រាជធានីភ្នំពេញ ៖ កម្ពុជាកំពុងមានតែមហិច្ឆតាចង់ពង្រីកទីផ្សារក្រពើទៅកាន់ប្រទេសចិនបន្ថែមទៀត ស្របពេលដែលទីផ្សារមួយនេះ ទទួលបានការគាំទ្រពីប្រទេសវៀតណាម ថៃ និងប្រទេសមួយចំនួនទៀត។ នៅក្នុងការចុះពិនិត្យកសិដ្ឋានចិញ្ចឹមក្រពើរបស់លោក ខូយ ឈីន…
រាជធានីភ្នំពេញ ៖ កម្ពុជាកំពុងមានតែមហិច្ឆតាចង់ពង្រីកទីផ្សារក្រពើទៅកាន់ប្រទេសចិនបន្ថែមទៀត ស្របពេលដែលទីផ្សារមួយនេះ ទទួលបានការគាំទ្រពីប្រទេសវៀតណាម ថៃ និងប្រទេសមួយចំនួនទៀត។
នៅក្នុងការចុះពិនិត្យកសិដ្ឋានចិញ្ចឹមក្រពើរបស់លោក ខូយ ឈីន ដែលមានទីតាំងនៅភូមិបុស្សក្រឡាញ់ សង្កាត់ជ្រាវ ក្រុងសៀមរាប ខេត្តសៀមរាប កាលពីថ្ងៃទី២៧ ខែមករា ឆ្នាំ២០១៩ ម្សិលមិញ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានណែនាំឲ្យកសិដ្ឋានសហការជាមួយរដ្ឋបាលជលផលដើម្បីអនុវត្តការងារបច្ចេកទេសបន្ថែម ច្បាប់ ការងារសាយតេស្ត និងទីផ្សារធ្វើយ៉ាងណាជំរុញទីផ្សារក្រពើកម្ពុជាដែលមានសក្តានុពលខាងសេដ្ឋកិច្ចឱ្យបានទូលំទូលាយ ពិសេសទីផ្សារចិន ។
លោកបន្តថា ម្យ៉ាងវិញទៀត គួរខិតខំប្រឹងប្រែងឱ្យអស់លទ្ធភាពទាំងការងារផលិតកម្ម និងកែច្នៃ ប្រសើរជាងនាំចេញកូន និងមេ-បាពូជ ដើម្បីបង្កើនតម្លៃបន្ថែម បង្កើតការងារជូនដល់ពលរដ្ឋនៅមូលដ្ឋាន ហើយគួរសិក្សាពីលទ្ធភាពចិញ្ចឹមបង្កងដើម្បីផ្គត់ផ្គង់ឱ្យទីផ្សារខេត្តសៀមរាប ។
ទីផ្សារបច្ចុប្បន្នកូនក្រពើ១ក្បាលថ្លៃ១៥ទៅ២០ដុល្លារ និងចិញ្ចឹមបានអាយុ៣ឆ្នាំ តម្លៃ៥ពី៦ដុល្លារក្នុង១គីឡូក្រាម ហើយជាបច្ចេកទេសក្រពើមានអាយុ៣ឆ្នាំ ទើបស្បែករបស់វាមាន គុណភាពល្អត្រូវតាមស្តង់ដាទីផ្សារនាំចេញ ។
លោក ខូយ ឈីន ម្ចាស់កសិដ្ឋានចិញ្ចឹមក្រពើនៅខេត្តសៀបរាបបានឲ្យដឹងថា មកទល់បច្ចុប្បន្ន កសិដ្ឋានរបស់លោកបានដំណើរការមកជាង២០ឆ្នាំហើយ សព្វថ្ងៃកសិដ្ឋានមានមេ-បា ចំនួន១.២០០ក្បាល និងជំទង់ចំនួន៣.២០០ក្បាល ចិញ្ចឹមលើផ្ទៃដី ១៦.០០០ម៉ែត្រការ៉េ ដោយបែងចែកជាអាងមេ-បា ពូជ កូន និងក្រពើជំទង់ ។
លោកបន្តបន្តថា ទីផ្សារកូនក្រពើគឺប្រទេសវៀតណាម និងថៃ ហើយបច្ចុប្បន្នកម្ពុជាបាននាំចេញកូនក្រពើប្រមាណ៣២ម៉ឺនក្បាលក្នុង១ឆ្នាំ ដោយឡែកកសិដ្ឋាននេះអាចនាំចេញបានពី១ទៅ១,៥ម៉ឺនក្បាល។ ជាមធ្យមក្នុង ១ឆ្នាំកសិដ្ឋានអាចរកបានចំណូលពី១៥ទៅ២០ម៉ឺនដុល្លារ ៕
ចែករំលែកព័តមាននេះ