ទីក្រុងហុងកុង ៖ ការអន់ថយទីផ្សារអចលនទ្រព្យពិភលោកដែលបានប៉ះពាល់ដល់ហុងកុងកាលពីខែសីហា ប្រៀបដូចជាមិនទប់ស្កាត់អតិថិជនដែលមានចំណាប់អារម្មណ៍ទេ ។
យោងតាមសារព័ត៌មាន The Business Times បានឲ្យដឹងកាលពីថ្ងៃទី១៧ មករា កន្លងមកថា ប្រជាជនហុងកុងមានថវិកាច្រើន ព្រោះតែទីផ្សារភាគហ៊ុនកាលពីឆ្នាំមុន ហើយកំណើនអំណាចទឹកប្រាក់នេះអាចនឹងទប់ស្កាត់មិនឲ្យទីផ្សារអចលនទ្រព្យដែលមានតម្លៃខ្ពស់ជាងគេនេះដួលរលំ ។
អ្នកស្រី Nicole Wong ប្រធានផ្នែកស្រាវជ្រាវអចលនទ្រព្យក្នុងតំបន់នៅក្រុមហ៊ុន CLSA បាននិយាយថា កំណើននៃប្រាក់សន្សំក្នុងធនាគារបង្ហាញមកថា ប្រជាជនមានសមត្ថភាពក្នុងការទិញផ្ទះ ប្រសិនបើពួកគេចង់ ។ ចំណែកលោក Patrick Wong អ្នកវិភាគអចលនទ្រព្យមួយរូបនៅ Bloomberg Intelligence បានឲ្យដឹងថា គម្រោងអចលនទ្រព្យថ្មីៗដែលមានតម្លៃប្រកួតប្រជែងគ្នា និងការគិតថានឹងមានការទម្លាក់អត្រាការប្រាក់ក៏បានជំរុញចំណាប់អារម្មណ៍របស់អតិថិជនដែរ ។
ក្រុមហ៊ុន China Overseas Land & Investment ទទួលបានពាក្យសុំទិញដល់ទៅ៧.៥០០នាក់សម្រាប់ផ្ទះទាំង៤៨៦យូនីតនៅ Tai Po កាលពីដើមខែនេះ ។ គម្រោងរបស់រដ្ឋាភិបាលក្នុងការផ្គត់ផ្គង់ផ្ទះកម្រិតដំបូងដែលជាអាផាតម៉ិនតម្លៃទាបសម្រាប់ប្រជាជនវ័យក្មេងក៏ទទួលបានការចាប់អារម្មណ៍លើសការគិតទុកដែរ ។
ខណៈដែលអ្នកតាមដានទីផ្សារជាច្រើនគិតថាតម្លៃផ្ទះនឹងបន្តធ្លាក់ចុះទៅទៀតបន្ទាប់ពីធ្លាក់ចុះអស់៩%បើធៀបនឹងខែសីហានោះ ក្រុមហ៊ុន Citigroup មើលឃើញមុខសញ្ញាដែលបង្ហាញថា តម្លៃនឹងឈប់ធ្លាក់ចុះក្នុងរយៈពេល២ខែខាងមុខនេះ ខណៈដែលអតិថិជនចាប់ផ្តើមមានតម្រូវការឡើងវិញ ស្របពេលក្រុមហ៊ុនMorgan Stanley គិតថាតម្លៃនឹងកើនឡើង២%ផងដែរក្នុងឆ្នាំនេះ។
ប្រជាជនជាច្រើនគិតថា ការធ្វើជាម្ចាស់កម្មសិទ្ធិផ្ទះមួយគឺជារឿងដ៏សំខាន់ ហើយពួកគេសុខចិត្តទុកប្រាក់ចំណូលភាគច្រើនរបស់ពួកគេក្នុងការទិញវា ។ ឪពុកម្តាយក៏កំពុងតែខិតខំប្រឹងប្រែងក្នុងការជួយដល់ក្មេងៗជំនាន់ក្រោយដែល ព្រោះតែគោលគំនិតថា ការធ្វើជាម្ចាស់កម្មសិទ្ធិផ្ទះ ជាកត្តាបង្ហាញពីភាគជោគជ័យ និងស្ថិរភាពជាដើម ៕
ចែករំលែកព័តមាននេះ