ខេត្តព្រះសីហនុ ៖ មនុស្សម្នាក់បានស្លាប់នៅហ្នឹងកន្លែង និងម្នាក់ទៀតជាអ្នករួមដំណើរពីក្រោយបានរងរបួសធ្ងន់ ក្នុងហេតុការណ៍ម៉ូតូបុកបះរថយន្តក្នុងទិសដៅផ្ទុយគ្នា ។ ហេតុការណ៍នេះបានកើតឡើងថ្ងៃទី០៩ ខែកុម្ភៈ ឆ្នាំ២០១៩ វេលាម៉ោង ០៧និង១០នាទីព្រឹក លើផ្លូវជាតិលេខ៤ ចន្លោះគីឡូម៉ែត្រ២០០-២០១ ស្ថិតនៅក្នុងភូមិអូរតាសេក ឃុំអូរឧញ្ញ៉ាហេង ស្រុកព្រៃនប់ ។
តាមប្រភពពីសមត្ថកិច្ចបានអោយដឹងថា គ្រោះថ្នាក់នេះបានកើតឡើងរវាងម៉ូតូ០១គ្រឿងម៉ាក HONDA C125 ពណ៌ខ្មៅ ពាក់ផ្លាកលេខ ព្រះសីហនុ 1G-5354 បើកបរដោយឈ្មោះ ស៊ឹម ដន ភេទប្រុស អាយុ៣៧ឆ្នាំ មុខរបរកម្មករ មានអ្នករួមដំណើរម្នាក់ឈ្មោះ ហ៊ឹម ម៉ៃសារុះ ភេទស្រី អាយុ៣៩ឆ្នាំ មុខរបរកម្មករ អ្នកទាំងពីរមានទីលំនៅភូមិស្រែក្នុង ឃុំអូរជ្រៅ ស្រុកព្រៃនប់ ខេត្តព្រះសីហនុ បើកបរមានទិសដៅពីខេត្តព្រះសីហនុឆ្ពោះទៅភ្នំពេញ ។
លុះដល់ចំណុចខាងលើបានប៉ះនឹងរថយន្តបែនដឹកដី០១គ្រឿងម៉ាក HINO ពណ៌ខៀវ ពាក់់ផ្លាកលេខ ក្រចេះ 3A-0311 អ្នកបើកបរមិនស្គាល់អត្តសញ្ញាណ មានទិសដៅផ្ទុយគ្នា ។
ប្រភពដដែលបានបន្តទៀតថា គ្រោះថ្នាក់នេះបានបណ្តាលឲ្យមនុស្សម្នាក់ឈ្មោះ ហ៊ឹម ម៉ៃសារុះ អ្នករួមដំណើរលើម៉ូតូស្លាប់នៅហ្នឹងកន្លែង និងឈ្មោះ ស៊ឹម ដន អ្នកបើកបរម៉ូតូរងរបួសធ្ងន់បានបញ្ជូនទៅសង្គ្រោះគ្លីនិកឯកជន ។
សពត្រូវបានប្រគល់ជូនទៅឲ្យក្រុមគ្រួសារយកទៅធ្វើបុណ្យតាមប្រពៃណី ។ ចំណែកអ្នកបើកបររថយន្តរត់គេចខ្លួនបាត់ក្រោយពេលកើតហេតុ ។ រីឯវត្ថុតាងរថយន្ត និងម៉ូតូបានយកទៅរក្សាទុកនៅអធិការដ្ឋាននគរបាលស្រុកព្រៃនប់ ៕
ចែករំលែកព័តមាននេះ