ខេត្តស្ទឹងត្រែង ៖ ជំនាញការិយាល័យព្រហ្មទណ្ឌកម្រិតធ្ងន់ នៃស្នងការដ្ឋាននគរបាល ខេត្តសហការជាមួយអធិការដ្ឋានស្រុកសេសានស្រាវជ្រាវរកឃើញជនដៃដល់សម្លាប់បុរសម្នាកឈ្មោះ ថង រិទ្ធី អាយុ៣៦ឆ្នាំ ។ ក្រោយពីគេបានប្រទះឃើញអណ្តែតទឹក’កាលពីថ្ងៃទី៤…
ខេត្តស្ទឹងត្រែង ៖ ជំនាញការិយាល័យព្រហ្មទណ្ឌកម្រិតធ្ងន់ នៃស្នងការដ្ឋាននគរបាល ខេត្តសហការជាមួយអធិការដ្ឋានស្រុកសេសានស្រាវជ្រាវរកឃើញជនដៃដល់សម្លាប់បុរសម្នាកឈ្មោះ ថង រិទ្ធី អាយុ៣៦ឆ្នាំ ។ ក្រោយពីគេបានប្រទះឃើញអណ្តែតទឹក’កាលពីថ្ងៃទី៤ កុម្ភៈកន្លងមកនេះ ហើយត្រូវបានសមត្ថកិច្ចជំនាញការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្ត សហការជាមួយអធិការដ្ឋានស្រុកសេសានស្រាវជ្រាវរកឃើញ ដឹងពីការពិតគឺកូនជាជនដៃដល់ ឯប្រពន្ធនិងប្អូនថ្លៃគ្រាន់តែជាប់ពាក់ព័ន្ធក្នុងករណីនេះតែប៉ុណ្ណោះ ។
លោកវរសេនីយ៍ទោ ដួង ស៊ីវុត្ថា នាយការិយាល័យព្រហ្មទណ្ឌកម្រិតធ្ងន់ខេត្តបានឲ្យដឹងថា ជនរងគ្រោះដែលត្រូវកូនសម្លាប់ឈ្មោះ ថង រិទ្ធី ភេទប្រុស អាយុ៣៦ឆ្នាំ ។ ចំណែកជនដៃដល់ជាកូនមាន ១-ឈ្មោះ រិទ្ធី សុមន្នី ភេទប្រុស អាយុ១៩ឆ្នាំ (កូន) ២-ម្ដាយឈ្មោះ ម៉េត អាប់ អាយុ៣៣ឆ្នាំ និងទី៣ឈ្មោះ ម៉េត គី ភេទប្រុស អាយុ២២ឆ្នាំ (ប្អូនថ្លៃ) ។ ជនរងគ្រោះនិងជន ដៃដល់ មានទីលំនៅក្នុងភូមិភ្លុក ឃុំភ្លុក ស្រុកសេសាន ខេត្តស្ទឹងត្រែង ។
លោកនាយការិយាល័យបានឲ្យដឹងទៀតថា នៅថ្ងៃកើតហេតុប្ដីស្រវឹងស្រា បានឈ្លោះជាមួយប្រពន្ធ រួមទាំងកូន ពេលដែលឈ្លោះគ្នានោះឪពុកបានយកដំបង បំរុងវាយទៅលើកូន តែកូនចាប់យកដំបងបាន ក៏វាយទៅលើឪពុកចំនួន២ដំបងចំក្បាលផ្នែកខាងក្រោយ និងមួយដំបងទៀតចំស្មាធ្វើឲ្យឪពុកដេកស្ដូកស្ដឹង ស្លាប់ភ្លាមៗនៅលើផ្ទះតែម្ដង ។
លោកវរសេនីយ៍ទោបន្តថា តាមម្ដាយសារភាពចំពោះមុខសមត្ថកិច្ចថា ក្រោយកើតហេតុជនដៃដល់ជាកូនបានអ៊ាវឪពុកដែលស្លាប់ហើយចុះទៅក្នុងទន្លេយកខ្មោចចងសណ្ដូនជាមួយនឹងថ្មជាច្រើនដុំទម្លាក់ចូលទៅក្នុងទឹកទន្លេសេសាន ។
លោកថា នៅថ្ងៃទី៤ ខែកុម្ភៈ ត្រូវបានប្រជានេសាទប្រទះឃើញសាកសពអណ្ដែតក្នុងទន្លេ ដែលមានខ្សែចងដុំថ្មជាច្រើនដុំហើយបានរាយការណ៍ទៅដល់សមត្ថកិច្ចចុះស្រាវជ្រាវនិងធ្វើកោសល្យវិច័យរកឃើញថាសាកសពត្រូវបានគេសម្លាប់ចងនិងថ្មសណ្ដូនទម្លាក់ទឹកហើមស្អុយ ។
លោកវរសេនីយ៍ទោបានបញ្ជាក់បន្ថែមថា បន្ទាប់ពីមានករណីនេះកើតឡើងហើយមិនស្គាល់អត្តសញ្ញាណ នោះត្រូវបានការិយាល័យ ព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តដឹកនាំដោយ លោក ដួង ស៊ីវុត្ថា សហការជាមួយអធិការដ្ឋាននគរបាលស្រុកសេសានចុះស្រាវជ្រាវ ហើយបានឃាត់ខ្លួនមនុស្សបីនាក់ដែលជាប់ពាក់ព័ន្ធក្នុងករណីខាងលើនេះមានកូនប្រុស ម្តាយនិងប្អូនថ្លៃ នាំខ្លួនមកអធិការដ្ឋាននគរបាលស្រុកសេសាន និងបញ្ជូនមកកាន់ស្នងការដ្ឋាននគរបាលខេត្តសាកសួរ ។
លោកនាយការិយាល័យបន្តថា នៅថ្ងៃទី៧ កុម្ភៈ បន្ទាប់ពីមានការសាកសួរជនដៃដល់ជាកូនមិនបានសារភាពថាខ្លួនបានសម្លាប់ឪពុកនោះទេ តែម្ដាយបានសារភាពចំពោះសមត្ថកិច្ចថានៅថ្ងៃកើតហេតុ ប្តីរបស់គាត់ឈ្លោះជាមួយគាត់និងកូន បានយកដំបងបម្រុងវាយគាត់និងកូន ហើយកូនក៏បានស្ទុះទៅឆក់យកដំបងពីឪពុកវាយទៅលើឪពុកចំនួន២ទៅ៣ដំបងវិញ បណ្ដាលឱ្យស្លាប់តែម្ដង ហើយអ៊ាវជនរងគ្រោះចុះទៅក្នុងទន្លេ និងចងសណ្តូនថ្មទម្លាក់ទឹកដើម្បីបំបាត់ភស្តុតាង ។
ជនសង្ស័យទាំងបីនាក់មានកូនម្ដាយនិងប្អូនថ្លៃដែលជាប់ពាក់ព័ន្ធក្នុងករណីនេះស្ថិតក្រោមការសាកសួរពីសមត្ថកិច្ចជំនាញនៃស្នងការដ្ឋាននគរបាលខេត្តនៅថ្ងៃទី៨ កុម្ភៈនេះ ។ ទាំង៣នាក់នឹងត្រូវបញ្ជូនទៅកាន់តុលាការដើម្បីចាត់ការបន្តបន្ទាប់ពីបញ្ចប់ការសាកសួរ ៕
ចែករំលែកព័តមាននេះ