ខេត្តព្រៃវែង ៖ សេចក្តីរាយការណ៍ឱ្យដឹងថា យុវវសិស្សស្រី១ប្រុស២ ត្រូវសមត្ថកិច្ចស្រាវជ្រាវរហូតឃាត់ខ្លួនបានជាបន្តបន្ទាប់ ក្រោយពីពួកគេសកម្មភាពឃុបឃិតប្លន់យកម៉ូតូពីក្មេងស្រីម្នាក់ ជាសិស្សសាលាដូចគ្នារយៈពេល១ថ្ងៃក្រោយ ។ ការឃាត់ខ្លួនធ្វើឡើង កាលពីរសៀលថ្ងៃទី០៨ កុម្ភៈ ស្ថិតនៅចំណុចភូមិព្រៃព្នៅ ឃុំព្រៃព្នៅ ស្រុកពារាំង ខេត្តព្រៃវែង ។
សេចក្តីរាយការណ៍បន្តថា ជនសង្ស័យទាំង៣នាក់ ១-ឈ្មោះភា ស្រីលីន ភេទស្រី អាយុ១៦ឆ្នាំ ជាសិស្សថ្នាក់ទី១០នៃវិទ្យាល័យ ព្រៃព្នៅ, ២-ឈ្មោះលឹម ម៉េងលាង ភេទប្រុស អាយុ១៥ឆ្នាំ ជាសិស្សថា្នក់ទី១០វិទ្យា ល័យព្រៃព្នៅ, ៣-ឈ្មោះ លឹម ស៊ីវឡុង ភេទប្រុស អាយុ១៧ឆ្នាំ សិស្សថ្នាក់ទី១០ វិទ្យាល័យព្រៃព្នៅ អ្នកទាំង៣មានទីលំនៅក្នុងភូមិ ព្រៃព្នៅ ឃំុព្រៃព្នៅ ស្រុកពារាំង ខេត្តព្រៃវែង ។ រីឯក្មេងស្រីរងគ្រោះជាម្ចាស់ម៉ូតូឈ្មោះភិន សុខឡេង អាយុ១៤ឆ្នាំ មានទីលំនៅក្នុងភូមិអង្គាសដី ឃំុព្រៃព្នៅ ស្រុកពារាំង ខេត្តព្រៃវែង។ ចំណែកម៉ូតូឌ្រីមសង់ C125 ស៊េរីឆ្នាំ2016 ពណ៌ខ្មៅ (មិនមានស្លាកលេខ) ។
លោកស្នងការរងបានដឹងទៀតថា មុនពេលកើតហេតុកាលពីរសៀលថ្ងៃទី០៧ កុម្ភៈ ក្មេងស្រីរងគ្រោះបានជិះម៉ូតូតែម្នាក់ឯង ចេញពីសាលារៀនព្រៃព្នៅ សំដៅទៅផ្ទះនៅភូមិអង្គាលដី ។ លុះមកដល់កន្លែងស្ងាត់ត្រង់ចំណុចទួលកុកសៀម ចម្ងាយជិត២គីឡូម៉ែត្រ ខាងលិចភូមិព្រៃព្នៅ ឃំុព្រៃព្នៅ ស្រុកពារាំង។ ស្រាប់តែលេចមុខជនសង្ស័យ២នាក់ពាក់មួកសុវត្ថិភាពជិះម៉ូតូមកជិត រួចកាន់ដាវប្រវែងកន្លះម៉ែត្រ មកភ្ជង់ចង្កេះសំឡុតនារីរងគ្រោះឱ្យចុះពីលើម៉ូតូ រួចពួកគេបានយកម៉ូតូនាងគេចបាត់ ។
មកលុះដល់រសៀលថ្ងៃទី០៨ កុម្ភៈ កំលាំងការិយាល័យព្រហ្មទណ្ឌកំរិតធ្ងន់នៃស្នងការខេត្ត សហការជា
មួយ នគរបាលស្រុកពារាំង បានស្រាវជ្រាវយ៉ាងម៉ត់ចត់ រហូតឈានដល់ឃាត់ខ្លួនជនសង្ស័យទាំងបីនាក់តែម្តង ។ នៅចំពោះមុខសមត្ថកិច្ច ពួកគេបានសារភាពថា ខ្លួនពិតជាបានរួមគ្នាប្លន់យកម៉ូតូពីជនរងគ្រោះ ពិតប្រាកដមែន ដោយពួកខ្លួនបានរៀបគម្រោងតាំងពីថ្ងៃទី២មកម្ល៉េះ ដោយតម្រូវឱ្យឈ្មោះ ភា ស្រីលីន ជាអ្នកដឹកនាំបង្ហាញផ្លូវ ។
រីឯឈ្មោះ លឹម ម៉េងលាង និងឈ្មោះ លឹម ស៊ីវឡុង ជាអ្នកប្រព្រឹត្តផ្ទាល់ ។ក្រោយប្លន់ម៉ូតូបាន ពួកគេបានយកទៅលាក់ក្នុងព្រៃចំណុចក្រោយរមណីយដ្ឋាន (ព្រៃដើមស្រុក) នៅស្រុកស៊ីធរកណ្ដាល ហើយសមត្ថកិច្ចក៏បានតាមទៅរកឃើញ និងប្រគល់ជូនម្ចាស់ដើមវិញហើយ។
ចែករំលែកព័តមាននេះ