រាជធានីភ្នំពេញ ៖ យុវជនម្នាក់បានដាក់ជណ្ដើរដែកឡើងតាមរបងផ្លោះទៅដំបូលរោងបាយផ្ទះវីឡាគេមួយកន្លែង ក៏ត្រូវអ្នកធ្វើការនៅក្នុងផ្ទះវីឡានោះឃើញហើយចាប់ឃាត់ខ្លួនប្រគល់ឱ្យសមត្ថកិច្ចតែម្តង បង្កឱ្យមានការភ្ញាក់ផ្អើលកាលពីម៉ោង៩និង៥០នាទីយប់ ថ្ងៃទី6 ខែមករា ឆ្នាំ២០១៩ នៅក្នុងរោងស្នាក់នៅរបស់បុគ្គលិករ៉ារទេះភ្លើង ស្ថិតក្នុងទឹកដីសង្កាត់ស្រះចក…
រាជធានីភ្នំពេញ ៖ យុវជនម្នាក់បានដាក់ជណ្ដើរដែកឡើងតាមរបងផ្លោះទៅដំបូលរោងបាយផ្ទះវីឡាគេមួយកន្លែង ក៏ត្រូវអ្នកធ្វើការនៅក្នុងផ្ទះវីឡានោះឃើញហើយចាប់ឃាត់ខ្លួនប្រគល់ឱ្យសមត្ថកិច្ចតែម្តង បង្កឱ្យមានការភ្ញាក់ផ្អើលកាលពីម៉ោង៩និង៥០នាទីយប់ ថ្ងៃទី6 ខែមករា ឆ្នាំ២០១៩ នៅក្នុងរោងស្នាក់នៅរបស់បុគ្គលិករ៉ារទេះភ្លើង ស្ថិតក្នុងទឹកដីសង្កាត់ស្រះចក ខណ្ឌដូនពេញ។
យុវជនខាងលើនោះមានឈ្មោះ ម៉ា វិរៈ អាយុ២១ឆ្នាំ ស្នាក់នៅជិតកន្លែងកើតហេតុ មុខរបរកម្មករធ្វើផ្លូវដែក មានស្រុកកំណើតនៅភូមិទូកមាស ស្រុកតានី ខេត្តកំពត។
ប្រភពព័ត៌មានពីអ្នកនៅក្នុងផ្ទះកន្លែងកើតហេតុបានប្រាប់ឱ្យដឹងថា មុនកើតហេតុគឺពួកគាត់ជាអ្នកធ្វើការនៅក្នុងផ្ទះវីឡាកើតហេតុខាងលើនោះ បាននាំគ្នាសម្រាកនៅក្នុងរោងផ្ទះបាយក្រោយផ្ទះធំជុំគ្នា ភ្លាមៗនោះស្រាប់តែលឺសម្លេងជើងមនុស្សដើរនៅលើដំបូល ក៏នាំគ្នាភ្ញាក់ផ្អើលតាមរកមើលក៏ប្រទះឃើញជនសង្ស័យនោះបម្រុងឈោងឡើងទៅផ្ទះធំ ក៏នាំគ្នាឡើងទៅចាប់ឃាត់ខ្លួនសួរនាំ ទើបដឹងថា យុវជនខាងលើជាអ្នកធ្វើការនៅរ៉ារទេះភ្លើងស្នាក់នៅក្រោយផ្ទះកើតហេតុ ហើយជនសង្ស័យនោះអាចឡើងរបងផ្ទះរួច គឺដោយសារតែគេដាក់ជណ្តើរដែកឡើងតាមរបងផ្ទះ ។
ក្រោយពីឃាត់ខ្លួនសមត្ថកិច្ចសួរនាំយុវជនខាងលើឆ្លើយលែងដឹងអី និងធ្វើតេស្ដទឹកនោម គឺឃើញមានសាធាតុញៀនក្នុងខ្លួន ទើបដឹងថា ជនសង្ស័យខាងលើនេះប្រើប្រាស់ថ្នាំញៀនលើសកំណត់ រហូតគ្រប់គ្រងខ្លួនឯងលែងបាន។ ក្រោយកើតហេតុ យុវជនខាងលើត្រូវបានកម្លាំងសមត្ថកិច្ចប៉ុស្តិ៍នគរបាលរដ្ឋបាលស្រះចក កសាងសុំណុំរឿងបញ្ជូនទៅតុលាការចាត់ការបន្តតាមនីតិវិធី ៕
ចែករំលែកព័តមាននេះ