ខេត្តប៉ៃលិន ៖ នារដូវបុណ្យចូលឆ្នាំចិនឈានចូលមកដល់ គេសង្កេតឃើញភ្ញៀវទេសចរណ៍ជាច្រើននាក់ បានសម្រុកនាំគ្នាចូលទៅដើរលេងនៅតាមរមណីយដ្ឋាននានាក្នុងខេត្តប៉ៃលិន ជាពិសេសគឺ រមណីយដ្ឋាន ចម្ការខ្នុរ និងរមណីយដ្ឋានទឹកធ្លាក់អូរតាវ៉ៅ ហៅទឹកធ្លាក់ភ្នំខៀវជាដើម។
បើទោះបីជាផ្លូវទៅលេងទឹកធ្លាក់ ភ្នំខៀវ ត្រូវអាជ្ញាធរខេត្តកំពុងរៀបចំធ្វើការឈូសឆាយក៏ដោយ ក៏ភ្ញៀវនាំគ្នាបើកបរម៉ូតូ និងរថយន្ត ចូលទៅលេងយ៉ាងច្រើនកុះករ។ បើតាមរបាយការណ៍ពីលោក លឹម វាសនា ប្រធានមន្ទីរទេសចរណ៍ ខេត្តប៉ៃលិន បានបញ្ជាក់ឱ្យដឹងថា កាលពីថ្ងៃទី០៥ ខែកុម្ភៈ ឆ្នាំ២០១៩ ចំនួនភ្ញៀវទេសចរណ៍ ដែលមកទស្សនាកម្សាន្ត នៅតាមរមណីយដ្ឋាននានា ក្នុងខេត្តប៉ៃលិន នាឱកាសបុណ្យចូលឆ្នាំចិន-វៀតណាម មានដូចជា ៖
ទី១-រមណីយដ្ឋានភ្នំលោកយាយយ៉ាត មានភ្ញៀវជាតិមានចំនួន១,៧៧២នាក់ ភ្ញៀវអន្តរជាតិមានចំនួន៤០នាក់។ ទី២-រមណីយដ្ឋានទឹកធ្លាក់ភ្នំខៀវ មានភ្ញៀវទេសចរណ៍ជាតិចំនួន ១,៦៣២នាក់ ភ្ញៀវអន្តរជាតិមានចំនួន០២នាក់។ ទី៣-រមណីយដ្ឋានភ្នំដំបង មានភ្ញៀវទេសចរណ៍ ជាតិចំនួន៧៦២នាក់ ភ្ញៀវអន្តរជាតិមានចំនួន០៣នាក់។ ទី៤-រមណីយដ្ឋានចម្ការខ្នុរ និងម្លប់សាវម៉ាវ មានភ្ញៀវទេសចរណ៍ជាតិចំនួន ២,២៣៥នាក់ ទី៥-រមណីយដ្ឋានអាងជីងចក់ និងរហាត់ទឹក មានភ្ញៀវទេសចរណ៍ជាតិចំនួន១២៣នាក់ និងទី៦-តំបន់លំហែកាយ មាត់ស្ទឹងតារៀប មានភ្ញៀវជាតិ ចំនួន៧៣២នាក់ ភ្ញៀវអន្តរជាតិមានចំនួន០១នាក់។
ប្រភពបន្តទៀតថា ចំនួនភ្ញៀវទេសចរណ៍ជាតិសរុប មានចំនួន៧,២៥៧នាក់ ហើយចំនួនភ្ញៀវអន្តរជាតិសរុបមានចំនួន៤៦នាក់។ ចំពោះសុវត្ថិភាព និងសណ្តាប់ធ្នាប់សាធារណៈ មានលក្ខណៈល្អប្រសើរ ដោយពុំមានបញ្ហាករណីគ្រោះថ្នាក់ អ្វីគួរឱ្យកត់សម្គាល់នោះទេ។ ចំណែកឯរមណីយដ្ឋានប្រវត្តិសាស្ត្រភ្នំយ៉ាត ក៏មានភ្ញៀវទេសចរណ៍ជាតិ និងអន្តរជាតិ ចូលមកលេង និងដុតធូបផ្សងយ៉ាងច្រើនគួរឱ្យកត់សម្គាល់៕ ដោយ ៖ នី យ៉ា
ចែករំលែកព័តមាននេះ