ខេត្តមណ្ឌលគិរី ៖ កសិករអះអាងថា តម្លៃជ័រកៅស៊ូឆ្នាំ២០១៩នេះ បានធ្លាក់ចុះបន្តិចវិញ នៅចុងរដូវប្រមូលផលខុសពីឆ្នាំ២០១៨ តម្លៃជ័រក្នុងពេលដូចគ្នាបានតម្លៃខ្ពស់គួរសម ខណៈ ទិន្នផលក៏មានការថយចុះផងដែរ ។…
ខេត្តមណ្ឌលគិរី ៖ កសិករអះអាងថា តម្លៃជ័រកៅស៊ូឆ្នាំ២០១៩នេះ បានធ្លាក់ចុះបន្តិចវិញ នៅចុងរដូវប្រមូលផលខុសពីឆ្នាំ២០១៨ តម្លៃជ័រក្នុងពេលដូចគ្នាបានតម្លៃខ្ពស់គួរសម ខណៈ ទិន្នផលក៏មានការថយចុះផងដែរ ។
លោក ស៊ប អូន អ្នកប្រមូលទិញជ័រកៅស៊ូ តាមភូមិក្នុងស្រុកកែវសីមា បានឲ្យដឹងនៅព្រឹកថ្ងៃទី២៤ មករា ២០១៩ ថា«សព្វថ្ងៃគាត់ប្រមូលទិញជ័រកៅស៊ូកកពីអ្នកភូមិចាប់ពី២១០០រៀល ទៅ២ ៥០០រៀល ទៅតាមប្រភេទជ័រ…ដោយក្នុងមួយថ្ងៃ អាចប្រមូលបានពី៨០០គីឡូក្រាម ទៅ១ ៥០០គីឡូក្រាម …រួចនាំចេញទៅលក់បន្តឲ្យថៅកែវៀតណាមតែម្តង» ។
ប្រជាកសិករដាំដំណាំកៅស៊ូគ្រួសារបានលើកឡើងថា «បច្ចុប្បន្នម្ចាស់ចម្ការកៅស៊ូមិនសូវទទួល បានផលចំណេញទេ ព្រោះតែតម្លៃជ័រកៅស៊ូឡើងចុះមិនទៀងទាត់ ចំណែកតម្លៃពលកម្មបែរជាឡើងថ្លៃជាបន្ទាប់…» ។ ដោយឡែកសម្រាប់ដំណាំកសិឧស្សាហកម្មនេះក៏មានក្រុមហ៊ុនជាច្រើនបាន និងកំពុងធ្វើការវិនិយោគ ដាំដំណាំកៅស៊ូក្នុងខេត្តមណ្ឌលគិរី ហើយថែមទាំងបង្កើតរោងចក្រជ័រកៅស៊ូក្រែបច្នៃ ដើម្បីធ្វើការនាំចេញ ហើយក៏ជាទីផ្សារដ៏ធំសម្រាប់ប្រមូលទិញជ័រកៅស៊ូរបស់បងប្អូនកសិករដាំដុះជាលក្ខណៈគ្រួសារផងដែរ ។
ក្នុងចំណោមក្រុមហ៊ុនទាំងអស់ដែលមកវិនិយោគសម្បទានសេដ្ឋកិច្ចលើដំណាំកៅស៊ូក្នុងខេត្តមណ្ឌលគិរី គេឃើញមានក្រុមហ៊ុនមួយឈ្មោះថា DTC Group បានមកវិនិយោគលើប្រភេទដំណាំកសិកម្មប្រមាណ ជាង៥ពាន់ហិកតា និងអាចកែច្នៃជ័រកៅស៊ូក្រែប បានដោយខ្លួនឯងផងដែរ ។
លោក តាំង ប៊ុនធឿន ប្រធានរដ្ឋបាល និងគណនេយ្យរបស់ក្រុមហ៊ុន DTC បានឲ្យដឹងថា បច្ចុប្បន្នក្រុមហ៊ុន DTC ដាំដំណាំកៅស៊ូក្នុងខេត្តមណ្ឌលគិរី បានប្រមាណជាង៣.០០០ហិកតា លើផ្ទៃដីសរុប៥.៧០៤ហិកតា ប៉ុន្តែសម្រាប់កៅស៊ូដែលអាចចៀរជ័រ ដើម្បីយកមកផ្គត់ផ្គង់ដល់រោងចក្រផលិតទៅជាកៅស៊ូក្រែប គឺមានត្រឹម៤៥០ហិកតាប៉ុណ្ណោះ នៅមិនទាន់គ្រប់តាមតម្រូវការនៅឡើយទេ ដោយក្រុមហ៊ុន ត្រូវការទិញជ័រកៅស៊ូ លក្ខណៈគ្រួសារចូលក្នុងរោងចក្របន្ថែម ក្នុងមួយខែចាប់ពី៤០០ទៅ៥០០តោន ។
លោកបានឲ្យដឹងទៀតថា សង្វាក់ផលិតកម្មកៅស៊ូក្រែបក្នុងក្រុមហ៊ុនបច្ចុប្បន្ន រយៈពេល១ម៉ោងក្រុមហ៊ុនអាចផលិតកៅស៊ូក្រែបបានប្រមាណ២តោន ហើយក្នុងមួយថ្ងៃ អាចផលិតកៅស៊ូក្រែបបាន១៦ទៅ២០តោន ដោយកៅស៊ូក្រែបដែលសម្រេចបាន គឺក្រុមហ៊ុនមានទីផ្សារនាំចេញទៅលក់នៅប្រទេសវៀតណាម តាមច្រកទ្វារព្រំដែនដាក់ដាំ ក្នុងខេត្តមណ្ឌលគិរី ។
លោក តាំង ប៊ុនធឿន បានឲ្យដឹងទៀតថា ក្រៅពីដំណាំកៅស៊ូក្រុមហ៊ុនបានសាកល្បង ដាំដំណាំស្វាយកែវរមៀតតបាន២០២ហិកតា ស្វាយចន្ទីបាន២៥០ហិកតា និងដំណាំម្រេចបាន៥០ហិកតាផងដែរ ។ សម្រាប់កម្មករ និងបុគ្គលិកក្នុងរោងចក្រវិញនោះ គឺក្រុមហ៊ុនបានធ្វើផ្ទះឲ្យស្នាក់នៅ និងបានធ្វើសាលារៀនឲ្យក្មេងៗរៀនសូត្រក្នុងក្រុមហ៊ុនតែម្ដង ដោយក្នុងនោះក្រុមហ៊ុនមានបុគ្គលិក-កម្មករសរុប៤០៩នាក់ ក្នុងនោះស្រី៤០% មានប្រាក់ខែចាប់ពី២០០ដុល្លារឡើងទៅ ហើយសម្រាប់កម្មករជំនាញ និងមានប្រាក់ឧបត្ថម្តលើកទឹកចិត្ត ដែលបានធ្វើការពេញមួយឆ្នាំ៥០ម៉ឺនរៀលក្នុងនោះដែរកម្មករដែលបានធ្វើចាប់ពី២ឆ្នាំឡើងទៅក្រុមហ៊ុនតម្លើងប្រាក់ខែឲ្យបានលើសគេ គឺ១លានរៀលក្នុងមួយខែ ។
លោកប្រធានរដ្ឋបាល និងគណនេយ្យរបស់ក្រុមហ៊ុន DTC បានបញ្ជាក់ថា ទោះបីជាតម្លៃជ័រកៅស៊ូនាពេលបច្ចុប្បន្នមានការធ្លាក់ចុះផលចំណេញរបស់ក្រុមហ៊ុន គឺស្មើចុងស្មើដើម ប៉ុន្តែក្រុមហ៊ុនមិនអាចបិទអាជីវកម្មបានទេ ព្រោះមានបុគ្គលិក-កម្មកររាប់រយនាក់ត្រូវការក្រុមហ៊ុនមួយនេះ ដើម្បីទ្រទ្រង់ជីវភាពប្រចាំថ្ងៃ ៕
ចែករំលែកព័តមាននេះ