រាជធានីភ្នំពេញ ៖ ក្នុងពេលដែលសហគមន៍អឺរ៉ុបបានដាក់ពន្ធលើការនាំចូលអង្ករពីកម្ពុជា បានធ្វើឲ្យមានការព្រួយបារម្ភពីឈ្មួញនាំចូល ហើយនឹងប៉ះពាល់ដល់កសិករផ្ទាល់តែម្ដង ។ ដើម្បីរក្សាទីផ្សារនេះឲ្យនៅតែមានភាពល្អប្រសើរដដែល ក៏ដូចជាពង្រីកទីផ្សារបន្ថែមទៀត កម្ពុជានឹងធ្វើពិពិធកម្មទីផ្សារដោយងាកទៅរកទីផ្សារថ្មីៗក្រៅអឺរ៉ុប ។…
រាជធានីភ្នំពេញ ៖ ក្នុងពេលដែលសហគមន៍អឺរ៉ុបបានដាក់ពន្ធលើការនាំចូលអង្ករពីកម្ពុជា បានធ្វើឲ្យមានការព្រួយបារម្ភពីឈ្មួញនាំចូល ហើយនឹងប៉ះពាល់ដល់កសិករផ្ទាល់តែម្ដង ។ ដើម្បីរក្សាទីផ្សារនេះឲ្យនៅតែមានភាពល្អប្រសើរដដែល ក៏ដូចជាពង្រីកទីផ្សារបន្ថែមទៀត កម្ពុជានឹងធ្វើពិពិធកម្មទីផ្សារដោយងាកទៅរកទីផ្សារថ្មីៗក្រៅអឺរ៉ុប ។
តាមប្រសាសន៍លោក សុខ សុភ័ក្ត្រ រដ្ឋលេខាធិការក្រសួងពាណិជ្ជកម្មកម្ពុជា បានមានប្រសាសន៍ថា កម្ពុជាត្រូវការកែប្រែ និងធ្វើពិពិធកម្មទីផ្សារទៅលើអង្កររបស់កម្ពុជា ដោយនឹងស្វែងរកទីផ្សារថ្មីៗបន្ថែម ដូចជាទីផ្សារចិន និងទីផ្សារនៅប្រទេសក្នុងតំបន់អាស៊ីជាច្រើនទៀត ស្របពេលអង្ករកម្ពុជាកំពុងមានឈ្មោះល្បីស្រាប់នៅលើទីផ្សារ ។
នៅក្នុងសន្និសីទសារព័ត៌មានកាលពីថ្ងៃទី១៨ មករា កន្លងមក លោករដ្ឋលេខាធិការ បានមានប្រសាសន៍ថា កម្ពុជានឹងនៅតែពឹងលើទីផ្សារប្រទេសណាមួយជាធំនោះទេ គឺត្រូវស្វែងរកទីផ្សារថ្មីៗជាច្រើនទៀត ដែលផ្តោតទៅលើប្រទេសដែលត្រូវការនាំចូលអង្ករ និងជាប្រទេសដែលមិនអំណោយផលដល់ការផលិតស្រូវអង្ករ ។ លោកថា៖« អង្ករកម្ពុជា កំពុងមានតម្រូវការនៅបណ្ដាប្រទេសជាច្រើនទៀត ក្រៅពីសហគមន៍អឺរ៉ុប ដូច្នេះយើងត្រូវការចរចាជាមួយបណ្ដាប្រទេសទាំងនោះ ដើម្បីបើកច្រកនាំចូលអង្កររបស់យើងទៅបំពេញតម្រូវការរបស់គេ ដើម្បីឲ្យទីផ្សារអង្ករយើងកាន់តែទូលំទូលាយ ខណៈកិត្តិស័ព្ទអង្ករយើងក៏កំពុងតែល្បីស្រាប់
ផង » ។
លោកបន្ថែមថា ការដាក់ពន្ធអង្ករមកលើអង្ករកម្ពុជា សម្រាប់នាំចូលទីផ្សារអឺរ៉ុប មិនមានជាប់ពាក់ព័ន្ធនឹងនយោបាយអ្វីទាំងអស់ ។ នៅក្នុងសេចក្តីសម្រេចរបស់សហគមន៍អឺរ៉ុបបានបញ្ជាក់ច្បាស់ថា ការដាក់ពន្ធនេះ គឺធ្វើឡើង ដើម្បីការពារផលប្រយោជន៍ដល់ប្រជាជនអឺរ៉ុបមួយចំនួន ដែលជាកសិករ ដូចជាប្រទេសអុីតាលី និងប្រទេសអេស្ប៉ាញជាដើម ក្នុងរក្សាទីផ្សារអង្ករក្នុងតំបន់របស់គេ ។ លោកថា ៖« នេះគឺច្បាប់ដែលបានចែងដោយសហគមន៍អឺរ៉ុប ក៏ប៉ុន្តែការយកច្បាប់នេះ មកប្រើក៏មិនសមស្របទៅនឹងការដាក់ពន្ធមកលើអង្ករកម្ពុជានោះដែរ ពីព្រោះអង្ករដែលនាំពីកម្ពុជា ពុំអាចដាំនៅអុីតាលីនិងអេស្ប៉ាញបានឡើយ ហើយដាំបានតែក្នុងប្រទេសមួយចំនួននៅទ្វីបអាស៊ីប៉ុណ្ណោះ » ។
យោងតាមគេហទំព័រហ្វេសប៊ុកផ្លូវការរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្នុងឱកាសសម្ដេចជួបសំណេះសំណាលជាមួយ និស្សិតកំពុងសិក្សានៅទីក្រុងប៉េកាំង ប្រទេសចិន បានឲ្យដឹងផងដែរថា កម្ពុជាត្រូវខិតខំបើក ពង្រីក និងពង្រឹងទីផ្សារឲ្យបានច្រើនថែមទៀតក្រៅពីទីផ្សាអាមេរិក និងអឺរ៉ុប ដើម្បីបញ្ចេញទំនិញ និងផលិតផលកសិកម្មកម្ពុជាចេញក្រៅ ដូចជានៅក្នុងប្រទេសចិន, អាហ្វ្រិក, មជ្ឈិមបូព៌៌ា និងកូរ៉េជាដើម ។ សម្ដេចមានប្រសាសន៍បន្តថា សព្វថ្ងៃនេះ ទំហំពាណិជ្ជកម្មកម្ពុជានិងចិនក៏បានកើនឡើងដល់៥.៦០០លានដុល្លារហើយ ។ ម្យ៉ាងទៀតមិត្តចិនគឺអ្នកវិនិយោគធំជាងគេនៅកម្ពុជា ជាពិសេសលើវិស័យហេដ្ឋារចនាសម្ព័ន្ឋផ្លូវថ្នល់ ស្ពាន ស្ពានអាកាស និងវារីអគ្គីសនី ជាដើម ។
គួរបញ្ជាក់ផងដែរថា សហភាពអឺរ៉ុបបានសម្រេចប្រកាសដាក់ពន្ធលើអង្ករកម្ពុជា នាំចូលទីផ្សារអឺរ៉ុប ក្នុងរយៈពេល៣ឆ្នាំ ដោយសំអាងថា ដើម្បីការពារផលប្រយោជន៍កសិករអឺរ៉ុប ។ នៅក្នុងសេចក្តីសម្រេចរបស់អឺរ៉ុប បានបញ្ជាក់ថា អង្ករដែលនាំចូលពីប្រទេស កម្ពុជា និងមីយ៉ាន់ម៉ា នឹងចាប់ផ្ដើមបង់ពន្ធ ចាប់ពីថ្ងៃទី១៨ មករា ២០១៩ ដោយក្នុងឆ្នាំដំបូង តម្រូវឲ្យបង់ពន្ធ១៧៥អឺរ៉ូ ឬប្រមាណ២០០ដុល្លារអាមេរិកក្នុង១តោន, ឆ្នាំទី២តម្រូវឲ្យបង់ពន្ធ១៥០អឺរ៉ូ ឬប្រមាណ១៧០ដុល្លារអាមេរិក ក្នុង១តោន និងឆ្នាំទី៣ តម្រូវឲ្យបង់ពន្ធ១២៥អឺរ៉ូ ឬប្រមាណជាង១៤០ដុល្លារអាមេរិក ក្នុង១តោន ៕
ចែករំលែកព័តមាននេះ