រាជធានីភ្នំពេញ ៖ នៅប៉ុន្មានឆ្នាំចុងក្រោយនេះ ការវិនិយោគរបស់វិស័យឯកជនទៅលើការបណ្តុះបណ្តាលចំណេះដឹងពីក្រោមថ្នាក់មត្ដេយ្យរហូតដល់ថ្នាក់ឧត្តមសិក្សា មានការបោះទុនវិនិយោគកាន់តែធំឡើងៗ ដើម្បីឆ្លើយតបទៅតាមស្តង់ដាអប់រំ និងការទាក់ទាញចំណាប់អារម្មណ៍ពីសាធារណជន ។ នេះបើតាមប្រធានក្រុមប្រឹក្សាភិបាលនៃមជ្ឈមណ្ឌលភាសាអេ អាយ…
រាជធានីភ្នំពេញ ៖ នៅប៉ុន្មានឆ្នាំចុងក្រោយនេះ ការវិនិយោគរបស់វិស័យឯកជនទៅលើការបណ្តុះបណ្តាលចំណេះដឹងពីក្រោមថ្នាក់មត្ដេយ្យរហូតដល់ថ្នាក់ឧត្តមសិក្សា មានការបោះទុនវិនិយោគកាន់តែធំឡើងៗ ដើម្បីឆ្លើយតបទៅតាមស្តង់ដាអប់រំ និងការទាក់ទាញចំណាប់អារម្មណ៍ពីសាធារណជន ។ នេះបើតាមប្រធានក្រុមប្រឹក្សាភិបាលនៃមជ្ឈមណ្ឌលភាសាអេ អាយ អាយ បានលើកឡើង ។
លោកឧកញ៉ា គួច ម៉េងលី ប្រធានក្រុមប្រឹក្សាភិបាល និងជាអគ្គនាយកប្រតិបត្តិនៃមជ្ឈមណ្ឌលភាសា អេ អាយ អាយ ប្រាប់ក្រុមអ្នកសារព័ត៌មានកាលពីថ្ងៃទី៣០ ខែមករា កន្លងមកថា នៅក្នុងរយៈពេល៥ឆ្នាំកន្លងមកនេះ ការចូលរួមពីវិស័យឯកជនក្នុងវិស័យអប់រំ ពិសេសចំណេះដឹងទូទៅក្រោមថ្នាក់មតេ្តយ្យទៅដល់ ថ្នាក់វិទ្យាល័យ គឺមានកំណើនខ្ពស់ ដោយសារទទួលបានគាំទ្រពីរដ្ឋមន្ត្រីក្រសួងអប់រំ និងមានការរុញច្រានពីរាជរដ្ឋាភិបាលកម្ពុជា។ ដូច្នេះ ជាហេតុធ្វើឱ្យវិស័យឯកជនមានការចូលរួមបោះទុនវិនិយោគច្រើនដើម្បីចូលរួមអភិវឌ្ឍន៍ប្រទេសជាតិ ។
លោកឧកញ៉ា លើកឡើងថា ៖« ១០ឆ្នាំមុនការអប់រំមិនថាវិស័យឯកជនឬរដ្ឋនោះទេ គឺយើងនៅមានការខ្វះខាតនិងត្រូវការបង្រឹងថែមទៀត ដើម្បីប្រកួតប្រជែងជាមួយប្រទេសជិតខាង ប៉ុន្តែក្នុងរយៈពេល៥ឆ្នាំចុងក្រោយនេះ មិនថារដ្ឋឬឯកជនទេ គុណភាពអប់រំវាមិនសូវខុសគ្នាប៉ុន្មានទេ អាស្រ័យលើការនិយមរបស់អាណាព្យាបាល គាត់ចង់ឱ្យកូនរៀននៅរដ្ឋឬឯកជន »។
លោក ឌី ខាំបូលី មន្ត្រីអ្នកនាំពាក្យក្រសួងអប់រំ យុវជននិងកីឡាមានប្រសាសន៍ថា ការចូលរួមវិនិយោគលើវិស័យអប់រំ តាមរយៈវិស័យឯកជន មានការចាំបាច់ក្នុងការអភិវឌ្ឍ ហើយកន្លងមកយើងឃើញថាមានការកើនឡើងនៅគ្រប់កម្រិតសិក្សាទាំងអស់រាប់ពីថ្នាក់មតេយ្យដល់ឧត្តមសិក្សា ។ លោកបញ្ជាក់ថា ៖« មកដល់ឆ្នាំ២០១៨ គ្រឹះស្ថានអប់រំនៅទូទាំងប្រទេសមានប្រមាណជាង១,៣ម៉ឺនសាលា ក្នុងនោះសាលាបឋមសិក្សាមានប្រមាណ៨ពាន់សាលា, អនុវិទ្យាល័យ១,៣ពាន់ និងវិទ្យាល័យមានជាង៥០០ ។ ចំណែកគ្រឹះស្ថានអប់រំវិស័យឯកជនមានប្រមាណ១.២២០សាលានៅគ្រប់កម្រិតសិក្សា »។
លោកលើកឡើងថា ៖« កន្លងមកក៏ដូចបច្ចុប្បន្ននេះ ការចុះឈ្មោះចូលរៀននៅសាលឯកជនច្រើនឬរដ្ឋច្រើន វាមិនមែនជាបញ្ហានោះទេ ព្រោះប្រទេសយើងគោរពតាមទីផ្សារសេរី។ អ្នកណាធ្វើបានល្អ អ្នកនោះទទួលបានផល តែបច្ចុប្បន្នសាលារដ្ឋយើងក៏មានការរីកចម្រើនមិនអន់ជាងសាលាឯកជនប៉ុន្មានដែរ ហើយនៅថ្ងៃអនាគត ក្រសួងបង្កើនគុណភាព ប្រសិទ្ធភាព និងការគ្រប់គ្រងក៏ដូចការបង្រៀន និងការរៀន។ ជាក់ស្តែនៅសាលាជំនាន់ថ្មីដែលបានបង្កើតឡើងចំនួន១១សាលានៅទូទាំងប្រទេស គឺមានមាតាបិតាយកកូនមកចុះឈ្មោះចូលរៀនច្រើន សឹងតែរកមិនបន្ទប់ឱ្យរៀនគ្មាន »។
បើតាមមន្ត្រីអ្នកនាំពាក្យ ក្រសួងមានយុទ្ធសាស្ត្រអប់រំ ក្នុងការពង្រីកវិសាលភាព គុណភាពអប់រំនេះ មានគ្រប់កម្រិត និងគ្រប់ផ្នែកទាំងអស់នៃអនុវិស័យអប់រំនេះ។ ក្រសួងបានរៀបចំផែនការយុទ្ធសាស្ត្ររយៈពេល៥ឆ្នាំ ពីឆ្នាំ២០១៩ដល់ឆ្នាំ២០២៣ ដើម្បីធានាឱ្យមានកំណើននៃការចុះឈ្មោះចូលរៀន, អត្រាបញ្ចប់ការសិក្សាកើនឡើង ក៏ដូចកាត់បន្ថយអត្រាបោះបង់ការសិក្សារបស់សិស្សឱ្យបានកាន់តែល្អប្រសើរ ៕
ចែករំលែកព័តមាននេះ