ខេត្តព្រៃវែង ៖ ជាប្រពៃណីទំនៀមទម្លាប់របស់បងប្អូនជនជាតិចិនក៏ដូចជា បងប្អូនខ្មែរកាត់ខ្សែស្រឡាយចិន វៀតណាម នៅក្នុងឪកាសបុណ្យចូលឆ្នាំថ្មីប្រពៃណីចិន វៀតណាម ពួកគាត់តែងតែនាំគ្នាទិញនូវរបស់របរជាច្រើនសម្រាប់ធ្វើការសែនព្រេនដល់ដូនតា និងសែនទទួលទេវតាឆ្នាំថ្មី ហើយសាច់សត្វដូចជា មាន់ ទា និងជ្រូក គឺជាអាហារដ៏ពេញនិយមបំផុតដែលមិនអាចខ្វះបាន ។
លោក ចិន វិសាល ប្រធានការិយាល័យបសុព្យាបាលនៃមន្ទីរកសិកម្មរុក្ខាប្រមាញ់ និងនេសាទ ខេត្តព្រៃវែងបានអោយដឹង កាលពីព្រឹកថ្ងៃទី១ កុម្ភៈ ថា ក្នុងឪកាសបុណ្យចូលឆ្នាំចិននេះសត្វជ្រូក មាន់ ទា ជាច្រើនត្រូវបានក្រុមឈ្មួញដឹកជញ្ជូនពីតាមបណ្តាស្រុកនានាយកទៅលក់នៅលើទីផ្សារ ជាពិសេសក្នុងរាជធានីភ្នំពេញដែលការដឹកជញ្ជូនបម្លាស់ទីសត្វទាំងនេះអាចនឹងមានបញ្ហាប្រឈមជាច្រើន ហើយឪកាសនៃការឆ្លងជម្ងឺផ្សេងៗពីសត្វមួយទៅសត្វមួយទៀតក៏មានច្រើនដែរ ។
លោកបានបញ្ជាក់ថា ដើម្បីការពារបញ្ហានេះក៏ដូចជា ដើម្បីការពារសុខមាលភាពរបស់បងប្អូនប្រជាពលរដ្ឋលោកបានដឹកនាំមន្ត្រីជំនាញបសុពេទ្យខេត្តចុះធ្វើការត្រួតពិនិត្យ និងបាញ់ថ្នាំការពារជម្ងឺទៅលើសត្វ និងមធ្យោបាយដឹកជញ្ជួនសត្វគ្រប់ប្រភេទនៅលើកំណាត់ផ្លូវជាតិលេខ១ ត្រង់ចំណុចខាងលិចផ្សារកំពង់សឹង្ហ ក្នុងស្រុកព្រះស្តេច ខេត្តព្រៃវែង កាលពីព្រឹកថ្ងៃទី១ កុម្ភៈ ក្នុងគោលបំណង ដើម្បីធានាថា សត្វមាន់ ទា ជ្រូក ទាំងអស់ដែលលក់នៅលើទីផ្សារ គឺគ្មានជម្ងឺ ហើយបងប្អូនប្រជាពលរដ្ឋ អាចទិញយកទៅពិសារដោយគ្មានការព្រួយបារម្ភ ។
លោក ចិន វិសាល បានបន្តទៀតថា សម្រាប់ឆ្នាំនេះឈ្មួញដឹកជ្រូកទៅលក់នៅលើទីផ្សារច្រើនជាងឆ្នាំមុនដោយភាគច្រើន គឺជាប្រភេទជ្រូកសាច់ និងជ្រូកខ្វៃ ដោយឡែកសត្វមាន់ ទា ឆ្នាំនេះថយចុះជាងឆ្នាំមុន ដោយអាចមកពីតម្រូវការសែនព្រេនត្រូវការជ្រូកច្រើនជាងមាន់ និងទា ៕
ចែករំលែកព័តមាននេះ