រាជធានីភ្នំពេញ ៖ អាសង្ហាគុនខ្មែរ ឡៅ ចន្ទ្រា គឺជាអ្នកប្រដាល់លំដាប់ជួរមុខមួយរូបនៅក្នុងពិភពប្រដាល់កម្ពុជា ។ អ្នកគាំទ្រ(ហ្វេន)ភាគច្រើនមានការពេញចិត្តនឹងក្បាច់ប្រយុទ្ធរបស់កីឡាករគុនខ្មែររូបនេះដែលរមែងទទួលជោគជ័យស្ទើរគ្រប់ការប្រកួត ហើយកម្រមានអ្នករិះគន់គេណាស់ ។…
រាជធានីភ្នំពេញ ៖ អាសង្ហាគុនខ្មែរ ឡៅ ចន្ទ្រា គឺជាអ្នកប្រដាល់លំដាប់ជួរមុខមួយរូបនៅក្នុងពិភពប្រដាល់កម្ពុជា ។ អ្នកគាំទ្រ(ហ្វេន)ភាគច្រើនមានការពេញចិត្តនឹងក្បាច់ប្រយុទ្ធរបស់កីឡាករគុនខ្មែររូបនេះដែលរមែងទទួលជោគជ័យស្ទើរគ្រប់ការប្រកួត ហើយកម្រមានអ្នករិះគន់គេណាស់ ។ ប៉ុន្តែថ្មីៗនេះមានហ្វេសប៊ុកមួយសុំមិនបង្ហាញឈ្មោះ បានសរសេររិះគន់ក្នុងន័យស្ថាបនាដល់កីឡាកររូបនេះដែលចូលចិត្តប្រើក្បាច់ពស់ថ្លាន់ឱបរឹតគូប្រកួត ។ ខាងក្រោម នេះជាសំណេររបស់ហ្វេនរូបនោះដែលអ្នកយកព័ត៌មានយើងមិនធ្វើអត្ថាធិប្បាយបន្ថែមទេគ្រាន់ តែកែសម្រួលអក្ខរាវិរុទ្ធបន្តិចបន្ដួចប៉ុណ្ណោះ។
ធ្វើជាកូនប្រុស ធ្វើជាអ្នកប្រដាល់ គួរតែមានក្បាច់វាយបែបកូនប្រុស ( ដាល់ ទាត់ ធាក់ ) តែមិនមែនក្បាច់ឱបរឹតរួតនោះទេ មើលទៅម៉េចមិនដឹងទេ? ហើយក្បាច់ឱបរឹតរួតនេះអាចប្រើបានលុះណាតែយើងមានកម្លាំងខ្លាំងជាងដៃគូ ហើយអាជ្ញាកណ្តាលទុកពេលឲ្យយើងរឹតរួត ចុះបើយើងកម្លាំងមិនដល់គេ ហើយអាជ្ញាកណ្តាលមិនទុកពេលឲ្យយើងឱបរឹតរួត តើយើងសង្ឃឹមអី ។ នៅថៃក៏សំបូរអ្នកលេងជង្គង់ដែរ តែការវាយជង្គង់របស់គេខុសពី ចន្ទ្រា គឺគេឱបវាយជង្គង់តែម្តង មិនមែនអោបរឹតរួតស៊ីពេលហើយបានវាយជង្គង់ទេ ។
តែបើយល់ថា ប្រើក្បាច់អីក៏បានសំខាន់ឲ្យតែយើងឈ្នះដៃគូ បើយល់បែបនេះនោះយើងមិនអាចអភិវឌ្ឍន៍ខ្លួនហើយមិនអាចក្លាយជាកីឡាករអាជីពលំដាប់បានទេ ដោយសារតែក្បាច់យើងវាយមិនទាន់មានលក្ខណៈ Kickboxing ។ Kickboxing គឺផ្តោតទៅលើការវាយប្រយោល គឺដាល់ ទាត់ ធាក់ ហើយសង្វៀនធំៗនៅក្រៅស្រុកគេចង់បានប្រភេទអ្នកវាយ Kickboxing នេះឯង ។
ចន្ទ្រា អាចទៅវាយក្រៅស្រុកបាន តែក្រោយពីវាយរួចធានាថា អ្នករៀបចំកម្មវិធីនឹងលែងចង់បាន ចន្ទ្រា ទៅវាយទៀតហើយ បើគេឃើញយើងប្រើក្បាច់ដូចរាល់ថ្ងៃ ហើយមូលហេតុដែលអ្នករៀបចំគេចង់បានអ្នកប្រដាល់បែប Kickboxing ដោយសារតែអ្នកវាយបែបនេះមាន ទាត់ ធាក់ ដាល់ គឺវាយប្រយោល ហើយបើយើងវាយឱបរឹតអ៊ីចឹងគ្មាននរណាចង់យកទៅវាយនៅសង្វៀនគេទេ ។
កីឡាករថៃខ្លាំងៗលំដាប់ៗភាគច្រើនក៏ចេះជង្គង់ដែរ តែគេមិនមែនពឹងលើក្បាច់ជង្គង់នេះតែមួយទេ គឺគេល្អទាំង ទាត់ ធាក់ ម៉ាត់ តែបើគេប្រើជង្គង់គឺប្រើជង្គង់បោះ តែកីឡាករថៃដែលឡើងដល់សង្វៀនពិភពលោក គេសឹងតែលែងប្រើក្បាច់ឡាំជង្គង់នេះហើយ ដោយសារតែសង្វៀនធំៗគេមិនទុកពេលឲ្យឱបគ្នា ហើយក៏មិនចង់បានកីឡាករដែលវាយឱប ព្រោះការវាយឱបវាធ្វើឲ្យខាតពេលនិងមិនល្អមើល។
បើអាចកែបានកែទៅ ជាប្រុស ធ្វើជាអ្នកប្រដាល់ គួរតែប្រើក្បាច់ដាល់ ធាក់ ទាត់ បានហៅថាអ្នកប្រដាល់ មិនមែនឲ្យឈប់ប្រើក្បាច់នេះទេ តែគួរតែចេះក្បាច់វាយប្រយោល ធាក់ ទាត់ ម៉ាត់ ផងដែរ ប្រសើរជាងពឹងតែលើក្បាច់ឱបរឹតតែមួយមុខ ។ បើចង់ឱប ចាំជាមួយស្រីៗទៅចាំឱបរឹត ៕
ចែករំលែកព័តមាននេះ