ខេត្តព្រៃវែង ៖ សំរាប់ឆ្នាំ២០១៨ សភាពការណ៌សន្តិសុខនៅទូទាំងខេត្តព្រៃវែង មានភាពល្អប្រសើរបទល្មើសផ្សេងៗ មានការថយចុះគួរអោយកត់សំគាល់ ប៉ុន្តែក្នុងនោះករណីរំលោភសម្លាប់ បែរជាកើនឡើង ដូច្នេះសូមអោយលោកស្នងការនគរបាលខេត្តព្រៃវែងថ្មី ត្រូវធ្វើយ៉ាងណា ទប់ស្កាត់ករណីនេះអោយខាងតែបាន។ នេះគឺជាប្រសាសន៍របស់លោកនាយឧត្តមសេនីយសន្តិបណ្ឌិត នេត សាវឿន អគ្គស្នងការនគរបាលជាតិថ្លែងក្នុងពិធីប្រកាសផ្ទេរភារកិច្ច និងតែងតាំងមុខតំណែងស្នងការ នៃស្នងការដ្ឋាននគរបាលខេត្តព្រៃវែង ដែលធ្វើឡើងកាលពីព្រឹកថ្ងៃទី១ កុម្ភៈ នៅក្នុងសាលប្រជុំអគារកាកបាទក្រហមខេត្តព្រៃវែង។
លោកនាយឧត្តមសេនីយបានសង្កត់ធ្ងន់ថា ករណីរំលោភនេះ មិនថាតែនៅខេត្តព្រៃវែងទេ នៅខេត្តដទៃទៀតក៏ដូចគ្នាដែរ កន្លងមកធ្លាប់មានលិចលឺពាក្យចរចាមអារាមថា មន្ត្រីនគរបាលបានដើរតួជាអាជ្ញាកណ្តាល នៅក្នុងការសម្របសម្រួលបញ្ចប់រឿង ចំពោះករណីនេះគឺមិនត្រូវអោយមានជាដាច់ខាត បើទោះបីជាភាគីទាំងសងខាងព្រមព្រៀងសម្របសម្រួលក៏ដោយ មន្ត្រីនគរបាលមិនត្រូវចូលរួមពាក់ពន្ធ័នោះទេ គឺត្រូវតែកសាងសំណុំរឿង ចាត់ការទៅតាមនិតិវិធី និងភារកិច្ចរបស់ខ្លួន។
ជាមួយគ្នានោះដែរ លោកនាយឧត្តមសេនីយសន្តិបណ្ឌិត នេត សារឿន ក៏បានលើកឡើងដែរថា សំរាប់ខេត្តព្រៃវែង ក្រៅពីមានការកើនឡើងនៃករណីរំលោភសម្លាប់ បញ្ហារន្ទះបាញ់ និងករណីគ្រឿងញៀន ក៏មិនទាន់មានការថយចុះនោះដែរ ដូច្នេះកំលាំងនគរបាលទាំងអស់ ជាពិសេសកំលាំងអធិការស្រុក និងប៉ូស្ត៌រដ្ឋត្រូវបង្កើនការផ្សព្វផ្សយអោយបានច្រើន ពាក់ព័ន្ធនិងការបង្ការនិងបញ្ចៀសពីករណីរន្ទះបាញ់ ក៏ដូចជាការបង្ការទប់ស្កាត់ការចរាចរណ៍ ចែកចាយនិងប្រើប្រាស់ថ្នាំញៀននៅក្នុងមូលដ្ឋានផងដែរ ។
ចែករំលែកព័តមាននេះ