រាជធានីភ្នំពេញ ៖ នាយកប្រតិបត្តិអង្គការតម្លាភាពកម្ពុជាលោក ព្រាប កុល បានលើកចំណុចសំខាន់ៗនៃទម្លាប់ និងអត្តចរិត១២យ៉ាង ដែលនាំឲ្យជាតិសាសន៍មួយធ្លាក់ខ្លួនចុះខ្សោយ ។ ចំណុចទាំង១២រួមមាន…
រាជធានីភ្នំពេញ ៖ នាយកប្រតិបត្តិអង្គការតម្លាភាពកម្ពុជាលោក ព្រាប កុល បានលើកចំណុចសំខាន់ៗនៃទម្លាប់ និងអត្តចរិត១២យ៉ាង ដែលនាំឲ្យជាតិសាសន៍មួយធ្លាក់ខ្លួនចុះខ្សោយ ។
ចំណុចទាំង១២រួមមាន ១- ពូកែផ្អើលតាមគ្នា ដោយប្រើអារម្មណ៍ជាងប្រើប្រាជ្ញា ២- ចេះឈឺឆ្អាលរឿងអយុត្តិធម៌ ប៉ុន្តែមិនហ៊ានតតាំង និងទាមទាររកយុត្តិធម៌ ៣- បើឈឺឆ្អាលរឿងអ្វីមួយ គឺនាំគ្នាផុសផុលខ្លាំងតែមួយភ្លែត រួចក៏ឆាប់សាបរលាបទៅវិញដូចភ្លើងចំបើង ៤- ចិត្តងាយ ហើយបណ្តោយឲ្យព្រឹត្តិការណ៍ និងហេតុការណ៍ទាក់ទាញអារម្មណ៍ និងខ្ជះខ្ជាយពេលវេលា ដែលជារឿយៗជាប់រវល់រឿងតូចតាចភ្លេចគិតពីបញ្ហាធំៗ ៥- ចូលចិត្តចំណាយពេល ដើម្បីកំដរអារម្មណ៍ ស៊ីអារម្មណ៍ (ដ្រាមា/drama) ជាងចំណាយពេល ដើម្បីរៀនសូត្រ និងបង្កើនប្រាជ្ញាខ្លួនឯង ៦- ពូកែអួត សម្តែង ឲ្យឮសូរខ្ទរខ្ទារដូចស្គរ ប៉ុន្តែប្រហោងក្នុង (សុខចិត្តជំពាក់លុយគេ ដើម្បីភាពឡូយឆាយ និងហំហួនពីសំបកក្រៅ)
៧- ធ្វើការងារចុងដៃចុងជើង គម្រប់កិច្ច មិនសូវយកចិត្តទុកដាក់ទទួលខុសត្រូវ ឬផ្តោតលើគុណភាពទេ ប៉ុន្តែចង់បានប្រាក់ខែច្រើន និងចង់ឡើងមុខដំណែងឆាប់ ៨- បើផឹកស្រាមិនស្រវឹងមិនឈប់ ហើយលើកកែវញឹកញាប់ ព្រោះខ្លាចអ្នកលក់ស្រាចំណេញតិចពេក ៩- ចូលចិត្តញ៉ាំអាហារពេលល្ងាចច្រើន ខ្លាចអត់មានក្បាលពោះ និងចង់បានជាតិស្ករ ឬខ្លាញ់ច្រើន ព្រោះចង់ជួយគ្រូពេទ្យ និងអ្នកលក់ថ្នាំពេទ្យឲ្យមានប្រាក់ចំណូលខ្ពស់ ១០- ចូលចិត្តប្រកួតប្រជែង យកឈ្នះចាញ់ ជាមួយជាតិសាសន៍ខ្លួនឯង ប៉ុន្តែខ្លាច និងមិនហ៊ានតតាំងប្រឈម ឬប្រកួតជាមួយជាតិសាសន៍ដទៃ ១១- ស្អប់អំពើពុករលួយ ប៉ុន្តែមិនហ៊ានរិះគន់អ្នកប្រព្រឹត្តិពុករលួយ ហើយបើមានឱកាស និងផលចំណេញដល់ខ្លួនដែរ ចូលរួមសហការណ៍ប្រព្រឹត្តអំពើពុករលួយបានដោយងាយ ១២- យកកិច្ចការនយោបាយធ្វើជាមុខរបរ និងប្រើល្បិចកល់ប្រជែងគ្នាតាមក្បួនរបស់ល្បែង ៕
ចែករំលែកព័តមាននេះ