ខេត្តព្រៃវែង ៖ ពិតជាសាហាវហួសថ្លែងហើយក៏គ្មាននរណានឹកស្មានដល់ដែលយុវជនម្នាក់ត្រូវពូខ្លួនឯងប្រើពូថៅ និងកាំបិតកាប់ប្រហារឡើងសុះសាច់នៅក្នុងស្រែ ដោយសារតែគំនុំបន្តិចបន្តួចនៅក្នុងពេលផឹកស៊ីដែលបានកន្លងទៅរយៈពេល៤ឆ្នាំទៅហើយ ។
ហេតុការណ៍នេះបានកើតឡើង កាលពីវេលាម៉ោង១២និង១៥នាទីថ្ងៃត្រង់ថ្ងៃទី៧ មករា នៅចំណុចវាលស្រែមួយកន្លែង ក្នុងភូមិព្រែកតាសរ ឃុំអ្នកលឿង ស្រុកពាមរក៌ ខេត្តព្រៃវែង ។
ជនដៃដល់នៅក្នុងហេតុការណ៍នេះឈ្មោះ មាស សាវ៉ាន ហៅសុខ ភេទប្រុស អាយុប្រមាណជា៣០ឆ្នាំ មានទីលំនៅក្នុងភូមិកើតហេតុ ហើយត្រូវជាពូសាច់ឆ្ងាយរបស់ជនរងគ្រោះ ។ ចំណែកជនរងគ្រោះមានឈ្មោះ រុន ចិត្រា អាយុ២៣ឆ្នាំ មានទីលំនៅក្នុងភូមិអ្នកលឿង ឃុំស្រុកជាមួយគ្នា និងត្រូវជាក្មួយជនដៃដល់ ។
ប្រពភព័ត៌មានពីក្រុមគ្រួសារជនរងគ្រោះបានអោយដឹងថា ជនដៃដល់ និងជនរងគ្រោះធ្លាប់មានទំនាស់ជាមួយគ្នា នៅក្នុងវង់ផឹកស៊ី កាលពីឆ្នាំ២០១៥ ហើយក្រោយមកជនដៃដល់ធ្លាប់បានយកកាំបិតផ្គាក់ដេញកាប់ជនរងគ្រោះម្តងដែរ ប៉ុន្តែជនរងគ្រោះរត់គេចខ្លួនទាន់ បន្ទាប់ពីនោះមកជនដៃដល់មិនដែលមានសកម្មភាពអ្វីទេទើបធ្វើអោយបងប្អូនសាច់ញាតិរួមទាំងជនរងគ្រោះផងលែងចាប់អារម្មណ៍ លុះមកដល់ថ្ងៃកើតហេតុពេលដែលជនរងគ្រោះទៅឈរមើលម៉ាស៊ីនច្រូតស្រូវអោយខ្លួនក៏ត្រូវជនដៃដល់លបកាប់ចិញ្ច្រាំបែបនេះតែម្តង ។
ដោយឡែកសាក្សីនៅកន្លែងកើតហេតុបានអោយដឹងថា មុនពេលកើតហេតុគេឃើញជនរងគ្រោះកំពុងឈរមើលម៉ាស៊ីនច្រូតស្រូវកំពុងច្រូតស្រូវរបស់ខ្លួន ខណៈនោះស្រាប់តែឃើញជនដៃដល់ជិះម៉ូតូទៅជិតជនរងគ្រោះ ហើយភ្លាមនោះជនរងគ្រោះបានសួរថា ពូឯងមកធ្វើអី ស្រាប់តែជនដៃដល់ទាញពូថៅគប់ទៅលើជនរងគ្រោះត្រូវចំខ្នងជាប់ផ្លែពូថៅចំកណ្តាលខ្នង ភ្លាមៗនោះជនរងគ្រោះព្យាយាមរត់បាន៣ទៅ៤ម៉ែត្រក៏ដួលទៅក្នុងស្រូវរបស់អ្នកស្រុក ចំណែកជនដៃដល់ក៏កាន់កាំបិតតាមទៅកាប់ចិញ្ច្រាំបាន៣ទៅ៤កាំបិតទៀតទើបជនរងគ្រោះស្ទុះរត់មកដល់ចិញ្ចើមថ្នល់ ត្រង់ផ្លូវបំបែកជា៤ ក៏ត្រូវជនដៃដល់តាមទាន់ ហើយកាប់ជាច្រើនកាំបិតទៀត ទើបអ្នកស្រុកស្រែកឆោឡោឡើង ហើយជនដៃដល់ក៏ត្រូវប្រពន្ធអូសដៃនាំរត់គេច ខ្លួនបាត់ទៅ ចំណែកជនរងគ្រោះក៏ត្រូវបានក្រុមគ្រួសារដឹកតាមរថយន្តនាំយកទៅសង្គ្រោះបន្ទាន់នៅទីក្រុងភ្នំពេញភ្លាមៗ រហូតមកដល់ពេលនេះមិនដឹងលទ្ធផលស្លាប់ ឬរស់យ៉ាងណាទេ ។
ប្រភពដដែលនេះបានបញ្ជាក់ថា ក្រោយពេលកើតហេតុបានជាងកន្លះម៉ោងទើបគេឃើញសមត្ថកិច្ចអាវុធហត្ថ និងនគរបាលស្រុកទៅដល់កន្លែងកើតហេតុ ប៉ុន្តែបានត្រឹមតែធ្វើកំណត់ហេតុប៉ុណ្ណោះ ព្រោះជនដៃដល់ក៏រត់បាត់ជនរងគ្រោះក៏ទៅមន្ទីរពេទ្យផុតហើយដែរ ៕
ចែករំលែកព័តមាននេះ