រាជធានីភ្នំពេញ ៖ បញ្ហាសហភាពអឺរ៉ុបគ្រោងព្យួរប្រព័ន្ធអនុគ្រោះពន្ធ « អ្វីៗគ្រប់យ៉ាងលើកលែងតែអាវុធ» ឬហៅថា(EBA) ពីកម្ពុជា កំពុងក្លាយជាប្រធានបទក្ដៅ និងត្រូវបានមហាជនភាគច្រើនយកចិត្តទុកដាក់តាមដាន ពិសេសអ្នកនៅក្នុងវិស័យធុរកិច្ច…
រាជធានីភ្នំពេញ ៖ បញ្ហាសហភាពអឺរ៉ុបគ្រោងព្យួរប្រព័ន្ធអនុគ្រោះពន្ធ « អ្វីៗគ្រប់យ៉ាងលើកលែងតែអាវុធ» ឬហៅថា(EBA) ពីកម្ពុជា កំពុងក្លាយជាប្រធានបទក្ដៅ និងត្រូវបានមហាជនភាគច្រើនយកចិត្តទុកដាក់តាមដាន ពិសេសអ្នកនៅក្នុងវិស័យធុរកិច្ច និងបណ្ដាវិនិយោគិន ជាដើម។
យ៉ាងណាក៏ដោយ បើតាមការលើកឡើងពីថ្នាក់ដឹកនាំ ក៏ដូចជាមន្ត្រីជាន់ខ្ពស់នៃរាជរដ្ឋាភិបាល កម្ពុជានៅតែមានសុទិដ្ឋិនិយមថា ប្រសិនបើEBA ត្រូវបានព្យូរជាបណ្ដោះអាសន្នមែននោះ ក៏មិនរងផលប៉ះពាល់ធ្ងន់ធ្ងរដែរ គ្រាន់តែបាត់បង់ប្រយោជន៍ តែមិនបាត់ទីផ្សារនោះទេ។ ម្យ៉ាងទៀត វាមិនទាន់កើនឡើងនៅឡើយ ខណៈនីតិវិធីនៅមានរយៈពេលប្រមាណ១៨ខែទៀត ដែលអាចឲ្យកម្ពុជាត្រៀមខ្លួនជាស្រេចក្នុងការស្វែងរកច្រកចេញពីសម្ពាធមួយនេះ ឬក៏អ្វីៗនៅតែធម្មតា ព្រោះថាការគំរាមជុំវិញបញ្ហាEBAនេះ មិនមែនជារឿងថ្មីនោះទេ ។
អ្នកជំនាញក្នុងវិស័យទេសចរណ៍ បានលើកឡើងថា វិស័យទេសចរណ៍កម្ពុជា នឹងមិនរងផលប៉ះពាល់នោះទេ ប្រសិនបើការដកEBAនោះ មិនធ្វើឲ្យប៉ះពាល់ដល់ជីវភាព និងប្រាក់ចំណូលរបស់ប្រជាពលរដ្ឋ ។
លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជា បានមានប្រសាសន៍កាលពីថ្ងៃទី១៥ កុម្ភៈ កន្លងមកថា ដរាបណាបញ្ហាEBA មិនធ្វើឲ្យប៉ះពាល់ជីវភាពប្រជាពលរដ្ឋទេ នោះប្រជាពលរដ្ឋកម្ពុជានឹងនៅតែដើរលេងកម្សាន្ដច្រើន ហើយនិន្នាការភ្ញៀវទេសចរអន្តរជាតិ មិនមានទាក់ទងនឹងការដកEBAឬមិនដកពីកម្ពុជានោះទេ ប៉ុន្តែលោកសង្ឃឹមថា អឺរ៉ុបនឹងពិចារណាលើបញ្ហានេះ ។
លោកបន្តថា ៖« នៅពេលជីវភាពប្រជាពលរដ្ឋប្រសើរឡើង ពួកគេនឹងនៅតែដើរកម្សាន្ដក្នុងស្រុក ព្រោះយើងមិនអាចមើលរំលងភ្ញៀវក្នុងស្រុកនោះទេ ពួកគេជាអ្នកដើរកម្សាន្ដ និងចំណាយប្រាក់ច្រើន »។
លោកបញ្ជាក់ថា ៖« ទេសចរណ៍នាំមុខវិស័យអ្វីៗទាំងអស់ ពេលភ្ញៀវទេសចរទៅដល់ទីណា សកម្មភាពអាជីវកម្ម និងលំហូរសាច់ប្រាក់ នឹងបានទៅដល់តំបន់នោះ »។
ស្រដៀងគ្នានេះដែរ ប្រធានសមាគមទេសចរណ៍អាស៊ីប៉ាស៊ីហ្វិក លោក ធួន ស៊ីណាន បានមានប្រសាសន៍ថា ប្រសិនជាមានការដកប្រព័ន្ឋEBA នឹងមិនរងផលប៉ះពាល់ដល់វិស័យទេសចរណ៍នោះទេ ប៉ុន្តែបើគិតពីរលកវិញវាអាចជះឥទ្ធិពលតិចតួចក្នុងរយៈពេលខ្លី តែមិនជះឥទ្ធិពលធ្ងន់ធ្ងរដល់សេដ្ឋកិច្ច និងភ្ញៀវទេសចរជាតិ អន្តរជាតិនោះឡើយ ។
យ៉ាងនេះក្ដី លោកថា ៖« ទោះជាយ៉ាងណា កេរ្តិ៍ឈ្មោះកម្ពុជា អាចរងផលប៉ះពាល់ដោយសារតែការផ្សព្វផ្សាយពីកម្ពុជាតាមបណ្តាញព័ត៌មាននានាដែលមិនសូវបានផ្សាយរឿងវិជ្ជមានច្រើន »។
ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ លោកបណ្ឌិត ម៉ី កល្យាណ បានថ្លែងថា ប្រសិនជាអឺរ៉ុបដកប្រព័ន្ឋEBAពីកម្ពុជា សេដ្ឋកិច្ចកម្ពុជានឹងរងផលប៉ះពាល់ ប៉ុន្តែមិនធ្ងន់ធ្ងរទេ ហើយវាជាពេលវេលាដែលកម្ពុជាត្រូវពង្រឹងខ្លួនឯង ជាជាងការពឹងផ្អែកលើគេខ្លាំងពេក ។
លោកបណ្ឌិតសង្កត់ធ្ងន់ថា ៖« យើងមិនអាចពឹងគេបានរហូតនោះទេ បើយើងពឹងគេថ្ងៃណាមួយគេឈប់ជួយយើង យើងនឹងស្លាប់។ ហេតុនេះយើងត្រូវខិតខំពង្រឹងខ្លួនឯង ធ្វើពិពិធកម្មទីផ្សារ និងធ្វើពិពិធកម្មផលិតផលរបស់យើង ដើម្បីយើងអាចមានមូលដ្ឋានរឹងមាំក្នុងការទ្រទ្រង់សេដ្ឋកិច្ចរបស់ខ្លួន » ។
ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន នាយករដ្ឋមន្ត្រី បានថ្លែងនៅក្នុងពិធីបិទសន្និបាតត្រួតពិនិត្យការងារឆ្នាំ២០១៨របស់ក្រសួងមហាផ្ទៃ កាលពីថ្ងៃទី១៤ កុម្ភៈ កន្លងមក ថា កម្ពុជានៅតែបន្តកិច្ចសហប្រតិបត្តិការល្អជាមួយសហភាពអឺរ៉ុប និងជាម្ចាស់ផ្ទះក្នុងកិច្ចប្រជុំ អាស៊ី-អឺរ៉ុប លើកទី១៣ នៅឆ្នាំ២០២០ ដោយមិនធ្វើឲ្យបញ្ហាEBAប៉ះពាល់ដល់ទំនាក់ទំនងកម្ពុជា-អឺរ៉ុបនោះឡើយ ។
ក្នុងឱកាសនោះ សម្តេចតេជោក៏បានអំពាវនាវដល់ក្រុមហ៊ុនមកពីបណ្តាប្រទេសនៅតំបន់អឺរ៉ុបទាំងអស់ឲ្យបន្តរកស៊ី និងស្នាក់នៅដោយក្តីរីករាយក្រោមម្លប់សុខសន្តិភាពរបស់កម្ពុជា និងអំពាវនាវដល់អ្នកវិនិយោគ និងធុរជនទាំងអស់ ឲ្យបន្តជឿជាក់ក្នុងការរកស៊ីនៅកម្ពុជា ខណៈកម្ពុជាកំពុងធ្វើកំណែទម្រង់លើសេវាផ្សេងៗជាច្រើនទៀត ដើម្បីសម្រួលដល់ការរកស៊ី ។
សម្ដេចតេជោនាយករដ្ឋមន្ត្រី បានបង្ហាញការជឿជាក់ថា តាមរយៈការធ្វើកំណែទម្រង់ជាច្រើននេះ បរិយាកាសនៃការវិនិយោគនៅកម្ពុជានៅតែល្អប្រសើរ ពីព្រោះតាមរយៈការវាយតម្លៃជាថ្មីរកឃើញថា កំណើនសេដ្ឋកិច្ចរបស់កម្ពុជាមានរហូតដល់ទៅ៧,៥ភាគរយ ។ សម្តេចតេជោនាយករដ្ឋមន្ត្រី បានអំពាវនាវទៅដល់កម្មករ កម្មការិនី កុំមានការព្រួយបារម្ភបញ្ហា EBA ដរាបណាការងារនៅតែមានធ្វើ ៕
ចែករំលែកព័តមាននេះ