រាជធានីភ្នំពេញ ៖ មន្ត្រីជំនាញក្រសួងសាធារណការ និងដឹកជញ្ជូន បានឲ្យដឹងថា រហូតមកទល់ពេលនេះ ការសិក្សានិងការជ្រើសរើសក្រុមហ៊ុនសាងសង់ពង្រីកផ្លូវជាតិលេខ២បានបញ្ចប់ហើយ ។
អ្នកនាំពាក្យក្រសួងសាធារណការ លោកវ៉ាស៊ឹម សូរិយា បានមានប្រសាសន៍តាមទូរស័ព្ទកាលពីថ្ងៃទី៧ មករា កន្លងមកថា ការសិក្សាសាងសង់និងពង្រីកផ្លូវជាតិលេខ២បានបញ្ចប់ហើយ ហើយការជ្រើសរើសក្រុមហ៊ុនសាងសង់ផ្លូវនេះក៏បានបញ្ចប់ដែរ នៅសល់តែនិតិវិធីការងារមួយចំនួនប៉ុណ្ណោះ តែយើងរំពឹងថា នឹងបញ្ចប់នៅឆ្នាំនេះ ។ ទោះជាយ៉ាងណា យើងមិនទាន់កំណត់ពេលវេលា ដើម្បីបើកការដ្ឋានសាងសង់នៅពេលណានៅឡើយទេ ។ លោកមានប្រសាសន៍ថា ៖« ខ្ញុំមិនអាចបញ្ជាក់បានថាផ្លួវនេះនឹងបើកការដ្ឋានសាងសង់បាននៅពេលណាទេ ប៉ុន្តែអ្វីៗទំនងជាមិនយូរពេកទេ »។
តាមគម្រោងផ្លូវជាតិលេខ២ នឹងត្រូវពង្រីកជា៤គន្លងដែលអាចរថយន្តបើកបរបានពីរទៅពីរមកនៅតំបន់ខ្លះ និងតំបន់ខ្លះនឹងពង្រីកត្រឹម១១ម៉ែត្រប៉ុណ្ណោះ ។ គម្រោងនេះជាកម្ចីមានការប្រាក់ទាបរបស់រដ្ឋាភិបាលកូរ៉េ ។ ទោះជាយ៉ាងណា ពុំទាន់មានតួលេខពីទំហំទឹកប្រាក់ដែលត្រូវចំណាយលើការសាងសង់ផ្លូវនេះទេ ។
លោក ឈឹម ផល្លា ប្រធាននាយកដ្ឋានផ្លូវថ្នល់នៃក្រសួងសាធារណការនិងដឹកជញ្ជូនបានឲ្យដឹងកន្លងមកថា បច្ចុប្បន្នក្រសួងកំពុងធ្វើការជាមួយភាគីកូរ៉េ ដើម្បីឈានទៅធ្វើការដេញថ្លៃសាងសង់ផ្លូវនេះ ដែលតំបន់ខ្លះត្រូវពង្រីកពីរគន្លងទៅមក និងតំបន់ខ្លះមានទំហំសម្រាប់រថយន្តបើកបរមួយគន្លងទៅមកប៉ុណ្ណោះ ។
លោកបន្តថា ៖« រហូតមកទល់ពេលនេះ មានការឯកភាពជាគោលការណ៍ពីរដ្ឋាភិបាលកូរ៉េ ហើយ ហេតុនេះយើងរំពឹងថាការដេញថ្លៃសាងសង់ផ្លូវនេះនឹងអាចចាប់ផ្តើមនៅពេលឆាប់ៗ »។ លោកថា ៖« ការសាងសង់ផ្លូវនេះអាចនឹងចាប់ផ្តើមនៅឆ្នាំ២០១៩នេះ នៅពេលនីតិវិធីនានាបញ្ចប់តាមផែនការ »។
ប្រមុខរាជរដ្ឋាភិបាលសម្តេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងក្នុងឱកាសជួបជាមួយកម្មករ និយោជិតក្នុងខេត្តតាកែវ កាលពីចុងឆ្នាំមុនថា ខេត្តតាកែវមានសក្តានុពលក្នុងការពង្រីករោងចក្រ សហគ្រាសបានល្អនាពេលអនាគត ដោយសារខេត្តនេះមានសណ្ឋានដីល្អ មានទីតាំងនៅកៀកនឹងរាជធានីភ្នំពេញ និងមានហេដ្ឋារចនាសម្ព័ន្ឋតភ្ជាប់ខ្វាត់ខ្វែង ។
ទោះបីយ៉ាងណា សម្តេចតេជោ បានរិះគន់ពីនិតិវិធី និងភាពយឺតយ៉ាវក្នុងការសាងសង់ និងពង្រីកផ្លូវនេះ ដោយសម្តេចបានជំរុញឲ្យរដ្ឋមន្ត្រីក្រសួងសាធារណការ និងដឹកជញ្ជូន ពន្លឿនធ្វើយ៉ាងណាឲ្យការសាងសង់ផ្លូវនេះធ្វើឡើងបានលឿន និងឆាប់រហ័សតាមដែលអាចធ្វើទៅបាន ៕
ចែករំលែកព័តមាននេះ