ក្រោយធ្វើស៊ីវ៉េណេស៊ុយអេឡា ពេលនេះអាមេរិកចូលរួមប្រកួតប្រជែងប្រេងជាមួយដៃគូនៅអឺរ៉ុប

ថ្ងៃទី ១២ ខែ កុម្ភៈ ឆ្នាំ ២០១៩
ម៉ោង ០៩:៣១
ណៃ ដាលីន

សហរដ្ឋអាមេរិក ៖ ក្រុមហ៊ុនផលិតប្រេងអាមេរិកបានត្រៀមខ្លួនរួចជាស្រេចពេលដែលនៅក្នុងវិស័យធ្វើពាណិជ្ជកម្មប្រេងប្រារព្ធកិច្ចប្រជុំប្រចាំឆ្នាំរបស់ពួកគេនៅអាស៊ីកាលពីខែកញ្ញា ឆ្នាំមុន ។

ក្រុមហ៊ុនអាមេរិក Exxon Mobul និងដៃគូប្រកួតប្រជែងមកពីអឺរ៉ុប Royal Dutch ឬ Shell បានត្រៀមឯកសារ សម្រាប់អតិថិជនដែលប្រាប់ពីព័ត៌មានប្រភេទប្រេងអាមេរិក និងមូលហេតុដែលពួកគេសាកសមក្នុងការជំនួសអ្នកផ្គត់ផ្គង់មកពីអាស៊ីអាគ្នេយ៍ អាហ្វ្រិក និងរុស្ស៊ីជាដើម ។

កាលពីប៉ុន្មានឆ្នាំមុន សហរដ្ឋអាមេរិក គឺជាប្រទេសដែលនាំចូលប្រេងច្រើនជាងគេជុំវិញពិភពលោក ហើយត្រូវបានហាមឃាត់មិនឲ្យនាំប្រេងចេញទៅក្រៅប្រទេសផងដែរ ។ បច្ចុប្បន្ននេះ ការនាំចេញប្រេងឆៅអាមេរិកទៅកាន់អឺរ៉ុបបានកើនដល់កម្រិតខ្ពស់ជាងគេ ដោយនាំចេញបាន ៦៣០,០០០ ធុងក្នុងមួយថ្ងៃកាលពីខែមករា តែនៅតែទាបជាងប្រេងនាំចេញពីរុស្ស៊ី និងអ៊ីរ៉ាក់ដដែល ។

ការនាំចេញប្រេងអាមេរិកត្រូវបានជំរុញដោយការកាត់បន្ថយការផ្គត់ផ្គង់នៃប្រេងអ៊ីរ៉ង់ និងវ៉េណេស៊ុយអេឡា ដែលអាមេរិកបានដាក់ទណ្ឌកម្មលើ ។

ពាណិជ្ជករប្រេងម្នាក់បាននិយាយថា «តម្លៃប្រេងគ្រប់កម្រិតត្រូវបានទទួលរងគ្រោះព្រោះតែការផ្គត់ផ្គង់ប្រេងលើសលប់ពីសហរដ្ឋអាមេរិក»។

ហើយសម្ពាធនេះកាន់តែកើនឡើងថែមទៀត ព្រោះយោងទៅតាមរដ្ឋាភិបាលអាមេរិកបានឲ្យដឹងថា ផលិតកម្មប្រេងឆៅអាមេរិកក្នុងឆ្នាំ ២០១៩ត្រូវបានគិតថា នឹងស្មើជាមធ្យមប្រមាណ ១២.០៦លានធុងក្នុងមួយថ្ងៃ ឬច្រើនជាងឆ្នាំមុនប្រមាណ ១.១៨លានធុងក្នុងមួយថ្ងៃ ។

កំណើនផលិតកម្មក្នុងសហរដ្ឋអាមេរិកបានបង្កឲ្យអង្គការនៃប្រទេសនាំចេញប្រេង (OPEC) និងប្រទេសមិនមែនជាសមាជិកដទៃដូចជារុស្ស៊ីកាត់បន្ថយទិន្នផលប្រេងរបស់ខ្លួនរវាងពី ៣ទៅ៤%តាំងពីឆ្នាំ ២០១៧ មកដើម្បីបង្កើនតម្លៃប្រេង ។ កិច្ចព្រមព្រៀងនេះបានជួយបង្កើនតម្លៃប្រេងពី ៦០ដុល្លារក្នុងមួយធុងមកឡើងទ្វេដងផងដែរ ប៉ុន្តែប្រទេសដែលចូលរួមបានបាត់បង់ចំណែកទីផ្សារឲ្យទៅក្រុមហ៊ុនអាមេរិក ៕