ខេត្តបាត់ដំបង ៖ អ្នកទោសឧក្រិដ្ឋម្នាក់ ក្នុងចំណោម៥នាក់ ដែលហែកគុករត់ចេញកាលពីអំឡុងខែមេសា ឆ្នាំ២០១២កន្លងទៅ នៅខេត្តបាត់ដំបង ត្រូវសមត្ថកិច្ចខេត្តសៀមរាប ចាប់ខ្លួនបានកាលពីយប់ថ្ងៃទី៤ សីហា ក្រោយពីជននេះបង្កការអុកឡុកក្នុងភោជនីយដ្ឋានមួយនៅចំកណ្តាលបេះដូងក្រុងសៀមរាប ហើយក៏បានបញ្ជូនមកចូលគុកនៅខេត្តបាត់ដំបងវិញ នៅវេលាយប់ថ្ងៃទី៦ សីហា ។ នេះបើយោងតាមប្រសាសន៍របស់លោក ជេត វណ្ណនី ស្នងការរងនគរបាលខេត្តបាត់ដំបង ។
លោក ជេត វណ្ណនី បានឱ្យដឹងថា ទណ្ឌិតនោះឈ្មោះ កែវ ឡុង អាយុ៣១ឆ្នាំ មានស្រុកកំណើតនៅក្នុងភូមិពួក ឃុំពួក ស្រុកពួក ខេត្តសៀមរាប តែស្នាក់នៅអចិន្ត្រៃយ៍នៅក្នុងភូមិព្រែកព្រះស្តេច សង្កាត់ព្រែកព្រះស្តេច ក្រុងបាត់ដំបង ។ លោកបន្តថា ជនឈ្មោះ កែវ ឡុង ជាអ្នកទោសឧក្រិដ្ឋ ដែលបានហែកគុករត់ចេញពីខេត្តបាត់ដំបង ជាមួយទណ្ឌិត៤នាក់ទៀត កាលពីអំឡុងខែមេសា ឆ្នាំ២០១២កន្លងទៅ ។ លោកឱ្យដឹងទៀតថា សមត្ថកិច្ចបានតាមប្រមាញ់មិនឈប់ឈរ រហូតមកដល់ពេលនេះ តាមដីការបស់តុលាការ លុះនៅយប់ថ្ងៃទី៤ សីហា ទើបសមត្ថកិច្ចខេត្តសៀមរាប ចាប់ខ្លួនក្រុមនេះបានម្នាក់ ដោយសារជននេះទៅបង្កការអុកឡុកក្នុងភោជនីយដ្ឋានមួយ ។ លោក ជេត វណ្ណនី បន្ថែមថា លោកស្នងការនគរបាលខេត្ត បានចាត់កម្លាំងឱ្យទៅទទួលយកទណ្ឌិតម្នាក់នេះពីសមត្ថកិច្ចខេត្តសៀមរាប នាំមកបញ្ចូលក្នុងពន្ធនាគារខេត្តបាត់ដំបងវិញហើយ កាលពីយប់ថ្ងៃទី៦ សីហា ។ ប៉ុន្តែលោកបញ្ជាក់ដែរថា លោកស្នងការនគរបាលខេត្ត បានចាត់កម្លាំងជំនាញឱ្យចុះទៅសួរនាំទណ្ឌិតរូបនោះបន្ថែមទៀត ដល់ក្នុងពន្ធនាគារ ដើម្បីស្រាវជ្រាវរកបក្ខពួកបន្តទៀត ។
ស្តាប់អ្នកទោសឧក្រិដ្ឋ កែវ ឡុង រៀបរាប់ក្រោយការហែកគុករត់ យោងតាមការផ្តល់ព័ត៌មានពីមន្ត្រីជំនាញដែលចុះទៅសួរនាំទណ្ឌិត កែវ ឡុង ដល់ក្នុងពន្ធនាគារ ជននេះនិយាយថា ក្រោយពីរត់ចេញពីពន្ធនាគារខេត្តបាត់ដំបង ជាមួយគូកន៤នាក់ទៀត ខ្លួនបានទៅសម្ងំលាក់ខ្លួនមួយរយៈនៅខេត្តសៀមរាប និងរាជធានីភ្នំពេញ បែកពីក្រុមទណ្ឌិតដទៃទៀត ។ ដោយឃើញស្ថានភាពស្ងប់ស្ងាត់ ខ្លួនក៏បានទាក់ទងអ្នកស្គាល់មួយចំនួន ដើម្បីចូលធ្វើជាអ្នកយកព័ត៌មានឱ្យអង្គភាពកាសែត «ជីវិតថ្មី» ដែលមានចាងហ្វាងឈ្មោះ ឆេង ។ ជននេះបន្តថា ខ្លួនត្រូវចាងហ្វាងផ្តល់ឋានៈជាអ្នកយកព័ត៌មានទូទាំង២៤រាជធានី-ខេត្ត ដោយប្តូរពីឈ្មោះ កែវ ឡុង មក ចាន់ ពាវ វិញ ដើម្បីលាក់បាំងប្រវត្តិ ។ ប៉ុន្តែភាគច្រើនខ្លួនតែងស្នាក់នៅក្នុងខេត្តសៀមរាប តែត្រូវសមត្ថកិច្ចចាប់ខ្លួន ដោយសារមានជម្លោះជាមួយម្ចាស់ភោជនីយដ្ឋានមួយ ។ នៅពេលសួរនាំរកកាតសម្គាល់ខ្លួន ឬលិខិតបេសកកម្មរបស់អង្គភាពសារព័ត៌មាន ជននេះបញ្ជាក់ថា កាត និងលិខិតបេសកកម្មទាំងនោះបានជ្រុះនៅក្នុងភោជនីយដ្ឋាន ពេលប្រតាយគ្នាជាមួយម្ចាស់ហាង និងសមត្ថកិច្ចនៅខេត្តសៀមរាប ។ ទោះជាយ៉ាងណា នេះគ្រាន់តែជាការអះអាងរបស់ទណ្ឌិត កែវ ឡុង ឬចាន់ ពាវ តែប៉ុណ្ណោះ ដែលសមត្ថកិច្ចបានដកស្រង់សម្តីពេលសួរនាំ ។ កោះសន្តិភាព មិនអាចស្វែងរកការបំភ្លឺពីឈ្មោះ ឆេង ដែលជនឧក្រិដ្ឋខាងលើអះអាងថាជាចាងហ្វាងកាសែត «ជីវិតថ្មី» បានទេ កាលពីព្រឹកថ្ងៃទី៦ សីហា ជុំវិញករណីនេះ ។
សូមបញ្ជាក់ថា អ្នកទោសឧក្រិដ្ឋទាំង៥នាក់របស់ក្រុម កែវ ឡុង នេះ បានប្រើរណារអារដែកចម្រឹងបង្អួចបន្ទប់ ក្នុងពន្ធនាគារខេត្តបាត់ដំបង លួចរត់ដោយសុវត្ថិភាព កាលពីវេលារំលងអធ្រាត្រឈានចូលថ្ងៃទី២៨ មេសា ឆ្នាំ២០១២កន្លងទៅ ។ កាលនោះអ្នកគ្រប់គ្រងគុកបានអះអាងថា ក្រុមអ្នកទោសឧក្រិដ្ឋទាំង៥នាក់នេះ សុទ្ធតែមានជំងឺគ្រប់ៗគ្នាស្ទើរតែដើរមិនរួច ហើយត្រូវគេដាក់ឱ្យស្នាក់នៅរួមគ្នាក្នុងបន្ទប់មួយនៃអគារពេទ្យក្នុងពន្ធនាគារ ។ ក្រុមអនុរក្សបានប្រាប់ថា ពេលចេញរួចពីបន្ទប់ឃុំឃាំង ពួកគេបាននាំគ្នាឡើងឆ្លងកាត់របងសំណាញ់ដែកមួយតង់ដែលហ៊ុមព័ទ្ធអគារក្នុងបរិវេណពន្ធនាគារ រួចបានឡើងផ្លោះកំផែងថ្មពន្ធនាគារមួយតង់ទៀត កម្ពស់ដល់ទៅ៤ម៉ែត្រ ដែលមានហ៊ុមព័ទ្ធបន្លាលួសត្រួតលើគ្នាពី២ទៅ៣ជាន់ផង ។ បន្ទាប់ពីកើតហេតុមួយថ្ងៃ ក៏មានការបង្កើតគណៈកម្មការចម្រុះមួយដែលមានសមាសភាពមន្ត្រីជំនាញមកពីគ្រប់ស្ថាប័នពាក់ព័ន្ធ ដើម្បីចុះពិនិត្យទីតាំងពន្ធនាគារដែលមានបញ្ហា ។ ប៉ុន្តែកាលនោះបើតាមមន្ត្រីជំនាញនិយាយថា គេរកមិនឃើញភស្តុតាងឬស្លាកស្នាមណាបន្តិចដែលគួរឱ្យជឿបានថា ទណ្ឌិតទាំង៥នាក់ដែលមានជំងឺដើរស្ទើរមិនរួចអាចឡើងផ្លោះរបងសំណាញ់ដែក និងកំផែងថ្មដ៏ខ្ពស់នោះបានទេ ។
មន្ត្រីខ្លះបានដាក់ការសង្ស័យថា ទីតាំងដែលត្រូវពិនិត្យស្លាកស្នាមនោះហាក់ដូចត្រូវគេរៀបចំជាស្រេច មុនពេលក្រុមគណៈកម្មការចម្រុះចុះទៅពិនិត្យ ។ រីឯការហែកពន្ធនាគាររត់របស់ក្រុមទណ្ឌិតទាំង៥នាក់នោះ ក៏គេសង្ស័យថា អាចមានអ្នករៀបគម្រោងទុកជាមុនដែរ ទាំងផ្នែកការពារ ទាំងច្រកសុវត្ថិភាពសម្រាប់លួចរត់ចេញ ។ ពន្ធនាគារខេត្តបាត់ដំបងត្រូវគេដឹងថា សំបូររឿងអាស្រូវបំផុតរវាងអ្នកទោស និងអនុរក្ស ។
ក្រុមទណ្ឌិតទាំង៥នាក់នោះមាន ១-ឈ្មោះ កែវ ឡុង (ចាប់ខ្លួនបាន) ២-ឈ្មោះ ញ៉ុង រីុ ៣-ឈ្មោះ ឈន វុធ ៤-ឈ្មោះ សំ សុផាត និង៥-ឈ្មោះ នូ ប៉ូលីន (៤នាក់ក្រោយនេះកំពុងរត់គេចខ្លួន) ។ លោក ជេត វណ្ណនី ស្នងការរងនគរបាលខេត្ត ក៏បានបញ្ជាក់ដែរថា ពេលនេះសមត្ថកិច្ចបានចាប់ខ្លួនអ្នកទោសឧក្រិដ្ឋម្នាក់បញ្ចូលគុកវិញហើយ ប៉ុន្តែនៅ៤នាក់ទៀតគឺកម្លាំងជំនាញ នៅតែបន្តតាមប្រមាញ់នៅឡើយ ហើយដីកាតាមចាប់ខ្លួនក្រុមនេះ ក៏មាននៅក្នុងដៃសមត្ថកិច្ចស្ទើរគ្រប់ទីកន្លែងផងដែរ ៕
ចែករំលែកព័តមាននេះ