ខេត្តសៀមរាប ៖ ប៉ូលិសចរាចរណ៍ជើងគោកសហការជាមួយប៉ូលិសអន្តរាគមន៍នៃស្នងការនគរបាលខេត្តបានចុះត្រួតពិនិត្យរឹតបន្តឹងច្បាប់ចរាចរណ៍ផ្លូវគោកឈានដល់ធ្វើការឃាត់ខ្លួនបានគូរស្មេហ៍១គូ និងថ្នាំញៀនចំនួន២កញ្ចប់ ព្រមទាំងម៉ូតូ១គ្រឿងដែលពួកគេបម្រុងធ្វើសកម្មភាពយកទៅលក់ឱ្យម៉ូយ រួចនាំយកមកស្នាក់ការនគរបាលចរាចរណ៍នៅសួនច្បារមុខព្រះអង្គចេក ព្រះអង្គចម រួចរៀបចំកសាងសំណុំរឿងប្រគល់ឱ្យទៅប៉ូលិសគ្រឿងញៀនចាត់ការបន្តតាមផ្លូវច្បាប់ ។
ហេតុការឃាត់ខ្លួនគូរស្មេហ៍១គូនេះបានធ្វើឡើងនៅវេលាម៉ោង៨និង៣០នាទីយប់ ថ្ងៃទី៩ ខែកុម្ភៈ ឆ្នាំ២០១៩ ស្ថិតខាងកើតផ្សារលើធំថ្មី ក្នុងភូមិចុងកៅស៊ូ សង្កាត់ស្លក្រាម ក្រុងសៀមរាប។
តាមប្រភពពីមន្ត្រីនគរបាលចរាចរណ៍បានប្រាប់នៅយប់ ថ្ងៃទី៩ ខែកុម្ភៈ ឆ្នាំ២០១៩នេះ ថា មុនឈានដល់ធ្វើការឃាត់ខ្លួនបានគូស្មេហ៍១គូនេះ គឺកម្លាំងយើងបានចុះត្រួតពិនិត្យរឹតបន្តឹងច្បាប់ចរាចរណ៍ដោយសហការជាមួយប៉ូលិសអន្តរាគមន៍នៃស្នងការនគរបាលខេត្ត ខណៈពេលនោះពួកគេទាំង២នាក់ពេលឃើញសមត្ថកិច្ចភ្លាម បម្រុងជិះម៉ូតូគេច ប៉ុន្តែដោយសារកម្លាំងនៅរាយតាមដងផ្លូវច្រើនទើបជនទាំង២នាក់នោះបើករត់គេចមិនរួច ។
ប្រភពបានបន្តថា បន្ទាប់ពីឃាត់ខ្លួនបានគូរស្មេហ៍១គូរនេះរួចមក កម្លាំងជំនាញនាំខ្លួនទាំង២នាក់ និងវត្ថុតាងទាំងអស់យកមកសួរនាំនៅស្នាក់ការនគរបាលចរាចរណ៍មុខសួនច្បារព្រះអង្គចេក ព្រះអង្គចម រួចរៀបចំកសាងសំណុំរឿងប្រគល់ឱ្យទៅប៉ូលិសគ្រឿងញៀនចាត់ការបន្តតាមផ្លូវច្បាប់ ។
ប្រភពបានបញ្ជាក់ទៀតថា ជនសង្ស័យប្រុសស្រី១គូនេះមាន១- ឈ្មោះ ស៊ត់ វិទ្ធី ភេទប្រុស ២៥ឆ្នាំ មានទីលំនៅភូមិព្រៃប្រស់ ឃុំសង្វើយ ស្រុកជីក្រែង ខេត្តសៀមរាប ជាអ្នកបើកម៉ូតូ១ គ្រឿងម៉ាកអឹមស្លាស់ ពណ៌ខៀវលាយស គ្មានស្លាកលេខ និងជាអ្នក (រក្សាទុកថ្នាំញៀនសម្រាប់ជួញដូរ) (មានសារធាតុញៀនក្នុងខ្លួន) និងស្រីស្មេហ៍ឈ្មោះ មាស វុទ្ធី អាយុ២៣ឆ្នាំ មានទីលំនៅភូមិកំពង់ឃ្លាំង ឃុំកំពង់ឃ្លាំង ស្រុកសូទ្រនិគម ខេត្តសៀមរាប ។
ក្រោយពេលឃាត់ខ្លួនកម្លាំងជំនាញបានធ្វើការដកហូតវត្ថុតាងរួមមាន ម្សៅមេតំហ្វេតាមីនចំនួន០២កញ្ចប់ ស្បោងសម្រាប់វេចខ្ចប់គ្រឿងញៀនមួយចំនួន និងទូរស័ព្ទដៃចំនួន៥គ្រឿង លុយខ្មែរចំនួន២៩៣៥០០រៀល និងលោហធាតុពណ៌លឿងចំនួន១វង់ កាបូបស្ពាយចំនួន១ និងកាបូបតូចដាក់ហោបាវចំនួន១ កូនសៀវភៅសម្រាប់កត់ត្រាលេខទូរស័ព្ទចំនួន១ ។
បច្ចុប្បន្នជនសង្ស័យប្រុសស្រី១គូរនេះកំពុងស្ថិតនៅក្នុងកណ្តាប់ដៃប៉ូលិសប្រឆាំងគ្រឿងញៀនខេត្តកំពុងសួរនាំ ដើម្បីរៀបចំកសាងសំណុំរឿងបញ្ជូនបន្តទៅតុលាការខេត្តចាត់ការទៅតាមនីតិវិធីច្បាប់ ៕
ចែករំលែកព័តមាននេះ