រឿងមួយដែលមនុស្សយើងទិញមិនបាន គឺពេលវេលា បើជីវិតយើងបែងចែកបានថា ទៅធ្វើអ្វីដែលចង់ធ្វើគឺនឹងល្អ ព្រោះពេលខ្លះ យើងខ្លួនឯងក៏សោកស្តាយដែរ ដែលមិនបានធ្វើអ្វីមួយ ព្រោះពេលវេលាមិនអំណោយផល ។
តើឱកាសល្អៗរកបាននៅទីណា ? យើងតែងគិតថា បុគ្គលជោគជ័យ អ្នកមានទ្រព្យសម្បត្តិតែងមានឱកាសល្អៗចូលមកជានិច្ច ប៉ុន្តែសម្រាប់យើងវិញមិនធ្លាប់ឃើញឱកាសមកសោះ។ តើធ្វើដូចម្តេចដើម្បីឲ្យយើងបានជួបឱកាសដោយងាយៗបែបនេះ ? ចូរសាកល្បងរៀនចាប់យកឱកាសពីវិធីងាយៗទាំងនេះ ៖
១-កុំរង់ចាំរហូតមានអ្វីល្អៗ ទើបចាប់ផ្ដើម ៖ តើធ្លាប់ទេ នៅពេលមានអ្វីថ្មីៗចូលមក យើងតែងនិយាយថា រង់ចាំឲ្យមានអ្វីល្អៗជាមុនសិន។ បុគ្គលជោគជ័យភាគច្រើន ជារឿយៗតែងទទួលជោគជ័យ ដោយសារពួកគេមិនរង់ចាំឲ្យអ្វីៗល្អកើតឡើងសិនទេ គឺបុគ្គលបរាជ័យទៅវិញទេដែលរង់ចាំបែបនេះនោះ ។
នេះជាចំណុចចាប់ផ្តើមសម្រាប់អ្នកដែលត្រូវការបង្កើតឱកាសដោយខ្លួនឯង កុំរង់ចាំ គឺអនុវត្តវាតែម្តង ទោះបីជាវានឹងភ្លាត់ក៏ដោយ ។
២-បើកចិត្តឲ្យទូលាយ ៖ មនុស្សគ្រប់គ្នាចង់ទទួលបានជោគជ័យ ប៉ុន្តែតែងបិទទ្វារឱកាសដោយនិយាយថា មិនធ្លាប់, មិនស្ទាត់ជំនាញ និងគ្មានបទពិសោធន៍ពីមុនជាដើម ។ នៅពេលយើងគិត ឬមានអារម្មណ៍បែបនេះ ប្រព័ន្ធប្រសាទរបស់យើងនឹងបិទជិត ហើយធ្វើឲ្យយើងមិនអាចមើលឃើញ ឬបានឮអ្វីសោះ ប៉ុន្តែឱកាសកើតឡើងដោយការបើកចិត្តទទួលយកវា ។
៣-មិនខ្លាចនឹងធ្វើ ៖ ជារឿងធម្មតាទេដែលយើងមានអារម្មណ៍ខ្លាចលើអ្វីមួយដែលមិនធ្លាប់ស្គាល់ពីមុនមក ប៉ុន្តែបើនៅតែខ្លាច ការអនុវត្តក៏មិនកើតឡើងដែរ ហើយចុងក្រោយ លទ្ធផលនឹងមិនផ្លាស់ប្តូរឡើយ ។ ចូរក្លាហានឡើងដើម្បីរៀនសូត្រ ហើយភាពខ្លាចនឹងបាត់ទៅ ។
៤-កុំបញ្ឈប់ការគិត ៖ ការគិត គឺជាការព្យាយាមរកអ្វីមួយ ដោយវិធីគិតនេះអាចរកបាននូវព័ត៌មានអ្វីដែលយើងមានទំនាក់ទំនងផងដែរ ។ ការសម្លឹងឃើញ, ការទទួលក្លិន, ការបានឮ និងការបានចាប់អ្វីផ្សេងៗនៅក្បែរខ្លួន ហើយយកមកផ្សំជាមួយចំណេះដឹង និងបទពិសោធន៍ដែលយើងមានជាក់ច្បាស់ គឺជាគំនិតឈ្លាសវៃ រហូតដល់ក្លាយជាឱកាស និងបង្កើតគុណតម្លៃបានច្រើន។ ហេតុនេះហើយ ហាមឈប់គិតជាដាច់ខាត គឺឱកាសកើតពីការដាក់ចិត្តដោយការយកមកគិតនេះឯង ។
៥-គិតថាវាអាចទៅរួច ៖ បើយើងនិយាយថា ធ្វើមិនបានទេ, វាមិនអាចទៅរួច, បែបនេះទ្រាំទ្រមិនរួចទេ គឺដូចជាយើងបញ្ជាពាក្យទាំងនេះទៅជំរុញដល់ការធ្វើការរបស់ខួរក្បាល ឬបង្ខំខួរក្បាល ហើយខួរក្បាលនឹងប្រមូលលទ្ធផលទាំងនេះ រួចបញ្ជូនសញ្ញាទៅអវៈយវៈផ្សេងៗរបស់រាងកាយ ។ បើបញ្ជាក្នុងលក្ខណៈណា ខួរក្បាលនឹងចាត់ចែងទៅតាមនោះ ។
៦-កុំគិតថា គ្រប់យ៉ាងល្អហើយ ៖ ព្រោះគ្មានអ្វីល្អបំផុតទេ គឺគ្រប់យ៉ាងអាចល្អឡើងបានទៀត ។ ការគិតបែបនេះ យើងនឹងជួបច្រកទំនេររបស់បច្ចុប្បន្នជាមួយអនាគត ដែលវានឹងនាំមកនូវគំនិត ឬឱកាសថ្មីៗ ដោយគ្រាន់តែគិតចេញពីរឿងដើមៗ ។
៧-កុំយកអ្វីមកអាង ៖ ចំណុចចុងក្រោយដែលសំខាន់បំផុត គឺដូចជា Switches នឹងបិទគ្រប់យ៉ាងក្នុងជីវិតយើង ដោយអះអាងថា នឿយហត់ហើយ, គ្មានពេលទេ, គ្មានដើមទុន, មិនធ្លាប់មានអ្នកបង្រៀន, មិនចេះធ្វើ ។ល។ និងអ្វីច្រើនទៀតដែលយើងតែងតែបានឮគ្រប់ពេលវេលាពីអ្នកនៅក្បែរខ្លួន អ្នកជិតខាង ឬសូម្បីតែយើងខ្លួនឯង ។
បើលោកអ្នកយកវិធីខាងលើនេះទៅអនុវត្ត គឺនឹងមានប្រយោជន៍ ព្រោះវាអាចជាផ្លូវមួយឈានដល់ភាពជោគជ័យ ដែលយើងមិនធ្លាប់ដឹងពីមុន ។ សូមឲ្យលោកអ្នកទទួលបានឱកាស និងជោគជ័យគ្រប់ៗគ្នា ៕
ចែករំលែកព័តមាននេះ