សហរដ្ឋអាមេរិកសូមអំពាវនាវឲ្យកម្ពុជាស្តាឡើងវិញនូវលទ្ធិប្រជាធិបតេយ្យពហុបក្សពិតប្រាកដ

ថ្ងៃទី ១២ ខែ កុម្ភៈ ឆ្នាំ ២០១៩
ម៉ោង ១៤:៣៤
អ៊ាង ប៊ុនរិទ្ធ

រាជធានីភ្នំពេញ ៖ ស្ថានទូតអាមេរិកប្រឆាំងនៅកម្ពុជាបានចេញសេចក្តីថ្លែងការណ៍គាំទ្រចំពោះសហភាពអឺរ៉ុបដែលសម្រេចផ្អាកការអនុគ្រោះពន្ធលើកកម្ពុជា និងចង់ឃើញកម្ពុជាស្តា ឡើងវិញនូវលទ្ធិប្រជាធិបតេយ្យ ពហុបក្សពិតប្រាកដដូចមានចែងនៅក្នុងរដ្ឋធម្មនុញ្ញនៃប្រទេសកម្ពុជា ។

ការថ្លែងការណ៍នេះ បន្ទាប់ពីសហភាពអឺរ៉ុបសម្រេចផ្អាកការអនុគ្រោះពន្ធក្នុងផ្នែកពាណិជ្ជកម្មដល់ប្រទេសកម្ពុជា កាលពីថ្ងៃទី១១ ខែកុម្ភៈ កន្លងមកនេះ ។ យោងតាមសេចក្តីថ្លែងការណ៍របស់ស្ថានទូតអាមេរិកនៅរាជធានីភ្នំពេញ ថ្ងៃទី១២ ខែកុម្ភៈ ឆ្នាំ២០១៩ បានឲ្យដឹងថា សហរដ្ឋអាមេរិកធ្វើការកត់សម្គាល់ការសម្រេចចិត្តរបស់សហភាពអឺរ៉ុបក្នុងការផ្តើមដំណើរការនីតិវិធី ផ្អាកការអនុគ្រោះពន្ធក្នុងផ្អែកពាណិជ្ជកម្មដល់ប្រទេសកម្ពុជា ក្រោមគម្រោងដែលមានឈ្មោះថាអ្វីៗទាំងអស់លើកលែងតែអាវុធ (EBA) ដោយសារមានការដើរថយក្រោយ យ៉ាងធ្ងន់ធ្ងរ ក្នុងការការពារសិទ្ធិមនុស្ស និងសិទ្ធិការងារនៅក្នុងរយៈពេល១៨ខែកន្លងទៅនេះ ។
ថ្លែងការណ៍បញ្ជាក់ថា «យើងមានកង្វល់ដូចគ្នា និងសហភាពអឺរ៉ុបដែរទាក់ទងនឹងការរំលោភ យ៉ាងធ្ងន់ធ្ងរលើសេរីភាពក្នុងការបញ្ចេញមតិសិទ្ធិការងារដែលមានការទទួលស្គាល់ជាអន្តរជាតិ និងសេរីភាពទាក់ទង និងអង្គការសមាគម» ។ ប្រភបន្តថា សហរដ្ឋអាមេរិកសូមអំពាវនាវអោយថ្នាក់ដឹកនាំកម្ពុជាស្តាឡើងវិញនូវលទ្ធិប្រជាធិបតេយ្យពហុបក្សពិតប្រាកដ ដូចមានចែងនៅក្នុងរដ្ឋធម្មនុញ្ញនៃប្រទេសកម្ពុជា ។

យើងក៏សូមអំពាវនាវផងដែរអោយប្រទេសកម្ពុជាទម្លាក់ចោលនូវបទចោទប្រកាន់លើលោក កឹម សុខា និងការចោទប្រកាន់តាមទំនើងចិត្តទាំងអស់ ប្រឆាំង និងអ្នកទោសនយោបាយដទៃទៀត ហើយអនុញ្ញាតឲ្យសហជីព អង្គការ សារព័ត៌មានឯករាជ្យ និងក្រុមដទៃទៀតនៃសង្គមស៊ីវិលដំណើរការដោយគ្មានការរឹតត្បិតដែលមិនត្រឹមត្រូវ ។ ថ្លែងការណ៍បន្ថែមថ្នាក់ដឹកនាំកម្ពុជានៅមានឱកាសនៅឡើយ នៅក្នុងការជៀសផុតពីផលវិបាកអវិជ្ជមានផ្នែកសេដ្ឋកិច្ចនៃការដកការអនុគ្រោះពន្ធ EBA ។

ដូចដែលស្នងការពាណិជ្ជកម្មសហភាពអឺរ៉ុប គឺលោកស្រី Cecilia Malmstrom បានមានប្រសាសន៍ថា «វាច្បាស់ហើយថា ចំណាត់ការនៅថ្ងៃនេះមិនមែនជាការសម្រេចចិត្តចុងក្រោយ ហើយក៏មិនមែនជាទីបញ្ចប់នៃដំណើរនីតិវិធីដែរ ។ តែនាឡិកាកំពុងតែដើរទៅមុខជាផ្លូវការហើយ ហើយយើងត្រូវការឃើញវិធានការពិតប្រាកដក្នុងពេលឆាប់ៗ នេះ» ។ លោកស្រីបានបន្ថែមថា «យើងសូមអំពាវនាវអោយមេដឹកនាំកម្ពុជាតម្កល់សុខុមាល ភាពរបស់ប្រទេសអោយខ្ពស់ជាងផលប្រយោជន៍ផ្ទាល់ខ្លួន និងផលប្រយោជន៍នយោបាយ» ៕