រាជធានីភ្នំពេញ ៖ យុវជនម្នាក់ បន្ទាប់ពីសម្ងំជក់ថ្នាំញៀនតែម្នាក់ឯងអស់២កញ្ចប់តូច បែរជាបែកគំនិតចូលទៅឆក់កាបូបលុយពីនារីរូបស្រស់ម្នាក់ នៅក្នុងហាងផឹកស៊ីបានសម្រេច ហើយព្យាយាមរត់គេចខ្លួន ក៏ត្រូវកម្លាំងសមត្ថកិច្ចប៉ុស្តិ៍នគរបាលទន្លេបាសាក់ ល្បាតក្នុងមូលដ្ឋានប្រទះឃើញប្រដេញតាមឃាត់ខ្លួនបានភ្លាមៗតែម្តងនៅក្នុងការដ្ឋានសំណង់ ស៊ីណូក្រេតវ៉លជិតមជ្ឈមណ្ឌលកម្សាន្តកោះពេជ្រ បង្កការភ្ញាក់ផ្អើលកាលពីម៉ោង២និង១៥នាទីរំលងអធ្រាត្រឈានចូលថ្ងៃទី10 ខែមករា នៅតាមបណ្ដោយផ្លូវ៧៨ ភូមិ៧៨ ក្រុម១៤ ក្នុងហាង ស្រាក្រឡុក យីហោ Bro&SIS. សង្កាត់ទន្លេបាសាក់ ខណ្ឌចំការមន។
នារីរូបរងគ្រោះសុំមិនប្រាប់អត្តសញ្ញាណ ចំណែកជនសង្ស័យឈ្មោះ ឌី ហាក់ អាយុ24ឆ្នាំ មុខរបរ និងស្នាក់នៅមិនពិតប្រាកដ ។
ប្រភពព័ត៌មានពីនារីរងគ្រោះបានប្រាប់ឱ្យដឹងថា មុនកើតហេតុ គឺរូបគាត់ចូលទៅអង្គុយនៅក្នុងហាងកើតហេតុខាងលើ ញ៉ាំស្រាក្រឡុកជាមួយមិត្តភ័ក្ដិ ដោយដាក់កាបូបស្ពាយរបស់គាត់នៅលើតុ ខណៈពេលនោះស្រាប់តែលេចមុខជនសង្ស័យខាងលើ ដើរចូលមកខាងក្នុងហាងជិតនឹងតុរបស់គាត់ ។ ពេលនោះគាត់ស្មានតែជាអ្នករត់តុក៏មិនបានចាប់អារម្មណ៍ដែរ ស្រាប់តែជនសង្ស័យឆក់កាបូបគាត់រត់ចេញទៅក្រៅយ៉ាងលឿន ធ្វើឲ្យគាត់ស្រឡាំងកាំងឈរស្ងៀមមួយកន្លែង។
នារីរងគ្រោះបន្តថា ភ្លាមៗក៏មានអ្នកនៅជាប់តុគ្នាជួយដេញតាមស្រែកថា «ចោរៗ» ក៏ត្រូវខាងកម្លាំងល្បាតរបស់ប៉ុស្តិ៍នគរបាលទន្លេបាសាក់ ប្រទះឃើញធ្វើការប្រដេញតាមឃាត់ខ្លួន ហើយជនសង្ស័យនោះបានរត់ចូលនៅក្នុងការដ្ឋានសំណង់ ស៊ីណូក្រេតវ៉ល រួចក៏រត់ជ្រុលទៅធ្លាក់ក្នុងរណ្ដៅជណ្ដើរយន្តជម្រៅជាង១០ម៉ែត្រ បណ្តាលឱ្យរងរបួសភ្លាមៗ ក៏ត្រូវខាងកម្លាំងសមត្ថកិច្ច ដាក់ខ្សែចុះទៅទាញយកជនរងគ្រោះមកខាងលើនាំទៅប៉ុស្តិ៍នគរបាលធ្វើការសួរនាំ ។ នៅក្នុងកាបូបរបស់ជនរងគ្រោះមានទូរស័ព្ទដៃចំនួន២គ្រឿង និងលុយមួយចំនួន ។
ក្រោយកើតហេតុ ជនរងគ្រោះបានទៅដាក់ពាក្យបណ្ដឹង ហើយកម្លាំងសមត្ថកិច្ចបាននាំខ្លួនជនសង្ស័យទៅសួរនាំនៅប៉ុស្តិ៍នគរបាលទន្លេបាសាក់ និងកសាងសុំណុំរឿងបញ្ជូនទៅតុលាការចាត់ការបន្តតាមនីតិវិធី ៕
ចែករំលែកព័តមាននេះ