រាជធានីភ្នំពេញ ៖ អាជ្ញាធររាជធានីភ្នំពេញ ដឹកនាំដោយលោកឃួង ស្រេង ជាអភិបាល នៅព្រឹកថ្ងៃទី២៧ កុម្ភៈ បានធ្វើការកោះអញ្ជើញអាជ្ញាធរខណ្ឌទាំង១២ សមត្ថកិច្ចពាក់ព័ន្ធ…
រាជធានីភ្នំពេញ ៖ អាជ្ញាធររាជធានីភ្នំពេញ ដឹកនាំដោយលោកឃួង ស្រេង ជាអភិបាល នៅព្រឹកថ្ងៃទី២៧ កុម្ភៈ បានធ្វើការកោះអញ្ជើញអាជ្ញាធរខណ្ឌទាំង១២ សមត្ថកិច្ចពាក់ព័ន្ធ និងក្រុមហ៊ុនក្រឡុកស៊ីម៉ង់ នៅក្នុងរាជធានីភ្នំពេញទាំងអស់ ប្រជុំដើម្បីណែនាំពីការងារមួយចំនួន ក្នុងការហាមរថយន្តធំៗចេញ-ចូល ក្នុងរាជធានីភ្នំពេញ ខណៈកំពុងប្រឈមនឹងការកកស្ទះចរាចរណ៍ជារៀងរាល់ថ្ងៃនេះ ។
លោកឃួង ស្រេង បានលេីកឡេីងថា ចំពោះរថយន្តធុនធំដឹកទំនិញគ្រប់ប្រភេទ គឺចាប់ពីថ្ងៃនេះតទៅ (២៧ កុម្ភៈ) គឺមិនមានការអនុញ្ញាតឱ្យចេញ-ចូលរាជធានីភ្នំពេញនៅពេលថ្ងៃជាដាច់ខាត ចាប់ពីម៉ោង៦ព្រឹក រហូតដល់ម៉ោង៩យប់ ។ ដោយឡែក សម្រាប់រថយន្តក្រឡុកស៊ីម៉ង់ត៍ ដែលត្រូវបំពេញការងាររបស់ខ្លួនស្របពេលដែលវិស័យសំណង់នៅក្នុងរាជធានីភ្នំពេញ មានការអភិវឌ្ឍរីកចំរើន គឺរថយន្តប្រភេទនេះអាចអនុញ្ញាតឱ្យចេញ-ចូលក្នុងក្រុងបាននៅអំឡុងពេលថ្ងៃ ដោយកំណត់ពេលវេលាច្បាស់លាស់ ។
លោកឃួង ស្រេង បានធ្វើការណែនាំថា ចំពោះរថយន្តក្រឡុកស៊ីម៉ង់ អាចធ្វើចរាចរណ៍បានគឺនៅម៉ោង៩ព្រឹក ប៉ុន្តែត្រូវផ្អាកនៅក្នុងម៉ោងដែលកម្មករ បុគ្គលិក សិស្សានុសិស្សចេញពីសាលារៀន និងចេញពីបំពេញការងារ គឺនៅម៉ោង១១ព្រឹក ម៉ោង២រសៀល និងម៉ោង៥ល្ងាច ត្រូវផ្អាកការធ្វើចរាចរណ៍ភ្លាម ។
លោកពន្យល់ថា ពាក់ព័ន្ធរថយន្តក្រឡុកស៊ីម៉ង់ត៍មិនឱ្យចូលក្នុងរាជធានីនៅពេលថ្ងៃ រដ្ឋបាលរាជធានីភ្នំពេញ អាចឃាត់មិនឲ្យចូលក្នុងរាជធានីភ្នំពេញបាន ប៉ុន្តែសំណួរសួរថា «តើការធ្វើសកម្មភាពក្រឡុកស៊ីម៉ង់សាងសង់សំណង់ក្តុងក្តាំងរំខានដល់ប្រជាពលរដ្ឋពេលយប់ ធ្វើឱ្យពលរដ្ឋដេកមិនបាននោះ ពួកគាត់ច្បាស់ជាមិនសុខចិត្តទេ ហើយនឹងធ្វើការថ្កោលទោសអាជ្ញាធររាជធានីភ្នំពេញ និងក្រុមហ៊ុនសំណង់ក្រឡុកស៊ីម៉ង់ត៍ជាក់ជាមិនខានឡើយ ។ ដូច្នេះទេ យើងដាច់ខាត ត្រូវតែមានជម្រើសមួយឱ្យបានច្បាស់លាស់នោះ គឺការកំណត់ពេលវេលា និងម៉ោងច្បាស់លាស់ដើម្បីឲ្យរថយន្តក្រឡុកស៊ីម៉ង់ត៍អាចចេញ-ចូលតាមពីម៉ោងកំណត់ដូចខាងលើនេះ ។
លោកឃួង ស្រេង បានជំរុញ និងណែនាំឲ្យម្ចាស់ក្រុមហ៊ុនក្រឡុកស៊ីម៉ង់ត៍ទាំងអស់ ត្រូវតាមដាននិងត្រួតពិនិត្យទៅលើអ្នកបើកបររថយន្តក្រឡុកស៊ីម៉ង់ទាំងអស់ ។ ចៀសវាងឱ្យបាននូវការប្រើប្រាស់គ្រឿងញៀន យើងត្រូវរួមគ្នាឲ្យរាជធានីភ្នំពេញរបស់យើងមានសណ្ដាប់ធ្នាប់ល្អប្រសើរ ។ ប៉ុន្តែទោះបីជាយ៉ាងណាក្តីចំពោះរថយន្តដឹកទំនិញធុនធំគ្រប់ប្រភេទ គឺមិនអនុញ្ញាតអោយចេញ-ចូលរាជធានីភ្នំពេញជាដាច់ខាត ចាប់ពីម៉ោង៦ព្រឹក រហូតដល់ម៉ោង៩យប់ ។
ដូច្នេះ អាជ្ញាធរនឹងមានសមត្ថកិច្ចតាមគោលដៅទាំងអស់ គឺត្រូវពិនិត្យចំពោះការចេញចូលរថយន្តធំយ៉ាងនេះ តែបើមានបញ្ហារថយន្តធំធ្លាយចូលក្រុងតាមគោលដៅណានោះ គោលដៅនោះ គឺជាអ្នកទទួលខុសត្រូវចំពោះរដ្ឋរដ្ឋបាលរាជធានី ។
ចែករំលែកព័តមាននេះ