ឆ្នាំ​2018 ពន្ធដារ​ប្រមូល​ចំណូល​បាន​ជាង​2​ពាន់​លាន​ដុល្លារ


រាជធានី​ភ្នំពេញ ៖ ក្នុង​ឆ្នាំ​២០១៨​កន្លង​ទៅ​នេះ អគ្គនាយកដ្ឋាន​ពន្ធដារ បាន​ប្រមូល​ចំណូល​ពន្ធ​-​អាករ (​តាម​ប្រព័ន្ធ​គ្រប់គ្រង​ទិន្នន័យ​ចំណូល​អន​ឡាញ​) បាន​ចំនួន​៨.៧៩១,៤០​ប៊ី​លាន​រៀល ឬ​ប្រមាណ​២.១៩៧,៨៥​លាន​ដុល្លារ ស្មើនឹង​១១៤,២៧% បើ​ធៀប​នឹង​រយៈពេល​ដូច​គ្នា​នៃ​ឆ្នាំ​២០១៧ កើន​១៣,៣៧% ។

នេះ​បើ​តាម​សេចក្ដី​ប្រកាស​ព័ត៌មាន របស់​អគ្គនាយកដ្ឋាន​ពន្ធដារ​នៅ​ក្នុង​កិច្ចប្រជុំ​បូក​សរុប​លទ្ធផល ប្រមូល​ចំណូល​ពន្ធ​ប្រចាំ​ខែធ្នូ ប្រចាំឆ្នាំ​២០១៨ និង​សមិទ្ធផល​៥​ឆ្នាំ ព្រមទាំង​ទិស​ដៅ​សម្រាប់​អនុវត្ត​បន្ត​សម្រាប់​ឆ្នាំ​២០១៩ របស់​អគ្គនាយកដ្ឋាន​ពន្ធដារ កាលពី​ថ្ងៃ​ទី​២៩ ខែមករា ឆ្នាំ​២០១៩ កន្លង​មក ។

ប្រតិភូ​រាជរដ្ឋាភិបាល​ទទួល​បន្ទុក​ជា​អគ្គនាយក​នៃ​អគ្គនាយកដ្ឋាន​ពន្ធដារ​លោក គង់ វិបុល បាន​បង្ហាញ​ថា ក្នុង​ខែធ្នូ ឆ្នាំ​២០១៨ ចំណូល​ពន្ធ​-​អាករ ដែល​អគ្គនាយកដ្ឋាន​ពន្ធដារ​ប្រមូល​បាន (​តាម​ប្រព័ន្ធ​គ្រប់គ្រង​ទិន្នន័យ​ចំណូល​អន​ឡាញ Online របស់​អគ្គនាយកដ្ឋាន​ពន្ធដារ​) មាន​ប្រមាណ​ជា​១៤២,៥២​លាន​ដុល្លារ​ស្មើនឹង​៧,៤១%​នៃ​ផែនការ​ប្រចាំឆ្នាំ បើ​ធៀប​នឹង​ចំណូល​ពន្ធ​-​អាករ ប្រចាំ​ខែធ្នូ ឆ្នាំ​២០១៧ ឃើញ​ថា កើនឡើង​ប្រមាណ​៣១,៤៤​លាន​ដុល្លារ ស្មើនឹង​២៨,៣១%​។

លោក​បញ្ជាក់​ថា សរុប​រយៈពេល​១២​ខែ ឆ្នាំ​២០១៨ ចំណូល​ពន្ធ​-​អាករ ដែល​អគ្គនាយកដ្ឋាន​ពន្ធដារ​ប្រមូល​បាន (​តាម​ប្រព័ន្ធ​គ្រប់គ្រង​ទិន្នន័យ​ចំណូល​អន​ឡាញ​) មាន​ចំនួន​៨,៧៩១.៤០​ប៊ី​លាន​រៀល ស្មើ​ប្រមាណ​២.១៩៧,៨៥​លាន​ដុល្លារ ស្មើនឹង​១១៤,២៧% នៃ​ផែនការ​ប្រចាំឆ្នាំ ដែល​ក្នុង​នោះ ទំហំ​ចំណូល​លើស​ផែនការ ស្មើនឹង​ប្រមាណ​២៧៤,៤៧​លាន​ដុល្លារ បើ​ធៀប​នឹង​រយៈពេល​ដូច​គ្នា​នៃ​ឆ្នាំ​២០១៧ ឃើញ​ថា ចំណូល​ពន្ធ​-​អាករ សម្រាប់​រយៈពេល​១២​ខែ ឆ្នាំ​២០១៨ កើនឡើង​ប្រមាណ​ជា​២៥៩,១៥​លាន​ដុល្លារ ស្មើនឹង​១៣,៣៧% ។ លោក​បន្ថែម​ថា ក្នុង​រយៈពេល​៥​ឆ្នាំ​ចុង​ក្រោយ​នេះ អគ្គនាយកដ្ឋាន​ពន្ធដារ​សម្រេច​បាន​នូវ​កំណើន​ចំណូល​ពន្ធ ក្នុង​រង្វង់​ប្រមាណ ២០%​ក្នុង​មួយ​ឆ្នាំ ក្នុង​នោះ​ឆ្នាំ​២០១៤ បាន​ប្រមាណ​១.០៦៧​លាន​ដុល្លារ​, ឆ្នាំ​២០១៥ បាន​ប្រមាណ​១.៣០២​លាន​ដុល្លារ​, ឆ្នាំ​២០១៦ បាន​ប្រមាណ​១.៥០២.៦២​លាន​ដុល្លារ​, ឆ្នាំ​២០១៧ បាន​ប្រមាណ​១.៩៧៦.៦៤​លាន​ដុល្លារ និង​ឆ្នាំ​២០១៨ បាន​ប្រមាណ​២.១៩៧.៨៥​លាន​ដុល្លារ ។

នៅ​ក្នុង​ឱកាស​នោះ​ដែរ លោក​អគ្គបណ្ឌិត​សភាចា​រ្យ អូន ព័ន្ធ​មុនី​រ័​ត្ន ឧបនាយករដ្ឋមន្ត្រី រដ្ឋមន្ត្រីក្រសួង​សេដ្ឋកិច្ច និង​ហិរញ្ញវត្ថុ បាន​ដាក់​ចេញ​នូវ​វិធានការ​សំខាន់​ៗ​ដើម្បី​ឲ្យ​អគ្គនាយកដ្ឋាន​ពន្ធដារ​ធានា​បាន​នូវ​ប្រសិទ្ធភាព​ក្នុង​ការ​អនុវត្ត​ការ​ប្រមូល​ចំណូល​ពន្ធ និង​ឈាន​ទៅ​សម្រេច​ឱ្យ​បាន​លើស​ផែនការ​ឱ្យ​បានជា​អតិបរមា និង​ផ្តាំផ្ញើ​ដល់​ថ្នាក់ដឹកនាំ​និង​មន្ត្រី​ពន្ធដារ​គ្រប់​លំដាប់​ត្រូវ​ប្រកាន់ខ្ជាប់​នូវ​បាវចនា​-​គោលការណ៍​រួម​៤​ចំណុច​សំខាន់​ៗ ក្នុង​ការ​បំពេញការងារ​រួម​មាន ៖ កៀរគរ​ប្រមូល​ឱ្យ​អ្នក​ជាប់ពន្ធ​ចូល​ក្នុង​ប្រព័ន្ធ​រួម​មួយ​, ធ្វើ​ឱ្យ​អ្នក​ជាប់ពន្ធ​ងាយស្រួល​ក្នុង​ការ​បង់ពន្ធ​, រៀបចំ​ប្រព័ន្ធ​ការងារ​ឱ្យ​លំបាក​សម្រាប់​ការ​គេចវេះ​ពន្ធ និង​ធានា​ឱ្យ​បាន​នូវ​ការ​ប្រកួតប្រជែង​ដោយ​ស្មើភាព សមធម៌​ក្នុង​ការ​បង់ពន្ធ និង​យុត្តិធម៌​សង្គម ៕

Facebook Google Twitter Email

សូម​ subscribe Channel Youtube របស់​កោះ​សន្តិភាព​លោក​​អ្នក​នឹង​ទទូល​បាន​ព័ត៌មាន​ជា​វីដេអូ​ថ្មី​ៗ​បន្ថែម​ទៀត សូម​អគុណ!!!!!

ព័ត៌មាន​ជាតិ

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

ការស្ទង់មតិគេហទំព័រថ្មី




សូម​អរគុណ