ខេត្តស្ទឹងត្រែង ៖ ស្ទឹងត្រែងជាខេត្តមួយនៅភាគឦសានប្រទេសកម្ពុជា ដែលសម្បូដោយសម្បត្តិធម្មជាតិ និងមានសក្តានុពលវិស័យទេសចរណ៍បែបធម្មជាតិ។ តាមរយៈផល ប្រយោជន៍ដែលផ្តល់ដោយធម្មជាតិស្រាប់បែបនេះ ធ្វើឱ្យខេត្តស្ទឹងត្រែងមានតំបន់រមណីយដ្ឋាន ទេសចរធម្មជាតិដ៏ប្រណីតចំនួន២៤កន្លែងបាននិងកំពុងទាក់ទាញភ្ញៀវចូលមកលេងកម្សាន្ត ពិសេសក្នុងអំឡុងពិធីបុណ្យចូលឆ្នាំចិន-វៀតណាម។
ក្នុងពិធីបុណ្យចូលឆ្នាំថ្មីប្រពៃណីចិន-វៀតណាម រយៈពេល៣ថ្ងៃនេះ គឺចាប់ពីថ្ងៃទី៤ ដល់ថ្ងៃ ទី៧ ខែកុម្ភៈ២០១៩នេះ គេបានសង្កេតឃើញភ្ញៀវទេសចរមកលេកម្សាន្តនៅក្នុងទឹកដីខេត្តស្ទឹងត្រែង យ៉ាងច្រើនកុះករ ជាពិសេសនៅតាមរមណីយដ្ឋានធម្មជាតិជាច្រើនកន្លែង។
ភ្ញៀវដែលមកពីតាមបណ្ដាលខេត្តនានបានអោយដឹងថា បុណ្យចូលឆ្នាំចិនឆ្នាំនេះ ពួកគាត់មានអារម្មណ៏សប្បាយរីករាយខ្លាំងណាស់ ដោយសារឆ្នាំនេះមកលេងកម្សាន្តនៅ រមណីយដ្ឋានធម្មជាតិនានាក្នុងក្រុងស្ទឹងត្រែងមានការរៀបចំយ៉ាងល្អ ជាពិសេសមានកន្លែងអង្គុយ សម្រាកលំហែកាយមានអនាម័យ មានខ្យល់ឱកាសបរិសុទ្ធ មានវាលខ្សាច់ធំល្វឹងល្វើយ មានកន្លែង ងូតទឹកលេងយ៉ាងត្រជាក់ជាប់ចិត្ត។
លោក អ៊ុន ប៉ោសឿន ប្រធានមន្ទីរទេសចរណីខេត្តស្ទឹងត្រែងបានអោយដឹងដែរថា ពិធីបុណ្យចូលឆ្នាំចិន-វៀតណាម ឆ្នាំនេះភ្ញៀវបានចូលមកលេងកម្សាន្តមានការកើនឡើងច្រើន។
លោកបានបន្តថា ការកើនឡើងភ្ញៀវនាឆ្នាំនេះ ដោយសារតែប្រទេសជាតិមានសុខសន្តិភាព ប្រជាពលរដ្ឋមានជីវភាពធូរធារ ហើយម្យ៉ាងខាងមន្ទីរបានរៀបចំនៅតាមរមណីយដ្ឋានីមួយៗ មានរបៀបរៀបរយ និងមានសន្តិសុខ សុវត្ថិភាពជូនដល់ភ្ញៀវ ដែលជាកត្តានាំអោយភ្ញៀវមកលេងជាង២ម៉ឺននាក់ គឺមានការកើនឡើងលើសពីឆ្នាំ២០១៨ រហូតដល់៣៨,៨៩% ក្នុងរយៈពេល៣ថ្ងៃនេះ។ ក្នុងនោះតំបន់កម្សាន្តដែលបានទាក់ទាញមកលេងច្រើនមានដូចជា រមណីយដ្ឋាន កោះខ្សាច់សេកុង បុប្ផាភ្លុក ជួរចាប សម្រស់ធម្មជាតិកោះខេ និងរមណីយដ្ឋានអូរឬស្សីកណ្ដាល។
លោកប្រធានមន្ទីរក៏បានធ្វើការណែនាំដល់អ្នកគ្របគ្រងតាមរម្មណីយដ្ឋានទាំងអស់ អោយរៀបចំវេចខ្ចប់សំរាម កាកសំណល់ ទុកដាក់អោយបានត្រឹមត្រូវផងដែរ ដើម្បីរក្សាបាន នូវបរិស្ថាន ស្អាត ល្អ និងមិនប៉ះពាល់ទៅដល់សុខភាពប្រជាពលរដ្ឋ ក៏ដូចជាធនធាន ជីវៈចំរុះក្នុងតំបន់៕
ចែករំលែកព័តមាននេះ