ខេត្តបន្ទាយមានជ័យ ៖ បុរសជនជាតិចិនម្នាក់រងរបួស ដោយគ្រាប់កាំភ្លើងចំភ្លៅធ្លាយពីម្ខាងទៅម្ខាង និងរបួសក្បាល ដែលសង្ស័យគូជម្លោះវាយចំកើតចេញពីជម្លោះនៅក្នុងក្លិបកម្សាន្តឡាហ្វីរ៉ា ក្នុងភូមិបាលិលេយ្យ ១ សង្កាត់ប៉ោយប៉ែត ក្រុងប៉ោយប៉ែត កាលពីវេលាទៀបភ្លឺថ្ងៃទី១១ ខែកុម្ភៈ ។
ជនរងគ្រោះឈ្មោះ ចូវ អុីធីង អាយុ៣៩ឆ្នាំ ទើបមកស្នាក់នៅក្នុងក្រុងប៉ោយប៉ែត ត្រូវបានបញ្ជូនទៅព្យាបាលនៅគ្លីនិកមួយក្នុងភូមិក្បាលស្ពាន១ សង្កាត់ប៉ោយប៉ែត ដោយមាននគរបាលនិងអាវុធហត្ថយាមកាមទៀតផង ។
ប្រភពបែកធ្លាយនិយាយតគ្នាៗតាមតុកាហ្វេថា ករណីខាងលើជាជម្លោះជនជាតិចិន និងជនជាតិចិនដូចគ្នា ផ្តើមចេញពីរឿងគិតប្រាក់ ក្រោយពីបញ្ចប់ផឹកស៊ីក្នុងក្លិប ។ ដំបូងជនរងគ្រោះឃើញវិក្កយបត្រគិតប្រាក់ពីមេការថ្លៃពេក ក៏សុំឲ្យគិតជាថ្មីឡើងវិញ តែមេការនោះ បានឲ្យជនរងគ្រោះទៅសុំទោសថៅកែរបស់គេ ។ ពេលនោះ ជនរងគ្រោះឆ្លើយតបថា រឿងអីឲ្យសុំទោស បើមិនបានធ្វើអ្វីខុសផង គ្រាន់តែសុំឲ្យគិតប្រាក់សាជាថ្មីតើ ។
ភ្លាមនោះ ក៏ផ្ទុះជាជម្លោះឡើងរហូតឈានដល់វាយតប់គ្នា និងមានការផ្ទុះអាវុធតែម្តង។ ករណីខាងលើ គេពុំដឹងថា បណ្តាលមកពីមូលហេតុអ្វីពិតប្រាកដនោះទេ ព្រោះជនរងគ្រោះមិនអាចទាក់ទងសុំបំភ្លឺបាន ។ ជំុវិញករណីផ្ទុះអាវុធក្នុងក្លិបខាងលើ អធិការនគរបាលក្រុងប៉ោយប៉ែត លោកវរសេនីយ៍ឯក ធិន ស៊ិនដេត មិនអាចទាក់ទងសុំការបំភ្លឺបានទេ ដោយទូរស័ព្ទចុចចូលលើកទី១ និយាយស្តាប់គ្នាមិនបាន ឯ៣ដងទៀតចុចចូលតែគ្មានអ្នកទទួល។
ចំណែកលោក នួន នីណារ៉ូ មេបញ្ជាការកងរាជអាវុធហត្ថក្រុងប៉ោយប៉ែត ទាក់ទងតាមទូរស័ព្ទជាច្រើនដងតែចុចមិនចូល ។ យ៉ាងណាក៏ដោយ ករណីនេះ លោកអនុសេនីយ៍ឯក អុឹម សុភារៈ នាយប៉ុស្តិ៍នគរបាលរដ្ឋបាលសង្កាត់ប៉ោយប៉ែត ប្រាប់តាមទូរស័ព្ទថា លោកមិនបានដឹងពីមូលហេតុច្បាស់លាស់ទេ ប៉ុន្តែទទួលស្គាល់ថា ពិតជាមានជនជាតិចិនម្នាក់រងរបួសដោយត្រូវគេបាញ់ចំជើង និងរបួសក្បាលប្រាកដមែន នៅក្នុងក្លិបកម្សាន្តឡាហ្វីរ៉ា ។
លោកនាយប៉ុស្តិ៍បន្តថា ករណីខាងលើ កើតឡើងកាលពីវេលាម៉ោង៤ទៀបភ្លឺថ្ងៃទី១១ ខែកុម្ភៈ ហើយនៅព្រឹកថ្ងៃដដែល សមត្ថកិច្ចជំនាញពាក់ព័ន្ធ ដឹកនាំដោយលោក មាស ច័ន្ទពិសិដ្ឋព្រះរាជអាជ្ញាអមសាលាដំបូងខេត្ត បានទៅដល់ចំណុចកើតហេតុ ។ គួរបញ្ជាក់ថា ក្លិបកម្សាន្តឡាហ្វីរ៉ានេះ កន្លងមកក៏ធ្លាប់ត្រូវសមត្ថកិច្ចចុះបង្ក្រាបករណីគ្រឿងញៀន ឃាត់ខ្លួនជនជាតិចិនមួយចំនួន និងបិទទីតាំងបណ្តោះអាសន្នដែរ ប៉ុន្តែមិនបានប៉ុន្មានផង ក៏បើកដំណើរការឡើងវិញ ហើយលើកនេះក៏ត្រូវបានបិទជាថ្មីម្តងទៀត ។
មានប្រភពព័ត៌មានមួយថា ជនសង្ស័យចំនួន៣នាក់ បានត្រូវកងរាជអាវុធហត្ថឃាត់ខ្លួនសួរនាំ ប៉ុន្តែរឿងនេះមិនអាចទាក់ទងសុំការបំភ្លឺពីមេបញ្ជាការកងរាជអាវុធហត្ថក្រុងប៉ោយប៉ែតបានទេ ដោយសារទូរស័ព្ទមិនចូល ៕
ចែករំលែកព័តមាននេះ