រាជធានីភ្នំពេញ ៖ សមាជិកក្រុមប្រឹក្សារដ្ឋ និងជារដ្ឋមន្ត្រីក្រសួងការពារជាតិចិនបានទទួលស្វាគមន៍យ៉ាងកក់ក្តៅចំពោះមេបញ្ជាការកងទ័ពជើងគោកកម្ពុជា និងគណៈប្រតិភូក្រោយពីបានជួបសំដែងការគួរសមជាមួយឯកឧត្តម ហ្ស៊ូ គីលៀង (XU QI LIANG)…
រាជធានីភ្នំពេញ ៖ សមាជិកក្រុមប្រឹក្សារដ្ឋ និងជារដ្ឋមន្ត្រីក្រសួងការពារជាតិចិនបានទទួលស្វាគមន៍យ៉ាងកក់ក្តៅចំពោះមេបញ្ជាការកងទ័ពជើងគោកកម្ពុជា និងគណៈប្រតិភូក្រោយពីបានជួបសំដែងការគួរសមជាមួយឯកឧត្តម ហ្ស៊ូ គីលៀង (XU QI LIANG) អនុប្រធានគណៈកម្មការយោធាមជ្ឈិមនៃសាធារណៈរដ្ឋប្រជាមានិតចិន នៅរដ្ឋធានីប៉េកាំងរួចមកឧត្តមសេនីយឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក បានដឹកនាំគណៈប្រតិភូចូលជួបសំដែងការគួរសមជាមួយលោកនាយឧត្តមសេនីយ វេ ហ្វេង ហ៊ី (WEI FENG HE) សមាជិកក្រុមប្រឹក្សារដ្ឋ និងជារដ្ឋមន្ត្រីក្រសួងការពារជាតិនៃសាធារណៈរដ្ឋប្រជាមានិតចិន ។
លោកនាយឧត្តមសេនីយ វេ ហ្វេង ហ៊ី (WEI FENG HE) សមាជិកក្រុមប្រឹក្សារដ្ឋ និងជារដ្ឋមន្ត្រីក្រសួងការពារជាតិចិនបានមានប្រសាសន៍ថា ឯកឧត្តមមានចិត្តសប្បាយរីករាយដែលបានទទួលស្វាគមន៍ឯកឧត្តមអគ្គមេបញ្ជាការរងនៃកងយោធពលខេមរភូមិន្ទមេបញ្ជាការកងទ័ពជើងគោកនៅរដ្ឋធានីប៉េងកាំង ។ ឯកឧត្តមបានបន្តថា ទំនាក់ទំនងចិន-កម្ពុជា នាពេលនេះ ឈានដល់ចំនុចកំពូល និងល្អណាស់ជាងពេលណាៗទាំងអស់ ជាពិសេសក្រោមការដឹកនាំរបស់ឯកឧត្តមប្រធានាធិបតី ស៊ី ជីនពីង និងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ។
ឯកឧត្តមបានបញ្ជាក់ថា ប្រទេសចិនគាំទ្រយ៉ាងពេញទំហឹងនូវការដឹកនាំរបស់សម្តេចតេជោ ក្នុងការរក្សាសន្តិភាព ស្ថិរភាព និងការអភិវឌ្ឍប្រទេស ដើម្បីប្រជាជនកម្ពុជា ។ ឧត្តមសេនីយឯក ហ៊ុន ម៉ាណែត បានថ្លែងអំណរគុណយ៉ាងជ្រាលជ្រៅចំពោះឯកឧត្តមនាយឧត្តមសេនីយ វេ ហ្វេង ហ៊ី (WEI FENG HE) សមាជិកក្រុមប្រឹក្សារដ្ឋ និងជារដ្ឋមន្ត្រីក្រសួងការពារជាតិចិនដែលបានទទួលស្វាគមន៍យ៉ាងកក់ក្តៅ ចំពោះគណៈប្រតិភូកងទ័ពជើងគោកកម្ពុជា និងបានថ្លែងអំណរគុណយ៉ាងជ្រាលជ្រៅ ចំពោះរដ្ឋាភិបាលកងទ័ព និងប្រជាជនចិនដែលតែងតែគាំទ្រ និងជួយដល់ប្រទេសកម្ពុជាក្នុងការអភិវឌ្ឍទាំងធនធានមនុស្ស និងហេដ្ឋារចនាសម្ព័ន្ធ ។
លោកឧត្តមសេនីយឯកបានបន្តថា ប្រទេសទាំងពីរបន្តពង្រឹងពង្រីកមិត្តភាព និងកិច្ចសហប្រតិបត្តិការលើគ្រប់វិស័យនិយាយជារួម និងនិយាយដោយឡែកកងទ័ពប្រទេសទាំងពីរកម្ពុជា-ចិន នឹងបន្តរឹតចំណងមិត្តភាព និងកិច្ចសហប្រតិបត្តិការគ្រប់ជ្រុងជ្រោយ ។ លោកឧត្តមសេនីយឯកបានស្នើសុំឲ្យភាគីចិនបន្តគាំទ្រ និងជួយដល់ប្រទេសកម្ពុជា ជាពិសេសក្នុងការពង្រឹងសមត្ថភាពកងយោពលខេមរភូមិន្ទ ។
សូមបញ្ជាក់ថា តបតាមការអញ្ជើញរបស់ក្រសួងការពារជាតិនៃសាធារណរដ្ឋប្រជាមានិតចិន និងដើម្បីពង្រឹងពង្រីកកិច្ចសហប្រតិបត្តិការឲ្យកាន់តែរឹងមាំរវាងកងទ័ពប្រជាជននៃប្រទេសទាំងពីរកម្ពុជា-ចិន ឧត្តមសេនីយឯកហ៊ុន ម៉ាណែត បានដឹកនាំគណៈប្រតិភូជាន់ខ្ពស់កងទ័ពជើងគោកនៃកងយោធពលខេមរភូមិន្ទបំពេញដំណើរទស្សនកិច្ចផ្លូវការ នៅសាធារណរដ្ឋប្រជាមានិតចិនរយៈពេល៥ថ្ងៃ ចាប់ពីថ្ងៃទី២៥ ខែកុម្ភៈដល់ថ្ងៃទី១ ខែមិនា ឆ្នាំ២០១៩ ។ នេះ គឺជាជំនួបផ្លូវការទី៣ របស់គណៈប្រតិភូកងទ័ពជើងគោកកម្ពុជា ដែលដឹកនាំដោយឧត្តមសេនីយឯកហ៊ុន ម៉ាណែត បន្ទាប់ពីបានពិភាក្សាការងារជាមួយនាយឧត្តមសេនីយ HAN WEIGUO មេបញ្ជាកាកងទ័ពជើងគោកនៃកងទ័ពរំដោះប្រជាជនចិន និងការជួបសំដែងការគួរសមជាមួយឯកឧត្តម XU QI LIANG អនុប្រធានគណៈកម្មការយោធាមជ្ឈិមនៃសាធារណៈរដ្ឋប្រជាមានិតចិន ៕
ចែករំលែកព័តមាននេះ