ADផ្ទាំងផ្សព្វផ្សាយពាណិជ្ជកម្ម

អន្តរជាតិកំពុងចាប់អារម្មណ៍កម្ពុជារងផលប៉ះពាល់យ៉ាងធ្ងន់ធ្ងរពីការបំពានរបស់ថៃ

5 ម៉ោង មុន

២៦ ខែ ធ្នូ ឆ្នាំ ២០២៥ ម៉ោង ១៧:៥១

រាជធានីភ្នំពេញ ៖ អ្នកនាំពាក្យរាជរដ្ឋាភិបាល បានលើកឡើងថា សហគមន៍អន្តរជាតិកំពុងចាប់អារម្មណ៍មកលើកម្ពុជា ដែលបាននិងកំពុងរងផលប៉ះពាល់យ៉ាងធ្ងន់ធ្ងរពីការរំលោភបំពានដ៏កំរោលរបស់យោធាថៃ ដោយពួកគេបានស្វះស្វែងជួយរកដំណោះស្រាយចំពោះការរំលោភបំពាននេះ ។ ក្នុងសន្និសីទសារព័ត៌មាន ស្តីពីជម្លោះព្រំដែនកម្ពុជា-ថៃ…

ក្នុងសន្និសីទសារព័ត៌មាន ស្តីពីជម្លោះព្រំដែនកម្ពុជា-ថៃ នៅព្រឹកថ្ងៃទី២៦ ខែធ្នូ ឆ្នាំ២០២៥នេះ ឯកឧត្តម ប៉ែន បូណា ប្រធានអង្គភាពអ្នកនាំពាក្យរាជរដ្ឋាភិបាលកម្ពុជា បានមានប្រសាសន៍ថា តាមរយៈកិច្ចខិតខំរបស់បណ្តាប្រទេសជាមិត្ត ដើម្បីជួយរកដំណោះស្រាយឲ្យមានបទឈប់បាញ់រវាងកម្ពុជា-ថៃ បានបង្ហាញឲ្យឃើញថា ពិភពលោកមិនឱបដៃមើលការរំលោភឈ្លានពានយ៉ាងកំរោលរបស់ថៃ មកលើកម្ពុជា នោះទេ ។

ឯកឧត្តម គូសបញ្ជាក់ថា “សហគមន៍អន្តរជាតិ បាននិងកំពុងបន្តចាប់អារម្មណ៍ទៅលើផលប៉ះពាល់យ៉ាងធ្ងន់ធ្ងរ មកលើជនស៊ីវិល និងហេដ្ឋារចនាសម្ព័ន្ធស៊ីវិលកម្ពុជា ដែលបណ្តាលមកពីការវាយប្រហារមិនរើសមុខ មិនរើសទីតាំងចូលជ្រៅក្នុងទឹកដីកម្ពុជាពីសំណាក់ទាហានថៃ” ។

ទន្ទឹមនឹងនេះ អ្នកនាំពាក្យរាជរដ្ឋាភិបាលកម្ពុជា ក៏បានប្រកាសថ្កោលទោសយ៉ាងខ្លាំងក្លាបំផុត ចំពោះការវាយប្រហារយ៉ាងសាហាវព្រៃផ្សៃ និងអមនុស្សធម៌របស់កងទ័ពឈ្លានពានថៃ មកលើជនស៊ីវិលស្លូតត្រង់ និងហេដ្ឋារចនាសម្ព័ន្ធស៊ីវិលកម្ពុជា និងអំពាវនាវឲ្យសហគមន៍អន្តរជាតិ ដាក់សម្ពាធទៅលើប្រទេសថៃ ឱ្យបញ្ឈប់ការប្រព្រឹត្តបទឧក្រិដ្ឋកម្ម បំពានច្បាប់អន្តរជាតិ និងរំលោភសិទ្ធិមនុស្សយ៉ាងធ្ងន់ធ្ងររបស់ខ្លួនជាបន្ទាន់ និងបង្ខំឲ្យប្រទេសនេះងាកមករកដំណោះស្រាយដោយសន្តិវិធីវិញជាចាំបាច់ ។

សូមបញ្ជាក់ថា រហូតមកទល់ថ្ងៃទី២៥ ខែធ្នូ ឆ្នាំ២០២៥ មានជនស៊ីវិលស្លូតត្រង់ខ្មែរ បានស្លាប់ចំនួន៣០នាក់ និងរងរបួសកើនដល់៨៨នាក់ហើយ ។ ក្នុងនោះមានស្ត្រី កុមារ និងមនុស្សចាស់ ។ ចំណែកប្រជាពលរដ្ឋភៀសសឹកចេញពីផ្ទះសម្បែងបានកើនដល់ជាង៦៣ម៉ឺននាក់។ ហេដ្ឋារចនាសម្ព័ន្ធស៊ីវិលជាច្រើនដូចជា ផ្ទះសម្បែង ផ្លូវ ស្ពាន សាលារៀន មន្ទីរពេទ្យ ផ្សារ អគារអាជីវកម្មឯកជន វត្តអារាម រូបបដិមាព្រះវិណ្ណុ រហូតដល់ប្រាសាទបុរាណដែលជាសម្បត្តិបេតិកភណ្ឌ ដ៏មានតម្លៃរបស់មនុស្សជាតិ បានរងការបំផ្លិចបំផ្លាញជារៀងរាល់ថ្ងៃពីការទម្លាក់គ្រាប់បែករបស់ទាហានឈ្លានពានថៃ ៕