ខេត្តប៉ៃលិន៖ បុរសពិការជើងស្តាំម្នាក់ជិះម៉ូតូក្នុងទិសដៅពីកើតទៅលិច លុះដល់ចំណុចផ្លូវកែង ក៏ត្រូវរថយន្តកាមរីគូទហើម ពណ៌សមួយគ្រឿងបើកបរក្នុងទិសដៅបញ្ច្រាសគ្នារេចង្កូតទៅបុកម៉ូតូចំពីមុខយ៉ាងពេញទំហឹង បណ្តាលឱ្យរងរបួស ។ ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៦និង២០នាទី ព្រលប់ថ្ងៃទី៣០ កក្កដា ស្ថិតនៅចំណុចផ្លូវកែងវត្តអូរច្រា ក្នុងភូមិអូរច្រាកណ្តាល សង្កាត់ទួលល្វា ក្រុងប៉ៃលិន ។
បុរសពិការជើងឈ្មោះមូល ទុន អាយុ៤៩ឆ្នាំ រស់នៅភូមិអូរឈើក្រំ ឃុំស្ទឹងកាច់ ស្រុកសាលាក្រៅ ជិះម៉ូតូម៉ាកវ៉េវ ពណ៌ខ្មៅ គ្មានស្លាកលេខរងរបួសស្រាល ចំណែកម៉ូតូរងការខូចខាតផ្នែកខាងមុខមធ្យម ។ ចំណែកអ្នកបើកបររថយន្តឈ្មោះផាន់ ភក្តី ភេទប្រុស អាយុ៣៤ឆ្នាំ រស់នៅភូមិផ្សារព្រំ ឃុំស្ទឹងកាច់ ស្រុកសាលាក្រៅ និងរថយន្តម៉ាកកាមរីគូទហើម ពណ៌ស ពាក់ស្លាកលេខបាត់ដំបង២A-១៦៥៥ រងការខូចខាតផ្នែកមុខខាងឆ្វេងតិចតួច ។
ប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុគេឃើញបុរសពិការម្នាក់ជិះម៉ូតូក្នុងទិសដៅពីកើតទៅលិច លុះមកដល់កន្លែងផ្លូវកែងត្រង់មុខវត្តអូរច្រា ស្រាប់តែមានរថយន្តមួយគ្រឿងជិះគ្នា២នាក់ក្នុងទិសដៅបញ្ច្រាសគ្នា ។ ពេលដល់ផ្លូវបត់កែង ស្រាប់តែរថយន្តមួយគ្រឿងនេះបានរេចង្កូតទៅបុកម៉ូតូរបស់បុរសពិការជើងនោះយ៉ាងពេញទំហឹង បណ្តាលឱ្យខ្ទាតជើងសិប្បនិម្មិតទៅលើចិញ្ចើមថ្នល់ចម្ងាយប្រហែល៦ម៉ែត្រ តែសំណាងល្អមិនបណ្តោយឱ្យបុរសពិការនោះរងគ្រោះធ្ងន់ធ្ងរ ។
ប្រភពព័ត៌មានពីសមត្ថកិច្ចចរាចរជើងគោកក្រុងប៉ៃលិនបានឱ្យដឹងថា ក្រោយពេលកើតហេតុ សមត្ថកិច្ចក្រុងបៃ៉លិនបានទៅដល់កន្លែងកើតហេតុដើម្បីធ្វើការវាស់វែង ហើយពិនិត្យឃើញថា ភាគីខាងរថយន្តមានកំហុសច្រើនជាង តែពួកគេទាំងសងខាងបានសម្រួលគ្នា ដោយខាងម្ចាស់រថយន្តបានសងសំណងការខូចខាតឱ្យខាងជនរងគ្រោះចំនួន៥ម៉ឺនរៀល ដើម្បីបញ្ចប់រឿងនៅកន្លែងកើតហេតុ ៕
ចែករំលែកព័តមាននេះ