ខេត្តបាត់ដំបង ៖ សកម្មភាពក្រុមចោរ«ឆក់»ហាក់កំពុងគំរាមកំហែងភ្ញៀវទេសចរបរទេសយ៉ាងខ្លាំង និងគួរឲ្យភ័យខ្លាចបំផុត នារយៈពេលប៉ុន្មានខែចុងក្រោយនេះ នៅក្នុងក្រុងបាត់ដំបង និងនៅតាមបណ្ដាតំបន់ទេសចរណ៍មួយចំនួនទៀតក្នុងខេត្តបាត់ដំបង ខណៈសមត្ថកិច្ចហាក់ខ្វះការប្រុងប្រយ័ត្ន និងគ្មានវិធានការទប់ស្កាត់ឲ្យមានប្រសិទ្ធភាព ។…
ខេត្តបាត់ដំបង ៖ សកម្មភាពក្រុមចោរ«ឆក់»ហាក់កំពុងគំរាមកំហែងភ្ញៀវទេសចរបរទេសយ៉ាងខ្លាំង និងគួរឲ្យភ័យខ្លាចបំផុត នារយៈពេលប៉ុន្មានខែចុងក្រោយនេះ នៅក្នុងក្រុងបាត់ដំបង និងនៅតាមបណ្ដាតំបន់ទេសចរណ៍មួយចំនួនទៀតក្នុងខេត្តបាត់ដំបង ខណៈសមត្ថកិច្ចហាក់ខ្វះការប្រុងប្រយ័ត្ន និងគ្មានវិធានការទប់ស្កាត់ឲ្យមានប្រសិទ្ធភាព ។ ជាពិសេស កម្លាំងនគរបាលក្រុងបាត់ដំបងតែម្ដង ដែលស្ទើរតែគ្មានកម្លាំងចុះប្រតិបត្តិការបំពេញការងារតាមគោលដៅ។
ជាក់ស្ដែង កាលពីវេលាម៉ោង៤រសៀលថ្ងៃទី៧កុម្ភៈ ក្រុមចោរបានជិះម៉ូតូធ្វើសកម្មភាពឆក់យកកាបូបពីជនបរទេសម្នាក់ ដែលជាភ្ញៀវទេសចរជនជាតិបារាំង ពេលកំពុងជិះកង់នៅចំណុចច្រកចូលវត្តពោធិវាល ស្ថិតក្នុងភូមិរតនៈ សង្កាត់រតនៈ ក្រុងបាត់ដំបង ។ ប្រភពពីសមត្ថកិច្ចបានឲ្យដឹងថា គេមិនបានស្គាល់មុខសញ្ញានៃក្រុមចោរដៃស្អិតនោះទេ ហើយក៏មិនបានចំណាំម៉ាកម៉ូតូដែលជនដៃដល់ជិះដែរ តែជនដៃដល់មានពាក់មួកសុវត្ថិភាព ។ ក្រុមចោរបានធ្វើសកម្មភាពឆក់យកកាបូបរបស់ភ្ញៀវទេសចរម្នាក់ក្នុងចំណោមពី៣ទៅ៤នាក់ដែលកំពុងជិះកង់ ។ សមត្ថកិច្ចបានឲ្យដឹងទៀតថា ម្ចាស់កាបូបរងគ្រោះឈ្មោះ ទេពទីត ហ្វីរ៉ាក្លីអូ ភេទស្រី អាយុ៧១ឆ្នាំ ជាភ្ញៀវទេសចរជនជាតិបារាំង ។
បើតាមជនបរទេសរូបនេះបានប្រាប់សមត្ថកិច្ចថា ការបាត់បង់នោះមានកាបូប១ ហើយនៅក្នុងកាបូបនោះមានលុយចំនួន៥០០ដុល្លារលិខិតឆ្លងដែន១ច្បាប់ លេខ13CY89769 និងប័ណ្ណធនាគារចំនួន២សន្លឹក ។ ស្ត្រីបរទេសរូបនេះបានបញ្ជាក់ថា គាត់បានធ្វើដំណើរដោយជិះកង់ម្នាក់មួយជាមួយនឹងក្រុមគាត់ប៉ុន្មាននាក់ទៀត ដើម្បីដើរទស្សនាកន្លែងទេសចរណ៍ប្រវត្តិសាស្ត្រនានានៅក្នុងក្រុងបាត់ដំបង ហើយកាបូបដែលត្រូវពួកចោរឆក់យកទៅនោះ គឺគាត់បានទុកនៅក្នុងកន្ត្រកកង់ខាងមុខ លុះពួកគាត់ជិះដល់ចំណុចខាងលើ ក៏ត្រូវជនដៃដល់ជិះមកឆក់យកទៅបាត់តែម្ដង ។
មានការកត់សម្គាល់ដែរថា កាលពីប៉ុន្មានខែចុងក្រោយក្នុងឆ្នាំ២០១៨ កន្លងទៅ សកម្មភាពចោរឆក់នេះបានប៉ះទង្គិចយ៉ាងខ្លាំងទៅលើភ្ញៀវទេសចរបរទេសដែលកំពុងដើរកម្សាន្តតាមរមណីយដ្ឋាននានា ដូចជានៅស្រុកបាណន់ ស្រុកឯកភ្នំ និងនៅក្នុងក្រុងបាត់ដំបង ជាដើម ។ ប៉ុន្តែក្រោយពីធ្វើការស៊ើបអង្កេត ក្រុមចោរដៃស្អិតមួយចំនួនត្រូវកម្លាំងជំនាញស្នងការដ្ឋានខេត្តបង្ក្រាបបាន រីឯមួយចំនួនទៀតមានសំណាងគេចផុតរហូតមកដល់ពេលនេះ ហើយពួកគេនៅតែបន្តសកម្មភាពទុច្ចរិតនេះដដែលៗទៀត ដោយមិនខ្លាចរអានឹងកម្លាំងសមត្ថកិច្ចឡើយ ។
ជុំវិញសកម្មភាពចោរឆក់ ចោរលួចនេះ មហាជនបានធ្វើការរិះគន់ដោយចង្អុលមុខចំៗទៅលើកម្លាំងអធិការដ្ឋានក្រុងបាត់ដំបងថា ហាក់គ្មានឆន្ទៈពិតប្រាកដ ឬគ្មានវិធានការច្បាស់លាស់ ក្នុងកិច្ចប្រតិបត្តិការទប់ស្កាត់ឬធ្វើការស៊ើបអង្កេតលើមុខសញ្ញាក្រុមជនដៃដល់ ទើបអំពើចោរកម្មបានកើតឡើងដដែលៗ គ្មានថមថយសោះ ។
ស្របគ្នានឹងការលើកឡើងរបស់មហាជននេះ សមត្ថកិច្ចមួយចំនួនដែលដឹងអំពីស្ថានភាពកម្លាំងអធិការដ្ឋាននគរបាលក្រុងបាត់ដំបងនាបច្ចុប្បន្ននេះ ក៏បានលើកឡើងស្រដៀងគ្នានេះដែរ ។ មន្ត្រីមួយចំនួនបានបង្ហើបឲ្យដឹងថា សព្វថ្ងៃកម្លាំងអធិការដ្ឋានក្រុងបាត់ដំបងមានមុខច្រើនគ្រាន់បើតែនៅថ្ងៃគោរពទង់ជាតិប៉ុណ្ណោះ ។
លុះគោរពទង់ជាតិចប់ក៏ចាប់ផ្ដើមបាត់មុខអស់ពីក្នុងអធិការដ្ឋានភ្លាមៗដែរ ។ អំពើចោរកម្មដែលកំពុងកើតមានសព្វថ្ងៃនេះ មានដូចជា ចោរលួច ចោរឆក់ ចោរកាច់សោលួចម៉ូតូ ជាពិសេសចោរគាស់ផ្ទះកើតមានស្ទើរទាំងយប់ទាំងថ្ងៃ បើទោះជាករណីខ្លះត្រូវកម្លាំងការិយាល័យជំនាញ នៃស្នងការដ្ឋាននគរបាលខេត្តបង្ក្រាបបានជាបន្តបន្ទាប់ក្ដី ក៏បទល្មើសនេះហាក់គ្មានការថមថយដែរ ដែលធ្វើឲ្យប្រជា
ពលរដ្ឋព្រួយបារម្ភខ្លាំងបំផុត ។
ទោះបីយ៉ាងណាជុំវិញករណីជនមិនស្គាល់សាវតារធ្វើសកម្មភាពឆក់ទ្រព្យសម្បត្តិជនបរទេសខាងលើនេះ បើតាមលោកឧត្តមសេនីយ៍ត្រី ជេត វណ្ណនី បានមានប្រសាសន៍ថា ពេលនេះយើងមិនទាន់កំណត់បាននូវមុខសញ្ញាជនសង្ស័យនៅឡើយទេ តែកម្លាំងជំនាញបាននិងកំពុងដុតដៃដុតជើង ដើម្បីធ្វើការស្រាវជ្រាវហើយ ៕
ចែករំលែកព័តមាននេះ