ខេត្តកំពង់ស្ពឺ ៖ យ៉ាងហោចណាស់ឪពុកម្តាយបានស្លាប់ភ្លាមៗនៅកន្លែងកើតហេតុ ចំណែកកូនៗចំនួន២នាក់បានរងរបួសស្រាលក្នុងហេតុការណ៍គ្រោះថ្នាក់រវាងរថយន្តមួយគ្រឿងបុកជាមួយម៉ូតូមួយគ្រឿងកាលពីវេលាម៉ោង១០និង៤៥នាទីព្រឹកថ្ងៃ២៣ កុម្ភៈ ២០១៩ នៅលើផ្លូវលេខ៤ ចន្លោះគីឡូម៉ែត្រលេខ៥០-៥១ ភូមិភ្នំដី សង្កាត់ច្បារមន…
ខេត្តកំពង់ស្ពឺ ៖ យ៉ាងហោចណាស់ឪពុកម្តាយបានស្លាប់ភ្លាមៗនៅកន្លែងកើតហេតុ ចំណែកកូនៗចំនួន២នាក់បានរងរបួសស្រាលក្នុងហេតុការណ៍គ្រោះថ្នាក់រវាងរថយន្តមួយគ្រឿងបុកជាមួយម៉ូតូមួយគ្រឿងកាលពីវេលាម៉ោង១០និង៤៥នាទីព្រឹកថ្ងៃ២៣ កុម្ភៈ ២០១៩ នៅលើផ្លូវលេខ៤ ចន្លោះគីឡូម៉ែត្រលេខ៥០-៥១ ភូមិភ្នំដី សង្កាត់ច្បារមន ក្រុងច្បារមនខេត្តកំពង់ស្ពឺ។
ភាគីខាងម៉ូតូមួយគ្រឿងជិះគ្នាចំនួន៤នាក់ម៉ាកហុងដា ធុនសេ១២៥ ស៊េរីឆ្នាំ២០១២ ពាក់ស្លាកលេខ ព្រៃវែង ១F-២៣៨៦ បើកបរដោយឈ្មោះ វ៉ា វ៉ាត ភេទប្រុស អាយុ៣៥ឆ្នាំ ត្រូវជាប្តី បានស្លាប់ ចំណែកអ្នករួមដំណើរចំនួន៣នាក់ ក្នុងនោះ១-ឈ្មោះអូន ភាស់ ភេទស្រី អាយុ២៥ឆ្នាំ ត្រូវជាប្រពន្ធ បានស្លាប់ ២-ឈ្មោះ វ៉ា វ៉ាន់ថា ភេទស្រី អាយុ៧ឆ្នាំ ត្រូវជាកូន បានរងរបួសស្រាល និង៣-ឈ្មោះ វ៉ា សា ភេទប្រុស អាយុ៩ខែ ត្រូវជាកូន បានរងរបួសស្រាល ។ ជនរងគ្រោះទាំង៤នាក់រស់នៅភូមិតាម៉ោង ឃុំព្រៃរន្ទះ ស្រុកពារាំង ខេត្តព្រៃវែង ។
ចំណែកភាគីខាងរថយន្តមួយគ្រឿងម៉ាកហ្វុ៊យសូ ពណ៌លឿង ពាក់ស្លាកលេខ ភ្នំពេញ ៣A-៦១២៧ មានសណ្តោងរ៉ឺម៉ក ពាក់ស្លាកលេខ ភ្នំពេញ ៤A-០៩២៥ បើកបរដោយបុរសម្នាក់មិនស្គាល់អត្តសញ្ញាណ បានរត់គេចខ្លួនបាត់ស្រមោល ។
ប្រភពពីសមត្ថកិច្ចបានអោយដឹងថា មុនពេលកើតហេតុ គេបានឃើញម៉ូតូមួយគ្រឿងជិះគ្នា៤នាក់ បើកបរក្នុងទិសដៅពីកើតទៅលិច លុះមកដល់ចំណុចកើតហេតុ ស្រាប់តែមានរថយន្តមួយគ្រឿងខាងលើបើកបរក្នុងទិសដៅបញ្ច្រាសគ្នាបានបុកជាមួយម៉ូតូយ៉ាងពេញទំហឹង បណ្តាលឱ្យភាគីខាងម៉ូតូស្លាប់២នាក់ និងរបួសស្រាល២នាក់ ចំណែកអ្នកបើកបររថយន្តបានរត់គេចខ្លួនបាត់ស្រមោល ។
ក្រោយពេលកើត សមត្ថកិច្ចបានចុះមកដល់កន្លែងកើតហេតុ ហើយបានបញ្ជូនកុមារ២នាក់ជាជនរងគ្រោះទៅកាន់មន្ទីរពេទ្យ ចំណែកសពជនរងគ្រោះ២នាក់ទៀតត្រូវបានសមត្ថកិច្ចទាក់ទងទៅសាច់ញាតិដើម្បីអោយមកទទួលយកទៅធ្វើបុណ្យតាមប្រពៃណី។
បន្ទាប់ពីធ្វើកំណត់ហេតុរួច រថយន្ត និងម៉ូតូខាងលើត្រូវបានសមត្ថកិចក្រុងច្បារមនបានប្រគល់អោយជំនាញចរាចរណ៍ខេត្តកំពង់ស្ពឺបន្តនីតីវិធី៕
ចែករំលែកព័តមាននេះ