប័នជំនាញ និងក្រុមសមត្ថកិច្ច ពិសេសអាជ្ញាធរស្រុកតែម្ដង ។
លើចម្ងាយផ្លូវលំជាង៣០គីឡូម៉ែត្រពីកំណាត់ផ្លូវជាតិលេខ៧ ចូលទៅកាន់តំបន់ទួលជ័យ ក្នុងភូមិត្រូន ឃុំក្បាលដំរី ស្រុកសំបូរ ប្រជាពលរដ្ឋ និងអាជ្ញាធរបានចាត់ទុកថា តំបន់នោះជាតំបន់រុករករ៉ែមាសបែបអនាធិបតេយ្យរបស់ពលរដ្ឋដែលធ្វើជាលក្ខណៈគ្រួសារកើតមានរយៈពេលរាប់សិបឆ្នាំមកហើយ ។
ប៉ុន្តែអ្វីដែលជាការចាប់អារម្មណ៍គឺប្រជាពលរដ្ឋនៅតំបន់នោះបានសម្ដែងនូវការព្រួយបារម្ភថា រ៉ែមាសនៅក្រោមដីដ៏ជ្រៅគឺអាចប្រឈមមុខទៅនឹងការវិនាសហិនហោចនាពេលខាងមុខ ខណៈដែលតំបន់នោះសព្វថ្ងៃត្រូវបានក្រុមឈ្មួញមួួយចំនួនបានមកបោះទីតាំងដោយប្រើប្រាស់គ្រឿងម៉ាសីុនទំនើបៗសម្រាប់ជីកខួង បូម កិនរ៉ែងដីយករ៉ែចេញពីរណ្ដៅដីមានជម្រៅរាប់សិបម៉ែត្រនៅក្រោមដី ។
ពលរដ្ឋដែលមានរបរធ្វើរ៉ែមាសនៅតំបន់នោះបាននិយាយថា ប្រសិនបើត្រឹមការធ្វើអាជីវកម្មដោយដៃដែលធ្វើឡើងពីសំណាក់ពួកគាត់ជាលក្ខណៈគ្រួសារនេះ គឺធនធានធម្មជាតិរ៉ែមាសទាំងនេះមិនអស់ទៅណាទេ តែប្រសិនបើការជីកលុងកាយដីយករ៉ែពីសំណាក់ឈ្មួញដូចកំពុងតែធ្វើសកម្មភាពសព្វថ្ងៃ ដោយប្រើគ្រឿងចក្រ ម៉ាសីុនគ្រឿងយន្តទំនើបៗ និងមានប្រើប្រាស់កម្មកររាប់សិបនាក់គឺរ៉ែមាសទាំងនេះអាចប្រឈមនឹងការវិនាសនាពេលដ៏ខ្លីខាងមុខនេះមិនខាន ។
តាមប្រភពព័ត៌មានពីតំបន់នោះបានឱ្យដឹងថាសព្វថ្ងៃគឺមានកម្មករវៀតណាមរាប់សិបនាក់កំពុងតែធ្វើសកម្មភាពជីកលុងកាយដីក្នុងជម្រៅរាប់សិបម៉ែត្រ ដើម្បីបូមយកដីរ៉ែមាសចេញពីក្រោមដីមកបំលែងនៅខាងក្រៅដោយប្រើប្រាស់សារធាតុគីមីដ៏គ្រោះថ្នាក់ ។ ប្រភពបានប្រាប់ថា សកម្មភាពនៃការជីកនោះគឺបានធ្វើឡើងជាទ្រង់ទ្រាយធំ ហើយក្រុមឈ្មួញទាំងនោះអះអាងថា ជាក្រុមហ៊ុនស្រាវជ្រាវរុករករ៉ែ ។
ប្រភពព័ត៌មានបានឱ្យដឹងទៀតថា នៅក្នុងសកម្មភាពនៃការជីកលុងដីជារណ្ដៅ ដើម្បីយកដីរ៉ែនោះគឺពួកគេបានបំផ្ទុះថ្មធំៗ ដើម្បីជីកលុងចុះទៅក្រោមដី ។ សកម្មភាពនៃការធ្វើអាជីវកម្មមួយនេះ ពលរដ្ឋជាច្រើនគ្រួសារបានសម្ដែងនូវការខឹងសម្បាពីការបំផ្ទុះថ្មលុងដីរបស់ក្រុមអ្នកធ្វើអាជីវកម្មទាំងនោះ ដោយពួកគាត់បាននិយាយថា ពេលបំផ្ទុះម្ដងៗគឺរញ្ជួយកក្រើកផ្ទះរបស់ពួកគាត់រកដេកពួនមិនបាន ដូចយន្តហោះទម្លាក់គ្រាប់បែក ខណៈដែលការបំផ្ទុះរបស់ពួកគេគឺបានធ្វើឡើងទាំងយប់ទាំងថ្ងៃ សូម្បីតែសត្វគោ ក្របី ក៏ប្រឈមនឹងជំងឺឈឺងាប់នៅពេលទៅផឹកទឹកអូរដែលបង្ហូរចេញពីទីតាំងរែងមាសទាំងនេះផងដែរ ។
អ្នកស្រុកដែលធ្លាប់តែទៅប្រកបរបរជីកមាសនៅតំបន់នោះបាននិយាយថា សព្វថ្ងៃពួកគាត់មិនអាចទៅជីកមាសដោយដៃនៅតំបន់នោះទៀតបានទេ ដោយសារទីតាំងនោះត្រូវបានកាន់កាប់ដោយក្រុមឈ្មួញធំៗនិងមានការយាមកាមយ៉ាងតឹងរឹងពីយោធាមួួយក្ដាប់តូច ។ ក្នុងនោះគេស្គាល់ថា មានយោធាម្នាក់លេចមុខជាងគឺឈ្មោះទុយ ទើយ ជាយោធាវរសេនាតូចលេខ២នៃទីបញ្ជាការតំបន់ប្រតិបត្តិការសឹករងខេត្តក្រចេះ និងអ្នកមានអំណាចមួយចំនួនទៀតនៅពីក្រោយខ្នង ក្នុងនោះមានយោធាថ្នាក់ផ្កាយ២ម្នាក់ឈ្មោះ សាគីម ។
អភិបាលស្រុកសំបូរ លោក ហេង ស៊ីថា បានមានប្រសាសន៍ថា កន្លងមកតំបន់នោះគឺគេចាត់ទុកថាជាតំបន់ឧបសម្ព័ន្ធរ៉ែមាសបណ្តាលមកពីការធ្វើអាជីវកម្មរបស់ពលរដ្ឋជាលក្ខណៈគ្រួសារមានរយៈពេលរាប់ឆ្នាំមកហើយ ។ កន្លងមកអាជ្ញាធរក៏បានចុះទៅធ្វើសេចក្តីជូនដំណឹងដល់ពួកគាត់ឲ្យបញ្ឈប់ការធ្វើអាជីវកម្មនេះដែរ ។ លោកនិយាយថា លោកពុំទាន់ទទួលបានព័ត៌មានណាមួយអំពីការធ្វើរ៉ែខុសច្បាប់នៅតំបន់នោះជាលក្ខណៈទ្រង់ទ្រាយធំនោះទេ ។ លោកអភិបាលស្រុកបានបញ្ជាក់ថា លោកនឹងចុះទៅស្រាវជ្រាវពិនិត្យមើលលើទីតាំងនៅចំណុចនោះ ហើយនឹងមានវិធានការ ប្រសិនបើមានការជីករ៉ែអនាធិបតេយ្យបែបនេះ ។
មិនអាចសុំការបំភ្លឺបានទេ កាលពីព្រឹកថ្ងៃទី១៣ កញ្ញា ពីសំណាក់លោកសុខ គិរីរ័ត្ន ប្រធានមន្ទីរឧស្សាហកម្មរ៉ែ និងថាមពលខេត្ត ដោយលោកជាប់រវល់ប្រជុំមិនអាចអត្ថាធិប្បាយបាន ។ ដោយឡែកបើតាមការអះអាងរបស់មន្រ្តីម្នាក់នៃមន្ទីរឧស្សាហកម្មរ៉ែ និងថាមពលខេត្តបានឲ្យដឹងថា ទីតាំងរ៉ែទាំងនោះជាកម្មសិទ្ធិរបស់ក្រុមហ៊ុនវៀតណាម និងចិនដែលមានច្បាប់លើការចុះស្រាវជ្រាវរុករករ៉ែ តែមិនត្រូវបានគេដឹងពីអត្តសញ្ញាណក្រុមហ៊ុននោះទេ ។ ឆ្លងតាមព័ត៌មានខាងលើនេះ បច្ចុប្បន្នកំពុងទទួលរងមហន្តរាយស្ទើរតែហិនហោចទៅហើយ ៕
ចែករំលែកព័តមាននេះ