ខេត្តកំពត ៖ តាមសេចក្តីរាយការណ៍ព័ត៌មានបឋមបានឱ្យដឹងថា ម្ចាស់បន្ទប់ជួលបានរាយការណ៍មកសមត្ថកិច្ចថាមានបុរសជនបរទេសម្នាក់ដេកស្លាប់ក្នុងបន្ទប់ជួល បង្កឱ្យមានការភ្ញាក់ផ្អើលកាលពីវេលាម៉ោង១០និង៣០នាទីថ្ងៃទី១៩ ខែកុម្ភៈ ឆ្នាំ២០១៩ ស្ថិតនៅភូមិ១ឧសភា សង្កាត់កំពង់កណ្ដាល ក្រុងកំពត ខេត្តកំពត ។
ជនរងគ្រោះដែលស្លាប់ឈ្មោះMERTENS THOMAS FRIEDRICH ភេទប្រុស អាយុ៦៩ឆ្នាំ សញ្ជាតិអាល្លឺម៉ង់ កាន់លិខិតឆ្លងដែនលេខ C84HM8WJY ជាភ្ញៀវទេសចរណ៍ ។ ជនរងគ្រោះស្នាក់នៅបន្ទប់ជួលលេខ៦ ស្ថិតនៅភូមិ១ឧសភា សង្កាត់កំពង់កណ្ដាល ក្រុងកំពត ខេត្តកំពត ។
ចំណែកម្ចាស់បន្ទប់ជួលឈ្មោះញឹក រ៉ា ភេទប្រុស អាយុ៥៨ឆ្នាំ មានទីលំនៅភូមិឃុំកើតហេតុខាងលើ ។
តាមរយៈការធ្វើកោសល្យវិច្ច័យរបស់គ្រូពេទ្យ និងនគរបាលបច្ចេកទេសបានរកឃើញថា ជនរងគ្រោះខាងលើស្លាប់ដោយសារជំងឺគាំងបេះដូង។
បច្ចុប្បន្ន សពត្រូវបានសមត្ថកិច្ចបញ្ជូនទៅតម្កល់ទុកនៅមន្ទីរពេទ្យមិត្តភាពខ្មែរ-សូវៀត រាជធានីភ្នំពេញ ដើម្បីរង់ចាំក្រុមគ្រួសារសាច់ញាតិមកទទួលយកទៅធ្វើបុណ្យតាមប្រពៃណី ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ